“იმ შემთხვევაში, თუ ხელისუფლება არ ჩაგვატარებინებს დევნილთა შეკრებას სამეგრელოში, დავიწყებთ მშრალ, უვადო შიმშილობას და შევეწირები ამ საქმეს,” _ აცხადებს პარტია ” განახლებული საქართველოსთვის” რეგიონალური სამსახურის უფროსი ლაშა გვასალია.
მისი განცხადებით, სამეგრელოს სხვადასხვა სოფლებში, ხალხი დილიდან ემზადებოდა შეკრებაზე წასასვლელად, რომელიც სოფელ რუხში დღეს, 17 საათზე გაიმართება. თუმცა, როგორც გვასალია ამბობს, ერთი კვირის განმავლობაში, სპეცსამსახურების და პოლიციის მხრიდან არ შეწყვეტილა თვალთვალი, დაშინება, შანტაჟი და მუქარა მოსახლეობის მიმართ.
ლაშა გვასალია “გურია ნიუსს” იმ ადამიანების ვინაობას უსახელებს, რომლებიც მოსახლეობაზე ზეწოლას ახდენდა:
_ როგორც ამ დილით გახდა ცნობილი, ხობის რაიონის სოფელ ყულევის გამგებელი, თამაზ ნასარია, პოლიციელებთან და უბნის ინსპექტორებთან ერთად, დადის დევნილი და ადგილობრივი მოსახლეობის ოჯახებში და ემუქრება მათ შანტაჟითა და ანგარიშსწორებით. როგორც ადგილობრივები აცხადებენ, გამგებელი, გარდა იმისა, რომ მათ მიმართ იყენებს სიტყვიერ მუქარას, აშინებს ყოველგვარი სოციალური დახმარების მოხსნით და ეუბნება, რომ სამაგალითოდ დასჯის იმ შემთხვევაში, თუ ვინმე გაბედავს და მონაწილეობას მიიღებს დევნილთა ფართომასშტაბიან აქციაში. ამ თვალსაზრისით განსაკუთრებული სისასტიკით გამოირჩევა ხობის მუნიციპალიტეტის ერთ-ერთი სოფლის გამგებელი კახა მიქაბერიძე, რომელიც პოლიციელების თანხლებით დადის მოსახლეობასთან, აშინებს და ყველას ემუქრება ვინც კი შეკრებაზე წავა. გამგებელი პოლიციელებთან ერთად არ ერიდება ახალგაზრდების დაშანტაჟებას. იწერს მათ სახელებსა და გვარებს, აფიქსირებს ვიდეოკამერით და ემუქრება, რომ ეს მასალები გადაგზავნილი იქნება კუდ-ისა და სოდ-ის თანამშრომლებთან. იგივე მდგომარეობაა სოფელ ჭალადიდში. მოსახლეობის დაშინების ოპერაციაში განსაკუთრებულად აქტიურობს შავი ფერის ჯიპი “სუზუკი”, სახელმწიფო ნომრით OCO-181, რომელიც ეკუთვნის ადგილობრივი პოლიცის უფროსს. ასევე, დაფიქსირებულია “ფოლკსვაგენის” მარკის თეთრი ფერის მანქანა, რომელიც ეკუთვნის ხობის პოლიციის უფროსის მოადგილეს. სპეცსამსახურების განსაკუთრებული ზეწოლის ქვეშ მოექცა სოფელი შუა ხორგა, საიდანაც აქციაზე 400 დევნილი აპირებს ჩასვლას. პოლიციელები ამ წუთებშიც აგრძელებენ კარდაკარ სიარულს და მოსახლეობის დაშინებას, _ ამბობს “გურია ნიუსთან” გვასალია.
შეგახსენებთ, დღეს, რომ მთელი სამეგრელოსა და თბილისში, დაგეგმილია პოლიტიკური პარტია “განახლებული საქართველოს” ფართოსმაშტაბიანი აქცია დევნილთა მხარდაჭერის მიზნით.
