ლანჩხუთის გამგებელი, გიორგი გოგუაძე ხმებს მისი შესაძლო დეპუტატობის კანდიდატობის შესახებ აბსურდულს უწოდებს. იგი მიიჩნევს, რომ ამ ხმებს ჟურნალისტები ავრცელებენ. გამგებლის აზრით, “ასეთ შემთხვევებში პრესა მხოლოდ იმითაა დაინტერესებული, შეისწავლოს მოსახლეობის განწყობა ამ თუ იმ კანდიდატთან დაკავშირებით”(?!).
სახელისუფლებო წრეებთან დაახლოებული პირები საუბრობენ, რომ “ნაცპარტიას” ლანჩხუთში საკმაოდ ძლიერი კანდიდატი, ჯანდაცვის სამინისტროს მაღალჩინოსანი, გია თვალავაძე ჰყავს შერჩეული. ეს ის თვალავაძეა, რომელიც სახელმწიფოს მიერ გაპიარებულ კლინიკებში მოხვედრილ გაჭირვებულ ლანჩხუთელებს ხშირად ევლინება მხსნელად. ბევრმა იცის ლანჩხუთში, რომ ხშირად გიორგი თვალავაძის ჩარევის გარეშე, ვერც რეანიმობილს იშოვის პაციენტის ოჯახი და ვერც ხელოვნური სუნთქვის აპარატს. ეტყობა, მმართველ პარტიაში კარგად იციან თვალავაძის მოღვაწეობის შესახებ და ცდილობენ, ლანჩხუთელი ამომრჩევლის არჩევანი პარტიის სასარგებლოდ მიმართონ.
ჩვენ შევეცადეთ, მოსახლეობის აზრი გაგვეგო გიორგი თვალავაძის შესაძლო გადეპუტატების შესახებ. ქუჩაში გაჩერებული მოქალაქეები ჯერ შიშით გაკვირდებიან და მერე უმწეოდ ასავსავებენ ხელებს, ჩვენ რა შეგვიძლია ან ჩვენს აზრს რა მნიშვნელობა აქვსო. თუმცა, თვალავაძის შესახებ, ლანჩხუთელების აზრი ერთსულოვნად დადებითია: “მაგ კაცს კარგი საქმის მეტი არაფერი უკეთებია და თუ დეპუტატი გახდება, უფრო მეტ კარგს არ გააკეთებსო?” _ კითხვით გამოხატა მხარდაჭერა შუახანს გადაცილებულმა მამაკაცმა.
საკრებულოს სხდომიდან გამოსულ გამგებელს “გურია ნიუსმა” რამდენიმე კითხვით მიმართა.
_ ვრცელდება ხმები, რომ ნაციონალური მოძრაობის ერთ-ერთ კანდიდატად თქვენც მოიაზრებით. ადასტურებთ ამ ინფორმაციას?
_ ეს არის აბსურდი, არანაირი კანდიდატურის განხილვა ჯერ არ ყოფილა. ეს საკითხი რეგიონებში არ წყდება. ივლისში ტარდება პარტიის ყრილობა და იქ მოხდება კანდიდატის წარდგენა.
_ არც გიორგი თვალავაძის კანდიდატურაზე ყოფილა საუბარი?
_ ეს ყველაფერი ჟურნალისტების მონაჭორია. ისინი, ამომრჩევლის განწყობაში გასარკვევად, ხშირად შეგნებულად ავრცელებენ მსგავს ხმებს.
_ ქალაქის პარკში საზოგადოებრივი ტუალეტის მშენებლობა, სხვა, უფრო შესაფერის ადგილზე იქნა გადატანილი. თვლით თუ არა, რომ ამ გადაწყვეტილების მიღებაზე საზოგადოების უარყოფითმა დამოკიდებულებამ მოახდინა გავლენა?
_ თქვენ, ალბათ, ნანახი არ გაქვთ, რომ ევროპის დიდ ქალაქებში გაშენებულ პარკებში უზარმაზარი შენობებია და მასში საზოგადოებრივი ტუალეტებია განთავსებული. გამგეობის უკან რომ აგვეშენებინა, მაშინ იმაზე ატყდებოდა ერთი ამბავი _ ტუალეტი გამგეობის უკან გააკეთეს და მოსახლეობა ვერაფერში იყენებსო.
_ ხალხი ტუალეტის აშენებით კი არა, მისი ადგილმდებარეობით იყო უკმაყოფილო.
_ ჰოდა, გადავიტანეთ, ახლა რესტორან “ყაზბეგის” უკან შენდება და არავის შეაწუხებს. როცა აშენდება, თქვენ თვითონ ნახავთ, რომ ევროპული სტანდარტების შესაბამისი იქნება. მნიშვნელოვანია ისიც, რომ ტუალეტით სარგებლობა შეეძლებათ შეზღუდული შესაძლებლობის მქონე ადამიანებსაც.
