“თსპრესს.გე”-ის ჟურნალისტი იზა სალაყაია “გურია ნიუსთან” საუბრისას აცხადებს, რომ როდესაც საჩივარი იქნება მზად, ჩანაწერის სრულ ვერსიას მაშინ წარმოადგენენ.
_ იზა, თქვენს მიერ გავრცელებულ ჩანაწერში არის ასეთი ფრაზა – ნუ მიღებ! რატომ გეუბნებათ ამას ჟურნალისტი?
_ არა, იცით, როგორ იყო? მე გეტყვით… როგორც კი საჩივარი იქნება მზად, ჩვენ სრულ ჩანაწერსაც დავდებთ.
_ ჩანაწერში პირველი არხის ჟურნალისტი ამბობს, რომ თქვენ რამდენჯერმე გაგაფრთხილათ – ნუ მიღებო… რატომ გაფრთხილებდათ?
_ ჯერ ერთი, გაფრთხილებული არ ვიყავი. მეორე, რატომ უნდა გამაფრთხილოს მე სხვა არხის ჟურნალისტმა?! როცა ჟურნალისტები შემთხვევის ადგილზე მუშაობენ, რომელი ჟურნალისტი მოხვდება კადრში, ამის გაკონტროლება რთული მომენტია. მეორე, მსგავსი გაფრთხილება მე არ მიმიღია. თუმცა, გაფრთხილება რომც მიმეღო, ვერც მივიღებდი, რადგან ვმოქმედებ ისე, როგორც ჩემს პროფესიულ საქმიანობას შეშვენის და როგორც მე მევალება. მაგალითისთვის ვამბობ, ნატო ბერულავას რომ ეთქვა, _ ნუ გადამიღებო, მე ვიყავი საჯარო სივრცეში, ვიღებდი საჯარო შეხვედრას. ვალდებული ვარ, დავაფიქსირო ყველაფერი რაც ხდება.
ნატოსკენ კამერა იმ დროს მივმართე, როცა მან ირაკლის დაუსვა კითხვა. მივმართე იმიტომ, რომ სწორად გამეგო, რა კითხვას სვამდა ნატო და სწორად დაფიქსირებულიყო ირაკლის პასუხი. მივმართე კამერა იმ დროს, როცა კითხვას უსვამდა ირაკლის და ეუბნებოდა თუ როგორ უშლიდნენ მას ხელს. ამ შემთხვევაში, მე გამოვიჩინე ერთგვარი კოლეგიალობა, მქონდა კიდეც გადაღებული, ყველა ჟურნალისტის მიმართ იყვნენ ეს ადამიანები აგრესიულები. ესენი იყვნენ ხელისუფლების საქმიანობით კმაყოფილი ადამიანები. თუმცა იყვნენ ისეთებიც, რომლებსაც პირადად ნატოსთან ჰქონდათ კითხვები, იმიტომ, რომ იგი წარმოადგენდა საზოგადოებრივ მაუწყებელს. მე მაინტერესებდა, ამ შემთხვევაში რას უპასუხებდა ირაკლი ალასანია იმ კონკრეტულ ბრალდებაზე, ფაქტსა თუ კითხვაზე, რასაც ნატო მას დაუსვამდა, თუმცა ნატომ ეს არ მაცალა.
_ თქვენ ახსენეთ, რომ შეკრებაზე იყვნენ ხელისუფლების მხრიდან კმაყოფილი ადამიანები, იცნობთ მათ?
_ თქვენ შეგიძლიათ ამ ადამიანებთან მიხვიდეთ და უთხრათ. მე ვამბობ, იყო ნათელი, ვინც იყო ხელისუფლების საქმიანობით კმაყოფილი და კრიტიკულები ოპოზიციური კოალიციის მიმართ. იყვნენ ის ადამიანებიც “ქართული ოცნების” მხარდამჭერები, ვისაც კონკრეტული კითხვა ჰქონდათ საზოგადოებრივი მაუწყებლის ჟურნალისტთან. ზოგადად, როგორც ჩანს, ისინი ეუბნებოდნენ ნატოს, რომ ის იყო მიკერძოებული და თხოვდნენ შეხვედრის ობიექტურად გაშუქებას. ასევე მინდა ვთქვა, რომ პირველი არხის “მოამბეში” ფაქტები დამახინჯებით გაშუქდა. მე ვგულისხმობ იმას, რომ როცა პირველი არხის ჟურნალისტი ამბობდა, “ქართული ოცნების” მხარდამჭერები პირველი არხის ჟურნალისტს ერჩოდნენ თუ ხელს უშლიდნენ საქმიანობაში და კადრში ჩანდა მამაკაცი, რომელიც აბსოლუტურად ყველა კამერის წინ გამოხატავდა მსგავს აგრესიას. კადრში ჩანდა ქალბატონი, რომელიც ნატოს ეჩხუბება და ეუბნებოდა დაეტოვებინა ტერიტორია სხვა ჟურნალისტებთან ერთად. ისინი იყვნენ, ასე ვთქვათ ნაციონალური მოძრაობის გულშემატკივრები. თქვენ შეგიძლიათ ჩახვიდეთ და ნახოთ, ეს ადამიანები. ღიად ამბობენ, რომ საცხოვრებელი ჭერი ხელისუფლებამ მისცა, სხვადასხვა მხარდაჭერას გრძნობენ ხელისუფლებისგან. მთელი ამ ხნის განმავლობაში არ გახსენებია ირაკლი ალასანიას და ეს ადამიანები ირაკლი ალასანიას ეძახდნენ მოღალატეს. ამის კადრები გვაქვს. ჩვენ დავდებთ ჩანაწერს იმ დროს, როცა შევიტანთ სარჩელს სასამართლოში.
_ “გურია ნიუსთან” ინტერვიუში ნატო ბერულავა აცხადებს, რომ თქვენ ადრე გქონდათ მასთან დაპირისპირება. რა დაპირისპირებაზეა საუბარი?
_ ერთი წუთით, ერთი წუთით, სიტყვა დაპირისპირება რას ნიშნავს?! როცა ორი ადამიანი ერთმანეთს უპირისპირდება რაღაც კონკრეტულ ფაქტზე. რაც შეეხება იმას, რაზეც ნატო ბერულავა საუბრობს, ძალიან მინდა სწორად გაიგოს ყველა ადამიანმა, რომ ხშირად სიტყვა “დაპირისპირების” არასწორი ფორმულირება ხდება. მე ნატო ბერულავას არ ვუპირისპირდები, ეს ერთი. მეორე, ნატო ბერულავა რაზეც ყოფილა განაწყენებული თურმე, ახლა გავიგე. ეს ეხებოდა ქალაქ ფოთის მერის ერთ-ერთ პრესკონფერენციას, სადაც საუბარი იყო პორტში თანამშრომლების გათავისუფლებაზე. როდესაც პრესკონფერენციაზე ვსვამდი კითხვას, ხშირად იყო ხოლმე იქ ნატო. საერთოდ, ნებისმიერ დროს, ჩემს კოლეგას ყოველთვის ვაცლი კითხვის დასმას. იყო ერთხელ ისეთი შემთხვევა, დავსვი კითხვა, შემომეჭრა ის ლაპარაკში: _ კარგი იზა, ნუ ლაპარაკობ ასე, იმიტომ, რომ მე ვიცი იქ რა ხდებაო. დეტალებში არ ვიცი რამდენად გაინტერესებთ, მაგრამ საუბარი იყო ხელშეკრულებით ნაკისრ ვალდებულებაზე, რაც ხელისუფლებამ ჩაუდო პორტის მფლობელ კომპანიას. მე ამის დაზუსტებას ვცდილობდი, როცა მერმაც კი ვერ გააჩერა ბერულავა და თქვენ შეგიძლიათ ამის კადრები ნახოთ. ასე ვთქვათ, ნატო გამოვიდა და პირდაპირ თქვა, რომ ეს ადამიანები ყველა გასაშვები იყო, ყველამ მიიღო კომპენსაცია. ამ დროს, ფოთის მერი აცხადებდა, რომ გათავისუფლებული ადამიანების ნაწილს დაუმთავრდა კონტრაქტი, ნაწილი არის საპენსიო ასაკის. რაც იმას ნიშნავდა, რომ იურიდიულად, ეს ადამიანები პორტიდან გასაშვები იყვნენ. ამიტომ, მე გამოვიტანე სათაურად “მერი და პირველი არხის ჟურნალისტი მიიჩნევენ, რომ პორტის თანამშრომლები გასათავისუფლებლები იყვნენ”. როგორც გვიან გავიგე, ამას მოჰყვა მისგან დიდი განაწყენება, თუმცა მე ვერ ვხვდები ამ განაწყენების მიზეზს. აქვე მინდა ვთქვა, რომ მე პრესკონფერენციაზე არასდროს ვსვამ ისეთ კითხვას, რომ მერე შემრცხვეს მისი გამოჩენა და რომელიმე გადაცემაში თუ საინფორმაციო გამოშვებაში საკუთარი თავის ნახვა.
ნებისმიერ დროს შეუძლია ნატო ბერულავას ჩემი კითხვა მსგავსად გადაიღოს. მე ვერ ვხვდები ნატოს განაწყენების მიზეზს.
სიმართლე გითხრათ, გამიკვირდა მისი საქციელი. მე ყოველთვის ვიქცევი ისე, როგორც ჟურნალისტიკა მოითხოვს. რამდენად გამომდის, არ ვიცი…
_ იმის გარდა, რაც თქვენ მოყევით, ფოთის მერთან დაკავშირებულ პრესკონფერენციაზე სხვა დაპირისპირება არ ყოფილა?
_ არაფერი, ვერ ვხვდები მისი განაწყენების მიზეზს.
თქვენთან ინტერვიუში ნატო ამბობს სასაცილო რამეს _ ჩემი ნათქვამი მიაწერეს მერსო. მე ფოთის მერისთვის არ მიმიწერია ნატოს ნათქვამი, პირიქით, დაემთხვა, რომ მერი და ნატო ბერულავა იზიარებდნენ ერთ პოზიციას!
