“მნიშვნელოვანია ვიცოდეთ საზოგადოებრივი მაუწყებლის ხელმძღვანელობის პოზიცია, გმობს თუ არა ის თავისი ჟურნალისტის საქციელს, თუ პირიქით _ შეუმჩნევლად დატოვებს ამ საკითხს და წაახალისებს ამ ჟურნალისტს. თუ “პირველი არხი” დუმილს აირჩევს, ეს იქნება სიგნალი, რომ საზოგადოებრივმა მაუწყებელმა მსგავსი მეთოდებით დაიწყო მუშაობა უკვე ჩვენს მედია სივრცეში, რაც სერიოზული პრობლემაა”, _ აღნიშნავს ქორიძე კახეთის საინფორმაციო ცენტრთან საუბრისას.
საქმე ეხება ფოთში, ირაკლი ალასანიას შეხვედრაზე ჟურნალისტებს შორის მომხდარ გუშინდელ ინციდენტს _ სოციალური ქსელით გავრცელდა კადრები, სადაც ჩანს, პირველი არხის სამეგრელოს ბიუროს ჟურნალისტს ნატო ბერულავასა და სააგენტო “ტსპრესს.გე”-ს ჟურნალისტს იზა სალაყაიას შორის მომხდარი ინციდენტი: ნატო ბერულავა შეხვედრაზე მყოფ ირაკლი ალასანიას ეუბნება, რომ მას შეურაცხყოფას აყენებდნენ და იქვე “ტსპრესს.გე”- ს ჟურნალისტს მიმართავს, რომ შეწყვიტოს პირადად მისი გადაღება. ამის შემდეგ კადრები ირევა, ადგილზე მყოფი თვითმხილველები კი, მათ შორის მე-9 არხის ჟურნალისტი ლაშა ზარგინავა აცხადებს, რომ ნატო ბერულავამ პირველი არხის მიკროფონი ჩაარტყა იზა სალაყაიას კამერას.
“გურია ნიუსი” გთავაზობთ ექსლუზიურ ინტერვიუს ნატო ბერულავასთან.
ნატო ბერულავა: _ გუშინ, ირაკლი ალასანია უნდა შეხვედროდა თავის მომხრეებს ფოთში, მალთაყვას დასახლებაში. ირაკლი ალასანიას ადგილობრივი კომიტეტის წევრებმა, მოინდომეს სტადიონზე შესვლა, რათა ბავშვებისთვის მაისურები დაერიგებინათ. სტადიონზე ამ დროს მიმდინარეობდა სპორტისა და ახალგაზრდობის სამინისტროს მიერ ორგანიზებული სახალისო ფეხბურთის ტურნირი, რომელშიც 18 გუნდი მონაწილეობდა. სწორედ აქედან დაიწყო დაპირისპირება.
ირაკლი ალასანიას მომხრეებს აუკრძალეს სტადიონზე შესვლა _ არ გინდათ, ბავშვები თამაშობენ, ტურნირი ტარდება და თქვენ იქ საქმე არ გაქვთო.
მოგვიანებით, დაპირისპირება მოხდა ადგილობრივ დევნილებსა და ალასანიას მხარდამჭერებს შორის _ ალასანიას 2005 წელი გაუხსენეს, თუ როგორ გადავიდა რუსეთში და რას აკეთებდა იქ, თანაც სულ მოღალატე ეძახეს. ამ ყველაფერს ვიღებდი. ამ მომენტში, ყველგან თან დამდევდა კამერით ტსპრესის ჟურნალისტი, იზა სალაყაია. ალასანიას ხალხს და მათ შეხვედრას კი არ იღებდა, მე მიღებდა. ვუთხარი არ გადამიღო,-მეთქი! მაინც იმ მომენტში გადამიღო, როდესაც ირაკლი ალასანიას ვეხვეწები, ძალიან გთხოვთ, ბატონო ირაკლი, შეურაცხყოფას მაყენებენ და მიშველეთ,-მეთქი.
_ რა შეურაცხყოფაზე ელაპარაკებოდით ირაკლის და ვისგან თხოვდი შველას?
_ მაფურთხებენ. ამის კადრები არსებობს.
_ ვინ გაფურთხებდათ, ალასანიას მომხრეები?
_ დიახ, დიახ, ალასანიას მომხრეები. დღეს ყველაფერი გავა 8 საათიან “მოამბეში”, ეს გუშინდელი ამბავია. დღეს შეხვედრა ჰქონდათ სენაკში, სადაც ალასანიაც იყო და მანანა კობახიძეც. ორივემ გააკეთა კომენტარი და დაგმეს ეს ფაქტი. მე გუშინ ველოდებოდი, რომ ირაკლი ალასანია ამ კადრებს ნახავდა. ვაკო ავალიანმა მითხრა: “ის მოხუცი, ვინც შეურაცხყოფას გაყენებდა, შეურაცხადი არისო”, ყველა შეურაცხადი იყო, ვინც იქ იდგა?! თქვენ კადრებში ნახავთ ქალბატონს, რომელსაც სათვალე უკეთია და “კარედ” აქვს თმები შეჭრილი, ტელევიზიამ უნდა გაუშვას თავიდან ბოლომდე, რა დღეში არიან და რას აკეთებენ იქ ალასანიას მომხრეები _ “ზონდერ ბრიგადა” მოიყვანეს, გურიიდან ჩამოიყვანეს ხალხი. არ მინდა იმაზე საუბარი, ჩემი საქმე რაც არ არის. მაინტერესებს, მე რატომ მომექცნენ ასე? კამერაზე ხელის დარტყმა გინდა, გინება გინდა _ “შენ სად იყავი 2008-შიო”. 2008-ში მე თუ არ ვიყავი და არ ვეწეოდი ჟურნალისტურ საქმიანობას, აღარ ყოფილა მაშინ სამართალი! შეურაცხყოფას მაყენებდნენ და მეუბნებოდნენ, _ “ფუი შენს ქალობას, ფუი შენს ქალობას!”. როდესაც ეს ადამიანები მაგინებენ, პერანგიც კი შემომახიეს. ამის მოთმენა ძალიან ძნელია.
_ რატომ არ გაუშვა ეს კადრები საზოგადოებრივმა მაუწყებელმა?
_ არ ვიცი. ვერ გეტყვით. დღეს აუცილებლად გაუშვებენ.
_ თუ დღესაც არ გაუშვებს “პირველი არხი” ამ კადრებს, მაშინ?
_ გაუშვებენ. გაუშვებენ. ამ ფაქტებზე მანანა კობახიძის და ირაკლი ალასანიას კომენტარებიც ჩავწერე.
_ სოციალურ ქსელში გავრცელებულ კადრებზე ტიტრია გაკეთებული, სადაც წერია, ნატო ბერულავამ მიკროფონი ჩაარტყა ტსპრესის კამერასო. კადრებში ისმის მე-9 არხის ჟურნალისტის, ლაშა ზარგინავას ხმაც, სადაც გეუბნებათ, არასწორად იქცევიო. რა შეფასება მისცეს კოლეგებმა ამ ფაქტს?
_ რაღაცა ეჭირა ხელში სალაყაიას, მგონი, კამერა არ იყო, ტელეფონი იყო. იყო იქ ლაშა ზარგინავა. ლაშამ მე გამამტყუნა.
_ რა მიზნით გიღებდნენ პირად თქვენ?
_ სწორედ ეს არის საკითხავი. მე მაინც მგონია, რომ ისინი ფოთში ალასანიას სტუმრობის ამსახველი კადრების გადასაღებად არ იყვნენ. მგონია, რომ რაღაც პროვოკაციას გეგმავდნენ. სულ არ გამოვრიცხავ, რომ ალასანიას წინააღმდეგ ყოფილიყო ეს ყველაფერი მიმართული და ჩემს წინააღმდეგაც, რომ ასე აგორებულიყო ყველაფერი.
_ რატომ ფიქრობთ ასე, ტსპრესს-თან რამე პირადული უთანხმოება გქონდათ?
_ ერთხელ სალაყაიასთან მქონდა უთანხმოება. მაშინ, რაღაც საკითხთან დაკავშირებით ჩემი აზრი გამოვთქვი, რომელიც დაწერა, შემდეგ ჩემი ფოტოთი გამოაქვეყნა და ჩემს ნათქვამს კი მიაწერა, რომ თითქოს ფოთის მერმა თქვა ეს ყველაფერი. ეს იყო და ეს.
რაც შეეხება ამ ფაქტის ერთ-ერთ თვითმხილველს, ლაშა ზარგინავას, “გურია ნიუსთან საუბრისას ის ამბობს, რომ მან დაინახა, როგორ ჩაარტყა ნატო ბერულავამ მიკროფონი იზა სალაყაიას კამერას: _ ირაკლი ალასანიასთან ინტერვიუს ჩაწერის პირველი ნაწილი, რაც ტსპრესს.გე-ს უდევს, მეც მაქვს ჩაწერილი. ირაკლიმ შემდეგ უშუალოდ მოსახლეობასთან საუბარი გააგრძელა და შესაბამისად, მეც გამორთული მქონდა კამერა. ნატო მოვიდა და ირაკლის უთხრა, ვიღაცეები ხელს მიშლიანო. იქ ისეთი დაძაბული სიტუაცია შეიქმნა, ძნელი იყო კონკრეტულ რამეებზე ყურადღების გამახვილება.
არ ვიცი, ამ დროს ნატომ რა შეამჩნია, იზა რას აკეთებდა, მაგრამ დავინახე, რომ იზას კამერაზე აუქნია დიქტოფონი. მინდოდა ჩამეწერა ეს ყველაფერი, მაგრამ ჩემი რეაქცია დაგვიანებული აღმოჩნდა _ ამ ფაქტის გადაღება ვერ მოვასწარი. მაგრამ ამის მოწმე ირაკლი ალასანიაცაა, რადგან ის აწყნარებდა ამ ჟურნალისტებს.
რატომ არ უნდოდა ნატოს, იზას რომ გადაეღო, ვერ გეტყვით. ყველა სხვა კამერა ჩართული იყო და რატომ გაუჩნდა ამაზე პრეტენზიები, ვერ გეტყვით. მე რომ გადამეღო, მეც ჩამარტყამდა? არ ვიცი, ვერაფერს გეტყვით.
_ ლაშა, ამბობთ, რომ ყველა კამერა ჩართული იყო. უშუალოდ ეს ფაქტი სხვა კამერებმაც ვერ დააფიქსირეს?
_ აი, ეგ არ ვიცი. მე მხოლოდ შემდეგი პროცესი მაქვს გადაღებული. იქ “რუსთავი2” იყო და “პირველი არხი”, მე მგონი “ქართული ოცნების” ფოთის პრესსამსახურსაც არ გადაუღია უშუალოდ ეგ კადრები.
ჩემი შეფასება თუ გაინტერესებთ, არაკოლეგიალურობაზე არაფერს ვიტყვი _ ეს არის მაგარი ქაჯობა და პირდაპირ შეგიძლიათ დაწეროთ ასე, მიუხედავად იმისა, რომ ნატო ბერულავასთან წლების ურთიერთობა მაკავშირებს. გუშინ, მე ნატო ბერულავაში ვერ დავინახე კოლეგა და ვერ დავინახე ჟურნალისტი.
_ ლაშა, ნატო ბერულავა საუბრობს იმაზე, რომ გუშინ მას ოპოზიციის წარმომადგენლებმა შეურაცხყოფა მიაყენეს, აფურთხებდნენ და უშვერი სიტყვებით მოიხსენიებდნენ. თქვენ არ შესწრებიხართ ამ ფაქტს?
_ მე როგორც მივხვდი, სწორედ ამაზე ეუბნებოდა ის ალასანიას, შეურაცხყოფას მაყენებენო. ვიღაც ქალებმა მიაყენეს შეურაცხყოფა. მასე მეც მომდევდნენ გუშინ და მაქვს კადრები, როგორ მოსდევს ნატო ბერულავას ის ჯოხიანი ქალი, რომელიც ყველას მისდევდა. კამერები რომ დაინახეს, სულ გაგიჟდნენ, ნუ გვიღებთო. თორემ, ისე ნატოს კი არა, ნებისმიერ კოლეგას დავიცავ…
