_ გალაკტიონს რომ 21-ე საუკუნეში ეცხოვრა, ამ სიტყვებს ვეღარ დაწერდა, რადგან ნასაკირალი ისე მდუმარე აღარ არის და არც ის ბუნებაა იქ, რაც წლების წინ აღწერა პოეტმა.
ოზურგეთიდან სოფელ ძიმითამდე, ნასაკირალის ტერიტორიაზე, ერთ დროს გზის პირზე ჩამწკრივებული ნაძვები ახლა გადამწვარია. თითქმის ყოველ გაზაფხულზე აქ ასეთი მდგომარეობაა _ მოსახლეობა ახლა სხვა კულტურებს აშენებს, და გაწმენდითი სამუშაოების დროს, პატარა კოცონებს ანთებს, რასაც შემდეგ ქარი ხანძრად აქცევს. ასე ნადგურდება ნაძვები.
“გურია ნიუსთან” მოსახლეობა ასეთ კომენტარს აკეთებს: _ არაფერი არ ვიცით. ალბათ, ნათიბს წვავდნენ და შემდეგ მოეკიდა ცეცხლი ხეებს.
_ ეს ძალიან ხშირად ხდება და არ იცით, ვინ უკიდებს ცეცხლს?
_ არა, არ ვიცი, სხვა ფართობში ვიყავი წასული. ახლა, როცა საგაზაფხულო სამუშაოები მიდის, ვიღაცამ პატარა ადგილზე დაანთო და შემდეგ ქარს ვერ გაუმკლავდა. შარშან ძლივს გადაურჩა ჩემი სახლი დაწვას, _ ამბობს ერთი ადგილობრივი მცხოვრები.
45 წლის მამაკაცი: _ სპეციალურად არავინ არ აკეთებს. ამ ბოლო დროს, სადაც ნაძვები დაიწვა, იქვე ახლოს, ფართობზე პატარა ცეცხლი ენთო, შემდეგ კი სხვაგანაც გავრცელდა. მოსახლეობა ყურადღებას კი აქცევს, მაგრამ ქარს როდესაც გადააქვს ცეცხლი, აქ უძლურები ვართ. ბოლოს რამდენიმე ხე დაიწვა _ ოზურგეთიდან, ქობულეთიდან და ჩოხატაურიდან ამოვიდნენ მეხანძრეები, ძლივს ჩააქრეს.
თ.ქ., დაბა ნასაკირალის მცხოვრები: _ ეს ადგილი ჩემია (გვაჩვენებს იმ ადგილს, სადაც ახლოს არის დამწვარი ნაძვის ხეები). ახლა უნდა დავიწყოთ შემოღობვა. დროულად ჩააქრეს ცეცხლი, თორემ მარტო ნაძვები არ დაიწვებოდა. წყლები და აბანოები რომ იყო, ნასაკირალს კურორტი ერქვა, სამკურნალო თვისებები ჰქონდა, ხალხი ჩამოდიოდა, ახლა კი კაცი აღარ ჰყავს პატრონი, ეს ისეთი კურორტი იყო, მთელ საქართველოში ვერ ნახავდით. ვინ წაიღო და რა წაიღო, გაიგე _ აღარაფერი აღარ დარჩა. ისეთი ტყე იყო, ჩიტი ვერ შეფრინდებოდა.
გარდა ხანძრისა, ხალხს სხვა პრობლემებიც აწუხებს: _ პრობლემების მეტი რა გვაქვს. ახლა მაგალითად, ტრაქტორი ვერ ვიშოვეთ _ საყანე ფართობი დასახნავია და ვართ გაჩერებულები. ამ შესახვევში ავდარში ვერ შემოხვალთ. როცა ცუდი ამინდია, ბავშვები “ვალინკებით” დაგვყავს _ სკოლაში ხომ უნდა წავიდნენ?! ამ გზის მოხრეშვა არ მოხერხდა _ რამდენჯერმე მივმართეთ გუბერნიას, მაგრამ არავინ არ გვაქცევს ყურადღებას. წყლის პრობლემაც არის, გამრიცხველიანება დაუსრულებელია, ტექნიკა არ გვყავს. სოფლის რწმუნებულს მივმართეთ, მაგრამ, არაფერი, _ გვითხრეს ნასაკირალში მცხოვრებლებმა.
ოზურგეთის მუნიციპალიტეტის გამგეობის ზედამხედველობის სამსახურის მთავარი სპეციალისტი გურამ ბერძენიშვილი: _ ნაძვის ხეების განადგურების პრობლემა ჩვენს კომპეტენციაში არ შედის _ ამას ადგენს გამოძიება. შესაბამისი ორგანოები ადგენენ, ვინ დაწვა და რა რა ზიანი მიაყენეს სახელმწიფოს. შემდეგ, გამგეობა სასამართლო პროცესზე წარდგება, როგორც დაზარალებული, ჯარიმებიდან ამოღებული თანხა კი დაჯდება მუნიციპალიტეტის ანგარიშზე.
_ ბატონო გურამ, რა ღონისძიებას ატარებს ოზურგეთის მუნიციპალიტეტის გამგეობა ქარსაცავი ზოლის დასაცავად?
_ ქარსაფარი ზოლი რომ იჭრება, მარტო ჩვენ არ ვართ ამის უფლებამოსილების გამცემი _ არის სააგენტო. ჯერ იქედან მიიღეთ ინფორმაცია და შემდეგ მოგცემთ კომენტარს. პოლიციაში არის საქმე და გამოძიება იწყება.
სსიპ ბუნებრივი რესურსების სააგენტოს ტყისა და ველური ბუნების მართვის დეპარტამენტის გურიის სამმართველოს უფროსი ნიკოლოზ ნოზაძე “გურია ნიუსთან” ასეთ კომენტარს აკეთებს:
_ საქმეა აღძრული და პოლიცია საქმის კურსშია. კიდევ ერთ ფაქტის შესახებ გეტყვით _ ნაგომარში გაჩნდა ხანძარი და ჩვენ პირადად გამოვავლინეთ სამართალდამრღვევი, აქტი დავწერეთ და პოლიციაში გადავაგზავნეთ.
_ რა ზომებს მიმართავთ, რომ ეს პრობლემა მოგვარდეს?
_ ძირითადად, ზედამხედველობის სამსახური აკონტროლებს სიტუაციას, ჩვენც თავისთავად ვიღებთ მონაწილეობას. რაც მოხდა ხანძართან დაკავშირებით, ყველა საქმე პოლიციაშია გადაგზავნილი. თუ დავინახეთ მოქალაქე, რომელიც ცეცხლს მოუკიდებს ტყეს, აუცილებლად დავსჯით, _ გვითხრა ნიკოლოზ ნოზაძემ.
