სახელმწიფო სერვისების განვითარების სააგენტოს ინფორმაციით, ამომრჩეველთა ერთიან სიაში ე.წ. მკვდარი სულები შესაძლოა იყოს. ამის შესახებ სააგენტოს თავმჯდომარის მოადგილემ, მამუკა სამხარაძემ "გურია ნიუსთან" ინტერვიუში განაცხადა.
როგორც სამხარაძემ აღნიშნა, მუდმივად მოწმდება სიაში მსგავსი მონაცემები და სწორდება კიდეც.
"ყოველთვის ვზრუნავთ ამ საკითხზე, ბევრი აქტივობა გვაქვს წლების განმავლობაში ამ მიმართულებით ჩატარებული. დარწმუნებული ვარ, იდენტიფიცირებული გარდაცვლილი საარჩევნო სიაში ბევრი არ არის. იდენტიფიცირებულ გარდაცვლილში ვგულისხმობ, როდესაც ჩვენ შეგვიძლია დავადასტუროთ რომ ეს ადამიანები გარდაცვლილები არიან და მაინც შეიძლება იყვნენ სიაში. დღესდღეობით, გარდაცვალების რეგისტრაცია ხდება სამედიცინო დაწესებულებიდან მიღებული შეტყობინების საფუძველზე, რაც ელექტრონულად იგზავნება.
სამედიცინო პერსონალი ვალდებულია გამოაგზავნოს ცნობა პირის გარდაცვალების შემთხვევაში. პროცესი ელექტრონულია და სიიდან გარდაცვლილის მონაცემის ამოღება ავტომატურად ხდება. რაც შეეხება ძველ ისტორიას, ძალიან ბევრი გვაქვს ამაზე ნამუშევარი და მუდმივად ვმუშაობთ. მაგალითად, წელს გვქონდა აქტივობა, რომ გამოვითხოვეთ სოციალური მომსახურების სააგენტოდან და დევნილთა და განსახლების სამინისტროდან ისეთი ადამიანების მონაცემები, ვისაც ბოლო რამდენიმე თვის განმავლობაში არ აუღია პენსია ან დევნილის დახმარება, რაც მიუთითებდა იმაზე, რომ შეიძლებოდა ეს ადამიანები გარდაცვლილები ყოფილიყვნენ.
დევნილ პირებთან მიმართებაში განსაკუთრებით კრიტიკულად დგას საკითხი, რადგან თუ ადამიანი საქართველოს არაკონტროლირებად ტერიტორიაზე გარდაიცვალა, მაშინ ამ ინფორმაციის მოწოდება ავტომატურ რეჟიმში ვერ ხდება, რადგან იქ არ არის ჩვენი სამედიცინო დაწესებულებები. ჩვენ გავაკეთეთ ე.წ. წრე, სადაც 600 ადამიანამდე იყო. ამ პროექტის ფარგლებში, ყველა ამ ადამიანის მისამართზე მივედით და შევამოწმეთ მათი სტატუსი. დაახლოებით, 210-მდე ადამიანი მართლაც გარდაცვლილი აღმოჩნდა; 131 კი – ცოცხალია.
დანარჩენი მისამართების მოძიება ვერ მოხერხდა, რადგან დაზუსტებული არ იყო, ახლა მიმდინარეობს გარკვეული ნაწილის დაზუსტება. გარდა ამისა, უნდა აღინიშნოს, რომ გარკვეულ პირებთან დაკავშირებით გარდაცვალების ფაქტი ვერ დადასტურდა, რადგან ზოგი მათგანი საზღვარგარეთაა, მაგრამ მეზობლებმა არ იციან გარდაიცვალა თუ არა, ამიტომ ისინი დაუზუსტებელ ინფორმაციაზე ხელს ვერ მოაწერენ. ასევე, შესამოწმებელი დაგვრჩა მხოლოდ მესტიის მუნიციპალიტეტი, რადგან ზამთარში ვახორციელებდით პროექტს და ამ დროს მესტიის შემოწმება შეუძლებელი იყო. მობილური ჯგუფები ახლა მუშაობენ ადგილზე. ასეთი აქტივობა შარშანაც გვქონდა", _ აღნიშნა სამხარაძემ.
მისივე ინფორმაციით, პარლამენტში ინიცირებულია კანონპროექტი მუნიციპალიტეტის წარმომადგენლებისათვის გარდაცვალების ოქმის მოწოდების ვალდებულების შესახებ, რომლის საფუძველზეც მუნიციპალიტეტებს ენიჭებათ უფლებამოსილება, პირის გარდაცვალების შემთხვევაში დაუყოვნებლივ აცნობონ სააგენტოს.
"იურიდიულ კომიტეტში უკვე იყო ამ ცვლილების მეორედ მოსმენა. ნორმა კანონში არსებობდა, თუმცა თვითმმართველობის ახალი კოდექსის მიღებისას ამოიღეს, მაგრამ იუსტიციის სამინისტროს ინიციატივით, ახლა ისევ აბრუნებენ. ნორმა მნიშვნელოვანია, რადგან იმ შემთხვევაში თუ ადამიანი არასამედიცინო დაწესებულებაში გარდაიცვლება, მუნიციპალიტეტმა მოგვაწოდოს ინფორმაცია ოქმის სახით, რაც რეგისტრაციიდან მოხსნის და სიიდან ამოღების საფუძველი გახდება. გარდა ამისა, მუნიციპალიტეტი ვალდებული იქნება, თუ ბოლო 2 წლის განმავლობაში მათ ტერიტორიაზე გარდაიცვალა ვინმე რაც არ არის ცნობილი სააგენტოსთვის, ეს ინფორმაციაც გამოგვიგზავნონ", _ აღნიშნა სამხარაძემ და დასძინა, რომ ძირითადi შემთხვევები, რომლის აღრიცხვაც ვერ ხდება საზღვარგარეთ გარდაცვალების შემთხვევებია.
" ეს ადამიანები შეიძლება ჩამოასვენონ საქართველოში შეიძლება – არა. ამ მიმართულებით, საგარეო საქმეთა სამინისტროსთან ვმუშაობთ და ჩვენს ნორმატიულ აქტში არსებობს საფუძველი, რომ კიდეც რომ არ ვნახოთ გარდაცვალების მოწმობა, თუ ჩვენი საკონსულო წარმომადგენლობისთვის გახდა ცნობილი ადამიანების გარდაცვალების შესახებ, მათ აქვთ ვალდებულება ეს ინფორმაცია მოგვაწოდონ და ჩვენ აღვრიცხავთ გარდაცვლილებად. შესაბამისად, ისინი სიაში ვერ ხვდებიან. რაც შეეხება სამედიცინო დაწესებულებებიდან მიღებულ მონაცემებს, შეგვიძლია ვთქვათ, რომ ეს პროცესი გამართულად მუშაობს და ჩვენ ამ ინფორმაციას 99,9%-ში ვიღებთ", _ განაცხადა სამხარაძემ "გურია ნიუსთან" ინტერვიუში.
რამდენი ამომრჩეველია საქართველოში, ვინ ვერ მიიღებს არჩევნებში მონაწილეობას და რა მიზეზით _ ამ და სხვა საკითხებზე "გურია ნიუსი" სახელმწიფო სერვისების განვითარების სააგენტოს თავმჯდომარის მოადგილესთან ჩაწერილ ინტერვიუს მოგვიანებით შემოგთავაზებთ.
