საპარლამენტო უმცირესობაში შემავალი ფრაქციების მიერ მომზადებული საქართველოს პარლამენტის „ევროკომისიის, ევროპარლამენტის, ევროკავშირის საბჭოს, ევროპული საბჭოს, ევროკავშირის საგარეო ურთიერთობათა სამსახურისადმი“ რეზოლუციის პროექტი, კოლეგებს დღეს პარლამენტის წევრმა, გიორგი ბარამიძემ წარუდგინა.
მომხსენებელმა ევროპასთან ინტეგრაციის პროცესის მნიშვნელობაზე ისაუბრა და ამასთან დაკავშირებით განაცხადა, რომ სხვა საკითხებზე არსებული განსხვავებული შეხედულებებისა და პოზიციების არსებობის შემთხვევაშიც კი, საქართველოს პარლამენტის ერთიანი პოზიციის დაფიქსირება ძალიან მნიშვნელოვანია.
„კარგი იქნება, თუ საქართველოს პარლამენტი შეძლებს და მოახერხებს წინააღმდეგობების გადალახვას და ერთხმად დაუჭერს მხარს ისეთ რეზოლუციას, რომელიც იქნება გამომხატველი ქართველი ხალხის უმრავლესობის ნებისა.“ _ აღნიშნა ბარამიძემ.
რეზოლუციის პროექტის თანახმად, საქართველოს პარლამენტი: გამოთქვამს მადლობას ევროკავშირის წევრი ქვეყნების პარლამენტების მიმართ ასოცირების ხელშეკრულების დროული რატიფიკაციის გამო, და მოუწოდებს დარჩენილ წევრ სახელმწიფოს – ბელგიას – პროცესის დასრულებისკენ ხელშეკრულების ყველა ეკონომიკური და სავაჭრო მუხლების სრულად ამოქმედების ხელშესაწყობად;
მიმართავს ევროკომისიას წარმოადგინოს ოფიციალური წინადადება საქართველოს მოქალაქეებისათვის უვიზო რეჟიმის დაწესებაზე და იმედს გამოთქვამს რომ მას მოჰყვება ევროპარლამენტისა და ევროკავშირის საბჭოს დროული თანხმობა;
მოუწოდებს საქართველოს მთავრობას არ გადადგას იმგვარი ნაბიჯები რომლებმაც შეიძლება საქართველოს დემოკრატიულ განვითარებას და ევრო- ატლანტიკურ ინტეგრაციას საფრთხე შეუქმნას;
მოუწოდებს საქართველოს მთავრობას დროულად და სრულფასოვნად განახორციელოს ევროკავშირთან ასოცირების ხელშეკრულებით გათვალისწინებული რეფორმები;
მოუწოდებს საქართველოს მთავრობას აწარმოოს მიზნობრივი საინფორმაციო კამპანია და მოახდინოს უვიზო მოგზაურობის უფლებებისა და ვალდებულებების შესახებ მოქალაქეთა ინფორმირება.
დეკლარაციის პროექტში ასევე ნათქვამია, რომ ევროკავშირთან ინტეგრაციის პროცესი ყველა პასუხისმგებლობის მქონე პოლიტიკურ ძალას ავალდებულებს იქონიონ კონსენსუსი ისეთ საკითხებზე, როგორიცაა თავისუფალი და სამართლიანი არჩევნები, სიტყვის, მედიის და გამოხატვის თავისუფლება, კერძო საკუთრების ხელშეუხებლობა, უმცირესობათა უფლებების დაცვა, კანონის უზენაესობა, მართლმსაჯულების სისტემის დამოუკიდებლობა, პოლიტიკური დევნისა და ძალადობის დაუშვებლობა,
ფრაქცია“ქართული ოცნების“ თავმჯდომარემ, გიორგი ვოლსკის განცხადებით, იმ შემთხვევაში, თუ პროექტის ინიციატორები გაითვალისწინებენ უმრავლესობის შენიშვნას პროექტის მესამე პუნქტთან დაკავშირებით, სადაც მოუწოდებენ საქართველოს მთავრობას არ გადადგას ნაბიჯები, რომლებმაც შეიძლება საქართველოს დემოკრატიულ განვითარებას და ევრო-ინტეგრაციას საფრთხე შეუქმნას, უმრავლესობა მხარს დაუჭერს რეზოლუციის პროექტს.
მომხსენებელი შემოთავაზებულ წინადადებას არ დაეთანხმა. მისი განცხადებით, მესამე პუნქტი არ შეიცავს მთავრობის პოლიტიკისადმი ამ მიმართულებით მკვეთრად კრიტიკულ შეფასებას და მისი შესწორებას არ თვლიან მიზანშეწონილად.
„პოლიტიკური პარტიების ეს განცხადება, რამდენიმე თვის წინ არის მიღებული და მაშინ მას რესპუბლიკური პარტიაც შეუერთდა. მე ვერაფერს ვხედავ დაუძლეველს იმ ტექსტში, რომელიც დღეს იქნა შემოთავაზებული. ტექსტი, რომელიც დღეს არის მოწოდებული ჩვენთვის არ არის იმდენად პრინციპულად მიუღებელი, რომ ჩვენ მას მხარი ვერ დავუჭიროთ“, – განაცხადა სხდომაზე დავით ბერძენიშვილმა, თუმცა მისივე თქმით, იგი იზიარებს გიორგი ვოლსკის პოზიციასაც რეზოლუციის მესამე პუნქთან დაკავშირებით.
„თუ აქ არ არის პრობლემა და თუ ამას საბაბად არ ვიყენებთ, მე არა მგონია ეს იყოს დაუძლეველი წინააღმდეგობა“– განაცხადა დავით ბერძენიშვილმა და თხოვნით მიმართა პროექტის ინიციატორებს დათანხმდნენ ამ შესწორებაზე.
რეზოლუციის პროექტთან დაკავშირებით პოზიცია გამოხატა უმრავლესობის ლიდერმა ზვიად კვაჭანტირაძემ.
„ჩვენ არ მოგვწონს ჩანაწერი, სადაც უარყოფით კონტექსტში არის მოხსენიებული საქართველოს მთავრობის ძალისხმევა, მაგრამ თუკი საბოლოოდ ჩამოვყალიბდებით იმ რედაქციაზე, რომელზეც გამოსვლებს შორის მოვილაპარაკეთ და საბოლოოდ წარმოგვიდგენენ ისეთ დოკუმენტს, რომელზეც შევთანხმდით, მე ვფიქრობ, რომ ჩვენთვის ძალიან მნიშვნელოვანი იქნება, რომ ის დღეს, საქართველოს პარლამენტში წარმოდგენილი ყველა პოლიტიკური ძალის მიერ იყოს მხარდაჭერილი“, – განაცხადა უმრავლესობის ლიდერმა.
შესვენების შემდეგ, გიორგი ბარამიძემ კონსტრუქციულობისთვის მადლობა გადაუხადა კოლეგებს და შეთანხმების შედეგად შემუშავებული რეზოლუციის პროექტის ტექსტი წარმოადგინა, რომელიც საქართველოს პოლიტიკური სპექტრის მნიშვნელოვანი ნაწილის მიერ 2015 წლის 10 დეკემბრის მიმართვას ეფუძნება და მოუწოდებს მთავრობას გადადგას ნაბიჯები იმისათვის, რომ ხელი შეუწყოს საქართველოს დემოკრატიულ განვითარებას და საფრთხე არ შეექმნას საქართველოს ევროატლანტიკურ ინტეგრაციას.
პარლამენტმა რეზოლუციის პროექტი გამოთქმული და გაზიარებული შენიშვნების გათვალისწინებით 89 ხმით, ერთხმად მიიღო.
