საქართველოში ახალი მასშტაბური პროექტი იწყება. ეროს რამაზოტი, რობი უილიამსი, Maroon 5 და ხოსე კარერასი საქართველოში სამთავრობო პროექტის Check in Georgia-ს ფარგლებში ჩამოვლენ.
თანხის ძირითადი ნაწილი 29 მილიონი ლარი მთავრობის სარეზერვო ფონდიდან უნდა გამოიყოს. თუმცა როგორც ხელისუფლების წარმომადგენლები აცხადებენ, ისინი მოლაპარაკებებს აწარმოებენ კერძო პირებთან პროექტის თანადაფინანსების კუთხით.
ეროს რამაზოტის კონცერტი 24 აპრილს თბილისში სპორტის სასახლეშია დაგეგმილი, რობი უილიამსის 27 მაისს დინამო არენაზე, Maroon 5-ის 7 ივნისს ბათუმში, ხოსე კარერასის კი – 18 ივნისს ქუთაისში.
ეროს რამაზოტის კონცერტზე დასასწრებად ბილეთების გაყიდვა 7 აპრილს 12 საათიდან დაიწყება საიტზე tkt.ge და ფილარმონიის სალაროებში. რობი უილიამსის კონცერტის ბილეთები კი 15 აპრილიდან გაიყიდება. ბილეთების მინიმალური ფასი 20 ლარი იქნება.
Сheck in Georgia ეკონომიკისა და კულტურის მინისტრებმა, ასევე ტურიზმის ეროვნული დეპარტამენტის ხელმძღვანელებმა წარადგინეს.
პროექტის ფარგლებში ერთი წლის განმავლობაში 19 ქალაქში 25 ფესტივალი გაიმართება და უფრო მეტი კონცერტია დაგეგმილი. პროექტში ადგილობრივი შოუ-ბიზნესის წარმომადგენლებიც მიიღებენ მონაწილეობას.
ხელისუფლების წარმომადგენელთა განმარტებით, საქართველო ამ პროექტს გამოიყენებს ქვეყნის პოპულარიზაციისა და ტურისტების მოსაზიდად.
