“სოფლის პრობლემებზე ზრუნვა”

როგორც ჩვენთვის გახდა ცნობილი, აღნიშნულ შეხვედრაზე, “სოფლის პრობლემებზე” საუბრის შემდეგ, დასახელდნენ კონკრეტული პიროვნებები, რომლებმაც მიიღეს დავალება და მხარდამჭერთა ათკაციანი სიის შედგენის სპეციალური ფორმატი. შეხვედრაზე მყოფი მოსახლეობა ასევე მკაცრად იყო გაფრთხილებული, რომ კონტაქტი არ ჰქონოდათ ჟურნალისტებთან.

_ ეს შეხვედრა ფსიქოლოგიურ ზეწოლას უფრო ჰგავდა, თან ისე ოსტატურად შენიღბულს, რომ ყველა იქ მყოფიც კი ვერც მიხვდებოდა, _ აღნიშნა ჩვენთან საუბარში შეხვედრაზე მყოფმა ერთ-ერთმა ქალბატონმა.

ჩვენ ტელეფონით დავუკავშირდით სოფელ კოხნარის რწმუნებულს, ჟიფო ცინცაძეს:

_ ქალბატონო ჟიფო, მოსახლეობასთან მუნიციპალიტეტის გამგებლის მიერ 4 მაისს ჩატარებულ შეხვედრას თქვენც ესწრებოდით. რა იყო ამ შეხვედრის მიზანი?

_ სოფლის პრობლემებზე ვისაუბრეთ. საუბარი შეეხებოდა სოფლის განვითარებას.

_ გვაქვს ინფორმაცია, რომ მოსახლეობამ მიიღო დავალება ნაციონალური მოძრაობის მხარდამჭერების შეგროვების შესახებ…

_ დანარჩენზე ვერ გიპასუხებთ, პრესსამსახურს მიმართეთ, _ გვითხრა ქალბატონმა ჟიფომ და ტელეფონი გაგვითიშა.

ამ საკითხის შესახებ კომენტარისთვის დავუკავშირდით მუნიციპალიტეტის გამგეობის პრესსამსახურის უფროსს, თეონა ჩიგოგიძეს: _ მაგასთან დაკავშირებით კომენტარს ვერ გავაკეთებ, _ გვიპასუხა ჩიგოგიძემ და ჩვენი კითხვები უპასუხოდ დატოვა.

შემდეგ ჩვენ მუნიციპალიტეტის გამგებელს ლელა იმედაშვილს ვთხოვეთ, ესაუბრა ამ თემაზე:

_ ქალბატონო ლელა, კონკრეტულად რა საკითხები განიხილებოდა მოსახლეობასთან შეხვედრისას 4 მაისს?

_ მოსახლეობასთან შეხვედრები, ვფიქრობ, ყველაზე მნიშვნელოვანია და ამ შეხვედრების ინტენსივობა კიდევ უფრო უნდა გაიზარდოს. არ ვიცი, რატომ მაინცდამაინც 4 მაისი _ ეს ჩვენი ყოველდღიურობაა და შეხვედრები სხვადასხვა ფორმატისაა. ამ ტიპის შეხვედრებზე ჩვენ ინფრასტრუქტურისა და სოფლის პროექტებით დაგეგმილ, გახორციელებულ და გასახორციელებელ პროექტებზე ვსაუბრობთ; მოსახლეობისგან ვიღებთ შეკითხვებს, შენიშვნებს და რჩევებს, რაც საუკეთესო შესაძლებლობაა, დაგეგმო და განახორციელო საქმიანობა გაცილებით უკეთ.

_ ჩვენი ინფორმაციით, შეხვედრაზე დასახელდნენ ადამიანები, რომლებსაც დაევალათ ათი მხარდამჭერის შეგროვება. თან გააფრთხილეს, რომ ჟურნალისტებთან არ ეთანამშრომლათ. რას გვეტყვით ამის შესახებ?

_ ნამდვილად არ ვიცი, რაზე საუბრობთ. ამას ჩვენს შეხვედრებთან კავშირი ნამდვილად არ აქვს. რაც შეეხება “შეგროვებებს” _ ამას სხვადასხვა მიზნით კარგა ხანია აკეთებენ _ ზოგი მოქალაქეობის მინიჭებისთვის, ზოგიც გაზეთების გამოწერისთვის, ზოგიც პოლიტიკური მიზნებისთვის…

_ ნებისმიერ პარტიას აქვს წინასაარჩევნოდ მოსახლეობასთან შეხვედრის და საუბრის უფლება. რატომ მოხდა ამ ფაქტის ასე გასაიდუმლოება?

_ ბუნებრივია, ნებისმიერ პარტიას აქვს მოსახლეობასთან შეხვედრის და საუბრის უფლება და ამ უფლებას ყველა იყენებს. თუ თქვენ ჩვენს მოსახლეობასთან ამჟამინდელ შეხვედრებს გულისხმობთ, მას ჯერ პოლიტიკასთან შეხება არ აქვს. საარჩევნო რეჟიმზე გადასვლის შემდეგ კი ამ ტიპის შეხვედრებს ჩვენ აუცილებლად გავმართავთ და დამერწმუნეთ, ნაციონალურ მოძრაობას აქაც ყველაზე მეტი ექნება სათქმელი და სასაუბრო გაკეთებულ საქმეებზე, რა თქმა უნდა, ჩოხატაურის მაგალითებითაც. რაც შეეხება “გასაიდუმლოებას”, რა ფაქტს გულისხმობთ, არ ვიცი. რას ნიშნავს “გასაიდუმლოებული”? თუ წინასწარ ამ შეხვედრების “აფიშირებას” გულისხმობთ, ჩვენ ამ შეხვედრებით თავს არ ვიწონებთ და პიარს არ ვაკეთებთ. ხალხთან ურთიერთობა და შეხვედრები არის ხელისუფლების ყოველდღიური ვალდებულება და საქმიანობის უმნიშვნელოვანესი ნაწილი. რაც შეეხება დახურვა-არდახურვას, შეხვედრები მოსახლეობასთან დახურული არ არის და ამას ჩვენი ყოველდღიური საქმიანობა ჰქვია. მაგალითად, დღეს მე დაბლაციხეში გახლდით და მოსახლეობას შევხვდი. საკმაოდ გულახდილად ვისაუბრეთ სოფლისთვის მნიშვნელოვან საკითხებზე, პრობლემებზე, ადგილზე დავათვალიერეთ ამ სოფლის რამდენიმე უბანი. როგორც გითხარით, ეს ჩვენი ყოველდღიური საქმიანობაა და ამაში განსაკუთრებული არაფერია. თუ თქვენ ამ ტიპის შეხვედრაზე დასწრების სურვილი გაქვთ, სიამოვნებით დაგპატიჟებთ.

ფიქრია ბეღელაძე, კოხნარის “მედიაწიგნიერების ცენტრი”