ქალაქ ოზურგეთის მუნიციპალიტეტის საკრებულოს დეპუტატობის არჩევნებისთვის აქტიური ბრძოლაა დაწყებული. მმართველი პარტია ოზურგეთის სახელმწიფო თეატრის სამხატვრო ხელმძღვანელს ვასილ ჩიგოგიძეს წარადგენს , ვასილ ჩიგოგიძესთან დასაპირისპირებლად ქალაქ ოზურგეთში ოპოზიცია გაერთიანდა და ისინი შპს "საქართველოს საერთაშორისო ენერგეტიკული კორპორაციიის" მორიგე ოპერატორს, ქალაქ ქოზურგეთში მცხოვრებ გია კალანდარიშვილს უჭერენ მხარს.
გია კალანდარიშვილის საინიციატივო ჯგუფის წევრები არიან ვანო ხომერიკი, საკრებულოს დამოუკიდებელი დეპუტატი ლევან მგელაძე, საკრებულოს ყოფილი თავმჯდომარე ლადო სურგულაძე, ქართული ენისა და ლიტერატურის პედაგოგი ლელა ქინქლაძე და ვასილ ჩხაიძე.
გაჟღერებულ ინფორმაციას, თითქოს კალანდარიშვილის საინიციატივო ჯგუფის წევრებსა თუ მხარდამჭერებზე ხელისუფლების მხრიდან ზეწოლის ფაქტებს აქვს ადგილი, დეპუტატობის კანდიდატი "გურია ნიუსთან" არ ადასტურებს და აღნიშნავს, რომ ინფორმაციას ასეთი ფაქტების შესახებ არ ფლობს:
"ზეწოლის ფაქტების შეასხებ ინფორმაცია ჩემთვის ცნობილი არ არის, ჯერჯერობით ნორმალურად მიდის ყველაფერი"– ამბობს კალანდარიშვილი. რაც შეეხება იმას, რომ მის მხარდასაჭრად ოპოზიცია გაერთიანდა და მასში მრავლად არიან "ნაციონალური მოძრაობის" ყოფილი წევრები, ის ამბობს, რომ მისთვის მნიშვნელობა არ აქვს იმას, თუ რომელი პიროვნება რომელ პარტიას წარმოადგენდა:
"ჩემთვის მნიშვნელობა არ აქვს, იმას თუ რას წარმოადგენდა აქამდე თითოეული მათგანი, ჩემი საინიციატივო ჯგუფის თითოეული წარმომადგენელი ჩემი მეგობარია, მათ შორის ლელა ქინქლაძეც"– ამბობს კალანდარიშვილი.
"გურია ნიუსი" დაუკავშირდა პედაგოგს ლელა ქინქლაძეს, რომელმაც აღნიშნა, რომ ის მხარს უჭერს მის ბავშვობის მეგობარს:
"ჩემთვის კატეგორიულად, პრინციპულად მიუღებელია გაერთიანებული ოპოზიცია, ჩემს ინტერსში არ შედის არცერთი პარტიის მხარდაჭერა, მით უმეტეს, "ნაციონალების." მე პირადად მხარს ვუჭერ კონკრეტულ პიროვნებას, ჩემი ბავშვობის მეგობარს, მეზობელს გია კალანდარიშვილს."
აპირებს თუ არა პედაგოგი აგიტაცია -პროპაგანდის წარმართვას მისი მხარდაჭერილი კანდიდატის სასარგებლოდ, ლელა ქინქლაძე განმარტავს:
"სკოლაში აგიტაცია – პროპაგანდის ჩატარება იკრძალება, სკოლის გარეთ ეს ჩემთვის არავის არ აუკრძალავს, მე რომ გია კალანდარიშვილს მხარს ვუჭერ, ამაში დასამალი არაფერია."-ამბობს ქინქლაძე.
