დღეს აშშ-ის სახელმწიფო დეპარტამენტმა გამოაქვეყნა 2015 წლის ანგარიში ადამიანის უფლებების შესახებ, სადაც საქართველოში არსებულ ვითარებაზეცაა საუბარი.
ანგარიშში მოხვდა ადამიანის უფლებათა ცენტრის შეფასებები და რეკომენდაციები ქალი და არასრულწლოვანი პატიმრების პრობლემების შესახებ.
აშშ-ის სახელმწიფო დეპარტამენტის ანგარიშის თანახმად, "არასამთავრობო ორგანიზაცია "ადამიანის უფლებათა ცენტრმა" 2015 წლის სექტემბერში განაცხადა, რომ ქალი პატიმრები ვერ იღებენ შესაბამისი რაოდენობის ჰიგიენის ნივთებს. არასრულწლოვნების ციხე არ შეესაბამება საერთაშორისო სტანდარტებს ჯანმრთელობის დაცვისა და საცხოვრებელი პირობების მიხედვით. ცენტრის განცხადებით, ქალ და არასრულწლოვან პატიმრებს არა აქვთ სათანადო წვდომა იურიდიულ დახმარებაზე, რომ მოამზადონ სხვადასხვა იურიდიული დოკუმენტი, საჩივრები და ან მიმართონ ვადამდელ გათავისუფლებაზე, ან სხვა მნიშვნელოვან საკითხებზე".
ქალი და არასრულწლოვანი პატიმრების პრობლემების თაობაზე ადამიანის უფლებათა ცენტრის მიერ მომზადებული რეკომენდაციების ნაწილი დღეისათვის გათვალისწინებულია. მაგალითად, მსჯავრდებულთათვის გაუქმდა ხანგრძლივი და ვიდეოპაემნებისათვის დაწესებული გადასახადი, ქალი მსჯავრდებულების სპეციფიკური ჰიგიენური საშუალებებით მომარაგება სახელმწიფომ თავისი ხარჯებით ითავა.
კვლავ არსებობს პრობლემები, რომლებიც ჯერ კიდევ გადაუჭრელია, რაზეც ადამიანის უფლებათა ცენტრი აგრძელებს ადვოკატირებას.
