ჩვენი რესპონდენტები დედა-შვილი _ მარიზი და თორნიკე ცარციძეები არიან. ქალბატონი მარიზი მარტოხელა დედაა და ავარიულ სახლში ცხოვრობს. იქ მისულებს მეზობლები შემოგვხვდნენ და გვითხრეს, რომ სახლი, რომელშიც დედა-შვილი ცხოვრობს, რემონტს არ ექვემდებარება და ადგილობრივმა ხელისუფლებამ ამიტომაც არ გადახურა. დედა-შვილი სახურავის ჩამოქცევის შემთხვევაში, უსახლკაროდ დარჩებიან, წასასვლელი კი არსად აქვთ.
_ ამ სახლში რამდენიმე ოჯახი ცხოვრობდა. ყველა წავიდა, ვისაც პატრონი გამოუჩნდა. მე, ჩემი შვილი და ერთი ინვალიდი მეზობელი დავრჩით. არ გვყავს პატრონი, თორემ ასეთ პირობებში ადამიანი ვერ იცხოვრებს. სახურავი საერთოდ არ აქვს სახლს, ჩამოლპა სხვენი, კედლები ინგრევა და არ ვიცი, ხვალ როგორი დილა გამითენდება. შეიძლება, უსახლკაროდ დავრჩე ჩემს შვილთან ერთად. დახმარებას ვითხოვ, საქართველოს პრეზიდენტს ორი წერილი გავუგზავნე, ამის შესახებ იცის პირველმა ლედიმ სანდრა რულოვსმაც. აღარ ვიცი, რა ხერხს მივმართო, რომ დამეხმარონ და ასე ღვთის ანაბარად არ დამტოვოს ხელისუფლებამ. მე ლტოლვილი ვარ საჩხერიდან, მუდმივი სამუშაო არ მაქვს. მადლობა ღმერთს, სოციალური დახმარება აღვიდგინე და მინდა, ცხოვრება ნორმალურ პირობებში გავაგრძელო. კიდევ ერთხელ უმორჩილესად ვთხოვ ადგილობრივ ხელისუფლებას, ყურადღება მომაქციოს, მეშინია, შვილი ნანგრევებში არ მოყვეს, _ გვითხრა ქალბატონმა მარიზიმ.
“გურია ნიუსთან” საუბარში ოზურგეთის მუნიციპალიტეტის გამგებელი გიორგი ტაკიძე ამბობს, რომ ცარციძეების გაჭირვების შესახებ იცის: _ გამგეობა გამოუძებნის თავშესაფარს ამ სახლში მცხოვრებ ორ ოჯახს, მაგრამ არის ერთი პრობლემა _ იქედან წასული სხვა ოჯახებიც ითხოვენ საცხოვრებელს და მუნიციპალიტეტის გამგეობას საამისო თანხები, ამ ეტაპზე, არ გააჩნია. თუმცა, მათ უკვე, 10 წელზე მეტია, ამ სახლში არ უცხოვრიათ. გპირდებით, უახლოეს პერიოდში მოვაგვარებ ამ პრობლემას. სრული პასუხისმგებლობით ვამბობ, რომ ამ სახლში ამჟამად მცხოვრებ ორ ოჯახს _ ნინა ბერულავას და მარიზ ცარციძეს საცხოვრებელს შევუძენთ. ამაზე მე თვითონ ვიზრუნებ, _ გვითხრა ტაკიძემ.
ჩვენს კითხვაზე, თუ როგორ ზრუნავენ უსახლკაროდ დარჩენილი ოჯახების დასახმარებლად და რა თანხა გამოყო გამგეობამ, ტაკიძემ გვიპასუხა, რომ გამოყოფილია 50 000 ლარი, რაც რა თქმა უნდა, ამ პრობლემის მთლიანად მოსაგვარებლად არ არის საკმარისი: _ 80 ოჯახი ითხოვს გადაუდებელ დახმარებას, ანუ ეს ხალხი არის უსახლკარო, მძიმე მდგომარეობაში მყოფი. ბიუჯეტი ჯერ უნდა დამტკიცდეს და შემდეგ თანხები გადანაწილდება. უსახლკაროთა რიცხვი კი 300-ს უახლოვდება, _ ამბობს გიორგი ტაკიძემ.
გამგებელმა საუბრის ბოლოს გვითხრა, რომ ჩვენი გაზეთის საშუალებით მიღებული ინფორმაციის საფუძველზე, ერთ-ერთ ოჯახს დასახმარებლად თანხა გამოუყვეს. საუბარია ოზურგეთის მუნიციპალიტეტის სოფელ მაკვანეთში მცხოვრებ ხათუნა მუჯირის საცხოვრებელი სახლის რემონტზე, რომელიც ხელოსნის გადასახდელ თანხას ითხოვდა ხელისუფლებისგან. როგორც გამგებელმა გვითხრა, მას 500 ლარი გადაურიცხეს.
