"თუ დამნაშავე ვარ წამიყენონ ბრალი, გადასცენ სასამართლოს, რომელიც იმსჯელებს ჩემს მიმართ, ჩავიდინე თუ არა სისხლის სამართლის დანაშაული, თუ ვერ მიყენებენ ბრალს ადგნენ და დახურონ საქმე"– ამბობს "გურია ნიუსთან" ქალაქ ოზურგეთში მცხოვრები თამაზ ვაშალომიძე.
55 წლის თამაზ ვაშალომიძე პირველი ჯგუფის ინვალიადია, აქვს თირკმელების უკმარისობა და დაავადებულია ც ჰეპატიტით.
2015 წლის 11 ივნისს ვაშალომიძე პოლიციამ მას შემდეგ დააკავა, როცა მან ჩინურ კომპანიას 12 რკინა-ბეტონის მილი მიჰყიდა. ვაშალომიძის თქმის, უკანონოდ იკითხება პოლიციაში ამ ხნის განმავლობაში, მიიჩნევს, რომ ბიზნესსაქმიანობაში ხელი შეეშალა.
"უკვე ერთ წელზე მეტია რაც პოლიციაში გამოძიება მიმდინარეობს, დაკითხული ჰყავთ ყველა ის პირი, ვისთანაც უშუალოდ მქონდა შეხება, არანაირი რეაგირება დღემდე არაა, გამაგებინონ ბრალს მიყენებენ თუ არა, თუ ვერ მიყენებენ, მომცენ საშუალება განვახორციელო ის სამუშაოები, რომელიც დავიწყე, თუ ვარ დამნაშავე, გადაწყვეტს სასამართლო. ის ადამიანები მთხოვენ დარჩენილი თანხის ანაზღაურებას, გასაცემი მაქვს მოსახლეობისთვის 1 280 ლარი, მოდის ხვნა – თესვის პერიოდი, დარიგებული მაქვს 12 965 ლარი, 24 300 ლარი ბიუჯეტში მაქვს შეტანილი და ვარ გაურკვეველ სიტუაციაში, თან ჩემს მდგომარეობაში მყოფი ადამიანი, მე იმით არ ვვაჭრობ, რომ ვარ პირველი ჯგუფის ინვალიდი, ვარ დიალეზზე, თირკმლის უკმარისობა მაქვს, ასევე ც ჰეპატიტი, თუმცა კანონის წინაშე ყველა თანაბარია.
ჩინელებს წაღებული აქვთ 7 080 ლარის ღირებულების 12 ცალი მილი, რომელიც დაყადაღებულია, ან მომიხსნან ყადაღა, რომ მოსახლეობას დავურიგო მათი კუთვნილი თანხა, ყველაფერი მაქვს დოკუმენტალურად, რომელიც პოლიციაშია"-ამბობს ვაშალომიძე.
"ჩემმა უფლებების დამცველებმა გამოკითხეს მოსახალოება, ასევე პოლიციამ. კიდევ ერთხელ ხაზს ვუსვამ, ვარ თუ არა დამნაშავე, ამას სასამართლო გადაწყვეტს. მიმაყვანინონ ბოლომდე საქმე, რატომ გაჭიანურდა ასე? თუ ბრალს ვერ მიყენებენ, დახურონ საქმე და მომცენ საშუალება იმ ხალხს გადავუხადო კუთვნილი სარგო. ცოდვაა ის ხალხი.მომიხსნან ყადაღა. არაკანონიერად შემიზღუდეს ბიზნესის კუთხით გადადგილება და საქმის განხორცილება, ბოლომდე მიყვანა. ფსიქოლოგიურად მომსპეს. რაც არ უნად ზეწოლა მოახდინონ, მე მზად ვარ ვითანამშრომლო პოლიციასთან და თუ დამნაშავე ვარ დავისაჯო სათანადოდ, ვაგებ კანონის შესაბამისად პასუხს"-ამბობს პირველი ჯგუფის ინვალიდი. მისი თქმით, პოლიციაში ბოლოს ერთი თვის წინ დაიკითხა:
"პოლიციასთან პირველი დღიდანვე ვთანამშრომლობ, გამაგზავნეს სამხარაულის ექსპერტიზაზე, ჩავიტარე ექსპერტიზა, ბოლო – ბოლო ხომ ყველაფერს მისი დასაწყისი და დასასრული აქვს? თან მოსახლეობა მირეკავს და მთხოვს თანხას, ყანები აქვთ დასახნავი, დასათესი, რა გავაკეთო? ქონება ვისია, ჯერჯერობით კვლავ დაუდგენელია, აზრზე არ არიან ეკონომიკის სამინისტროში ვისია ქონება, რატომ გაჭიანურდა არ ვიცი" _ამბობს დაზარალებული.
თამაზ ვაშალომიძის ინტერესების დამცველი მანუჩარ გოგრაჭაძე "გურია ნიუსთან"ამბობს, რომ გამოძიებას არ აქვს საკმარისი მტკიცებულებები იმისათვის, რომ პირს ბრალი წაუყენონ,
"ქურდობის ფაქტზე გამოძიება მიმდინარეობს, თუმცა საქმე აღძრული ვერ იქნება, იქედან გამომდინარე, რომ სტატუსი არ გააჩნია თამაზ ვაშალომიძეს, ის იკითხება მოწმის სტატუსით, გამოძიება დაწყებულია ქურდობის ფაქტზე, 177 მუხლით, თუ ადამიანს უნდა წაუყენონ ბრალდება, ამისათვის, პირველ რიგში, უნდა გამოიკვეთოს დაზარალებული, დაზარალებული არ არის არავინ, ქურდობა ნიშნავს, სხვისი ნივთის ფარულად დაუფლებას მართლსაწინააღმდეგოდ, ეს პირი ფარულად არ ეუფლებოდა სხვის ქონებას, მან ჩააყენა საქმის კურსში ადგილობრივი ხელისუფლება, დღისით, მზისით ხდებოდა ეს, ბუნებრივია ქურდობა ვერ გამოიკვეთებოდა"-ამბობს ადვოკატი.
მანუჩარ გოგრაჭაძემ ასევე ოფიციალური წერილით მიმართა სსიპ სახელმწიფო ქონების ეროვნულ სააგენტოს, რომლითაც მოითხოვა ოზურგეთის მუნიციპალიტეტის, სოფ. გურიანთის ტერიტორიაზე არსებული წყლისა და კანალიზაციის ქსელის მესაკუთრის შესახებ და საკუთრების უფლების წარმოშობის შესახებ ინფორმაცია ან/და დოკუმენტაცია, ასევე მოითხოვა ქსელების კოორდინატები .
ადვოკატი ამბობს, რომ სსიპ სახელმწიფო ქონების ეროვნული სააგენტოს 31.12.2015 წლის წერილით ეცნობათ, რომ "სოფელ გურიანთაში არსებული წყლისა და კანალიზაციის ქსელები სახელმწიფო საკუთრება იყო. თუმცა, როგორც გოგრაჭაძე ამბობს, სააგენტოს მიერ ოფიციალური წერილიდან ირკვევა, რომ მათთვის უცნობია წყლისა და კანალიზაციის ქსელების ადგილმდებრეობა, ასევე უცნობია ქსელის კოორდინატები და სხვა დანარჩენი ტექნიკური ინფორმაცია ან/და მათი ექსპლოატაციის პირობები და ვადები. ასევე წერილში მითითებული არ გახლავთ საკუთრების უფლების წარმოშობის საფუძვლები. ზემოხსენებულის გარდა ასევე ოფიციალური წყაროებიდან გაუკვეველია შევიდა თუ არა ქსელი ექსპლოატაციაში როდესმე, ან რამდენ ხანს მიმდინარეობდა მისი დანიშნულებისამებრ გამოყენება."
"გურია ნიუსისთვის" ცნობილი ხდება, ასევე ადვოკატის მიერ მოწოდებული მასალებით და მოწმეების ჩვენებით, რომ ადრეულ წლებში მდინარე ნატანებმა სერიოზულად დააზიანა ქსელი. ამის შემდეგ მდინარის წყალი შეიჭრა მილებში, საიდანაც შემდეგში დაიტბორა საყანე ფართობები. როგორც მოსახლეობა ამბობს, ისინი ადრეულ წლებში პერმანენტულად მიმართავდნენ ადგილობრივ ხელისუფლებას პრობლემის მოგვარების მიზნით, მიუხედავად ამისა, როგორც უფლებების დამცველი ამბობს, ვერ გაირკვა ქსელის მეპატრონის ვინაობა და შემდეგში ნაწილობრივ მოხდა ამ საკითხის მოგვარება.
თამაზ ვაშალომიძის ინტერსების დამცველი მანუჩარ გოგრაჭაძე მის მიერ სსიპ სახელმწიფო ქონების ეროვნულ სააგენტოს მიწერილ ოფიციალურ წერილში აღნიშნავს:
"სოფელ გურიანთის მოსახლეობის განმარტებით, მათთვის უცნობია, ვის მიერ მოხდა ქსელის მოწყობა, ასევე უცნობია ვისი საკუთრებაა ეს ქსელი. მათივე განმარტებით მათ ნაკვეთებზე გამავალი მილების შესახებ პრეტენზია არავის განუცხადებია, აღსანიშნავია, რომ ამ პირებზე მიწების კერძო საკუთრებაში გადაცემა განხორციელდა 1993 წელს, ასევე აღსანიშნავია, რომ მათი დიდი ნაწილი საკუთრებაში გადაცემამდე სხვადასხვა ფორმით ფლობდა ამ ნაკვეთებს, როგორც გურიანთის კოლმეურნეობის კოლმეურნეები და მოყავდათ მოსავალი. ამოღებული მილების დიდი ნაწილი სრულიად ამორტიზებული გახლდათ, რასაც აღნიშნავს ყველა თვითმხილველი.
ამასთანავე მოსახლეობის/მოწმეების განმარტებით კანალიზაციის ქსელს არასდროს არ შეუსრულებია თავის ფუნქცია და არ შესულა ექსპოლოატაციაში. მოწმეების გამოკითხვით დგინდება, რომ მილების ამოღებამდე ჩემს მიერ მიმართული იქნა ადგილბრივი ხელისუფლებისათვის და მათთვის ცნობილი იყო ის ფაქტი, რომ დაიწყებოდა მილების ამოღება, ასევე მილების სამომავლოდ ამოღების ფაქტი ცნობილი იყო იმ მოსახლეობისათვის ვის საკუთრებაში არსებულ ნაკვეთებზე გადიოდა მილები, რომელთანაც მოხდა წინასწარ შეთანხმება და შემდგომში მათზე გაიცა საკომპენსაციო თანხა. ასევე რაც მნიშვნელოვანია, ამოღებული და შემდეგში გარემონტებული მილები დასაწყობებულია სოფელ გურიანთში. საქმის ვითარებიდან ჩანს, რომ ადგილი არა აქვს სისხლის სამართლის დანაშაულს (177-ე მუხლი- ",ქურდობა, ესე იგი სხვისი მოძრავი ნივთის ფარული დაუფლება მართლსაწინააღმდეგო მისაკუთრების მიზნით,") ასევე საქმის ვითარებიდან არ იკვეთება სისხლის სამართლის დანაშაულის სხვა ნიშნები, შესაბამისად სააგენტოს მხრიდან მოძრავ ნივთზე საკუთრების პრეტენზია, ასევე მიყენებული ზიანი კერძოსამართლებრივი ხასიათისაა და უნდა გაირკვეს ნივთზე უფლების მქონე პრეტენზიის მქონე პირების მიერ მორიგების გზით ან სასამართლოში სამოქალაქო დავის შედეგად. სამოქალქო კოდექსის 158-ე მუხლის ნაწილის მიხედვით – "ივარაუდება, რომ ნივთის მფლობელი არის მისი მესაკუთრე. ხსენებულ მუხლზე დევს სამოქალაქო ბრუნვის ძირთადი ნაწილი, მათ შორის იმგვარი სამართლებრივი ხასიათის, რომელსაც ადგილი აქვს მოცემულ შემთხვევაში, შესაბამისად იმის ვარაუდი, რომ მილების მესაკუთრე გახლდათ იმ ნაკვეთების მესაკუთრეები, რომელთაც გადაეცათ საკომპენსაციო თანხა საფუძვლიანი გახდათ, მით უმეტეს მაშინ როდესაც გაერთიანებული წყალმომარაგების კომპანიას (რომელსაც გადაეცა ასეთი ტიპის ქსელები) ან ადგილობრივი თვითმმართველობის ორგანოსათვის მილების ამოღებასთან დაკავშირებით ინფორმაცია წინასწარ იყო ცნობილი და მათ რაიმე სახის პრეტენზია არ განუცხადებით. შესაბამისად მიმაჩნია, რომ ადგილი აქვს ისეთ ურთიერთობას, რომელიც მოწესრიგებული უნდა იყოს კერძოსამართლებრივი ურთიერთობის მარეგულერებელი ნორმებით და არა სისხლის სამართლის კანონმდებლობით, ხსენებულიდან გამომდინარე გთხოვთ გაითვალისწინოთ ჩემს განცხადებაში მოყვანილი ფაქტები და თქვენი მხრიდან განახორციელოთ ყველა საჭირო მოქმედება სისხლის სამართლის საქმის წარმოების შეწყვეტის მიზნით" -აღნიშნულია ოფიციალურ წერილში.
"გურია ნიუსი" აღნიშნულ საკითხთან დაკავშირებით რამდენიმეჯერ წერდა. მკითხველს შევახსენებთ, რომ ქალაქ ოზურგეთში მცხოვრებ, 54 წლის თამაზ ვაშალომიძისთვის სამართალდამცავებს სახელმწიფო ქონების მითვისებას ედავებიან.
საყანე ფართობებიდან ამოღებული რკინაბეტონის მილები სოფელ გურიანთაში ე. წ. კარიერების ტერიტორიაზეა დასაწყობებული.
ოზურგეთის რაიონული პროკურატურის პროკურორის მოვალეობის შემსრულებელი მალხაზ სირაძე ჩვენთან საუბრისას აღნიშნავდა, რომ მიმდინარეობს გამოძიება, რის შემდეგაც მიღებული იქნება გადაწყვეტილება:
"გამოძიება დაწყებულია სახელმწიფო ქურდობის ფაქტზე, 177 მუხლით. საქმე ეხება რკინა-ბეტონის მილების დაუფლებას ფაქტს. გამოძიებას გურიის სამხარეო მთავარი სამმართველო აწარმოებს", _ გვითხრა სირაძემ.
ამავე თემაზე:
დანაშაული თუ კანონიერი ქმედება _ ვისზე გასვლას ცდილობს გამოძიება?
ვინ და რისთვის ამოიღო 165 000 ლარის ღირებულების რკინაბეტონის მილები
