ამას თან ახლდა სოფლის მეურნეობის მაშინდელი მინისტრის ბაკურ კვეზერელის ასევე ხმაურიანი ვიზიტი გურიაში, კერძოდ კი ოზურგეთში, სადაც მან ყვითელი სიმინდის ზღაპრული მოსავალი საკმაო თავდაჯერებით იწინასწარმეტყველა, მაგრამ, “გურია ნიუსის” წინასწარმეტყველება უფრო აუხდა და დღეს იგი მინისტრი აღარ არის. აღარც ყვითელ სიმინდსა და მის საუცხოობაზე ისმის აქტიური საუბარი, თუმცა საგაზაფხულო სამუშაოებსა და 30-ლარიან ვაუჩერზე, ხალხი არანაკლებ წუხს.
თუ რა ვითარებაა ახლა ოზურგეთის მუნიციპალიტეტში საგაზაფხულო სამუშაოების ორგანიზებასთან დაკავშირებით, “გურია ნიუსი” მუნიციპალიტეტის გამგეობის ეკონომიკის, ინფრასტრუქტურის და საინვესტიციო გარემოს განვითარების სამსახურის მთავარ სპეციალისტს ომარ ჩხარტიშვილს ესაუბრა.
_ ბატონო ომარ, ვიდრე საგაზაფხულო სამუშაოებზე გკითხავდეთ, იქნებ, გვითხრათ ტექნიკის ლეგალიზაციის შესახებ _ რა მდგომარეობაა ამ მხრივ ჩვენს მუნიციპალიტეტში ხელისუფლების ცნობილი განცხადების შემდეგ?
_ საგაზაფხულო სამუშაოები დაწყებულია, თუმცა, ამას წინ უძღოდა ტექნიკის ლეგალიზაცია. ამ მხრივ ყველაფერი კარგად დასრულდა _ სხვადასხვა მარკის ტრაქტორები, რომლებიც ყოფილი კოლმეურნეობების საკუთრება იყო, კერძო მფლობელობაში გადაეცა ცალკეულ პირებს. სულ 278 ერთეული ტრაქტორი გახდა ლეგალიზებული. ახლა კერძო პირებს შეუძლიათ, იმუშაონ _ მანამდე ეშინოდათ და არ გამოდიოდნენ. ამ ამბავმა მოიცვა მთელი მუნიციპალიტეტი, განსაკუთრებით კი, სოფლები. მოხდა ამ ტექნიკის ჩუქება ხალხზე.
_ საფასურის გარეშე?
_ ეს იყო მინიმალური თანხა _ 83 ლარი, რომელიც ტრაქტორის ნომრის საფასურად გადაიხადეს. ამ პროცესმა ხელი შეუწყო იმას, რომ ხალხმა მოამზადა ტექნიკა და სოფლებში, ფაქტობრივად, ვაკუუმი შეივსო. ეს იყო მოძველებული ტექნიკა, თუმცა, დაიკანონეს და შეაკეთეს.
_ ტელევიზორში ძალიან ბევრი ტრაქტორები ჩანს ხოლმე. რამდენი ერთეული ახალი ტექნიკა შემოვიდა რეგიონში და კონკრეტულად, ოზურგეთში?
_ ცხრა ერთეული შემოვიდა რეგიონში და აქედან ოთხი ერთეული ოზურგეთის მუნიციპალიტეტს გადაეცა. ეს ტრაქტორები ახლახან გახსნილი შპს “მექანიზატორის” მფლობელობაში შევიდა.
_ შპს “მექანიზატორი” უკვე გაიხსნა? აკი, პრეზიდენტს ელოდებოდნენ, მას უნდა გაეხსნა.
_ კი, მაგრამ ტრაქტორებს ხომ ვერ გავაჩერებთ? ხვნა-თესვის სეზონია.
_ სულ რამდენი ამხანაგობა მოქმედებს ახლა ოზურგეთის მუნიციპალიტეტში და მუშაობაში შეფერხებას თუ აქვს ადგილი?
_ ჩვენთან სულ სამი _ შეკვეთილის, ჯუმათის და ვაშნარის ამხანაგობა მუშაობს. თითოეულს თითო ტრაქტორი აქვს.
_ ხალხს ძალიან უჭირს. თითქმის ვერ ნახავთ ოჯახს, რომელსაც სამყოფად ჰქონდეს საკუთარი სახნავი ფართობისთვის საწვავი და თანხა, თუნდაც, კუთვნილ ვაუჩერთან ერთად. ნისიად თუ უხნავენ ფართობებს ადამიანებს ან რაიმე შეღავათი თუ არსებობს?
_ სოფელია და რა თქმა უნდა, თანადგომის პრინციპით ყველა მოქმედებს, ზოგსაც შეღავათით უმუშავებენ მიწას. მხოლოდ შპს “მექანიზატორი” არ ექვემდებარება ასეთ პრინციპს _ იქ ნაღდი ანგარიშსწორებით ხდება ფართობის დახვნა.
_ ბატონო ომარ, სულ რამდენი ჰა ფართობი უნდა დაიხნას ოზურგეთის მუნიციპალიტეტში წელს?
_ სულ 5 900 ჰა სახნავ-სათესი ფართობია ჩვენს მუნიციპალიტეტში, აქედან უკვე დახნულია 1 800 ჰექტარი. დაახლოებით, 1 001 ჰა ფართობზე ბოსტნეული და ბაღჩეული ითესება. 4900 ჰექტარზე კი უნდა დაითესოს სამარცვლე სიმინდი.
_ შარშანდელივით, ყვითელი სიმინდის დაძალებით დათესვას წელსაც ექნება ადგილი?
_ დაძალება არც შარშან იყო(?). აცხადებდნენ, ვისაც სურვილი ჰქონდა, დაეთესა ყვითელი სიმინდი, ზოგს თეთრი უნდოდა. წელს ძირითადად ითესება ქართული ჯიშის სიმინდი, აბაშის თეთრი და ყვითელი, ასევე სხვა ქართული ჯიშის სიმინდიცაა დათესილი.
_ თუ შეგიძლიათ, გვითხრათ, დღეისთვის კონკრეტულ სოფელში რამდენი ჰექტარი ფართობია დათესილი?
_ ასკანაში 52 ჰექტარია დათესილი, ბახვში _ 40 ჰა, ბოხვაურში – 25 ჰა, მელექედურში _ 10 ჰა, მერიაში _ 15 ჰა, მთისპირში _ 11 ჰა, ჯუმათში _ 40 ჰა, სილაურში _ 10 ჰა.
_ ეს ნაკვეთები კერძო პირებისაა?
_ დიახ, ადგილობრივი მოსახლეობის.
_ ჩვენ ამ დღეებში აღნიშნულ სოფლებში სწორედ ხვნა-თესვის საკითხზე შევხვდებით მოსახლეობას. გვაქვს ინფორმაცია, რომ ზოგან სულაც არ დაწყებულა საგაზაფხულო სამუშაოები.
_ თუ ასეა, აწი დაიწყება,. მუშაობას გვალვაც უშლის ხელს _ ძალიან გამომშრალია მიწა.
_ მასივებში ხვნა-თესვაზე რას გვეტყვით? ესაა ლეკიანი, ჩალიანი, მოლიანი…
_ იქ ახლა მოხვნითი სამუშაოები მიმდინარეობს, ჯერ დათესილი არ არის. ფაქტობრივად, ხანგრძლივმა ზამთარმა ხელი შეუშალა ყოველივე ამას. ვფიქრობ, დასათეს ვადებში ჩავეტევით.
_ ამბობენ და მეც ვაკვირდები _ ყოველ წელს უფრო ნაკლები ფართობი ითესება, ვიდრე წინა პერიოდში. დამკვიდრებულია აზრი, რომ ეს ხალხის ეკონომიკური ყოფის უკუსვლას უკავშირდება.
_ ხალხს კი უჭირს, მაგრამ მაინც ახერხებენ რაღაცას. მათი საარსებო წყარო ხომ მაინც სიმინდია? წელს მხოლოდ შავიზღვისპირა ზოლის დაუხნავად დარჩენაზე ვშიშობ, რადგან იქ ცენტრალური მაგისტრალის სამელიორაციო სამუშაოები მიმდინარეობს და ალბათ, შეაფერხებს ხვნა-თესვის პროცესს ან გარკვეული რაოდენობის ფართობი დარჩება დაუთესავი.
_ ბატონო ომარ, ხვნა-თესვის დამთავრების საბოლოო ვადა როდის იწურება თქვენეული განრიგით?
_ ალბათ, მაისის ბოლოს. მაქსიმუმ, 10 ივნისს. გააჩნია ამინდს. ახლა გვალვებია, უკვე ჭირს დახვნა. წვიმა წამალივით სჭირდება ახლა ჩვენს ფართობებს.
საგაზაფხულო სამუშაოებთან დაკავშირებით ჩვენს მკითხველს ვრცელ რეპორტაჟს მალე შევთავაზებთ.
