თბილისის სახელმწიფო უნივერსიტეტის რექტორის მოვალეობის შემსრულებელს ლადო პაპავას ბრალდებებს, თითქოს"სამთავრობო წრეებში სურდათ, რომ უნივერსიტეტის მაღლივი კორპუსის მიმდებარე ტერიტორიაზე აშენებულიყო გაზგასამართი სადგური და სწორედ ამ თემაზე დაიწყო დაპირისპირება უნივერსიტეტის რექტორთან", _ კომპანია "Trade Stone Iberia"_ს წარმომადგენლობა პასუხობს.
როგორც კომპანიის განცხადებაშია აღნიშნული პაპავას განცხადება ცილისწამებაა.
"ბატონ ვლადიმერ პაპავას განცხადება, თითქოს და ხელისუფლებამ უნივერსიტეტზე ზეწოლა განახორციელა, არის სრული სიცრუე და ცილისწამება. პირიქით, სწორედ ბატონმა ვლადიმერ პაპავამ წამოიწყო სრულიად უკანონო კამპანია კერძო კომპანიის წინააღმდეგ, სრულიად კანონიერ მფლობელობაში არსებულ მიწის ნაკვეთთან, ასევე გაზგასამართი სადგურის მშენებლობის სრულიად კანონიერად მიღებულ ნებართვასთან დაკავშირებით.
მოგვიანებითკამპანიაში აქტიურად ჩაერთვნენ სტუდენტებიც. სწორედ სტუდენტების აქტიურობამ, მიუხედავად უზარმაზარი ფინანსური ზიანისა, ჩვენ – ინვესტორი გვაიძულა, დავთანხმებულიყავით ეკონომიკის სამინისტროს თხოვნას, ისევ უნივერსიტეტის ინტერესებიდან გამომდინარე, შეგვეცვალა პროფილი და გაზგასამართი სადგურის ნაცვლად საკუთარ ტერიტორიაზე მრავალფუნქციური კომპლექსი აგვეშენებინა. შესაბამისად, დავთანხმდით რა, პრობლემური საკითხის ასეთი ფორმით მოგვარებას, მიუხედავად არარსებული ფინანსური სახსრებისა, ჩვენ ათჯერ უფრო მეტი ინვესტიციის განხორციელება მოგვიწია. ამასთან, უკვე განხორციელებული დანახარჯები სრულიად ვიზარალეთ, ახალი ნებართვების მისაღებად დაიკარგა კიდევ ერთი წელი და საერთო ჯამში, კიდევ უფრო მეტად დაზარალდა ჩვენი, როგორც ინვესტორის ინტერესები.
შევახსენებთ ბატონ ვ.პაპავას, რომ როგორც თვითონ, ასევე სტუდენტებიც თავად მონაწილეობდნენ იმ ხანგრძლივ მოლაპარაკებებში, რომლის შედეგადაც ჩვენ ასეთი გადაწყვეტილება მივიღეთ. შესაბამისად, ჩვენი კომპანიის გადაწყვეტილება მშენებლობის პროფილის შეცვლასთან დაკავშირებით პირადად ბატონ პაპავასთან და სტუდენტებთან შეთანხმდა. კიდევ ერთხელ ხაზგასმით აღვნიშნავ, რომ ეს გადაწყვეტილება მივიღეთ მხოლოდ და მხოლოდ თბილისის სახელმწიფო უნივერსიტეტის ინტერესებიდან გამომდინარე", _ აღნიშნულია განცხადებაში.
შეგახსენებთ, რომ ლადო პაპავას განცხადებით, დედაქალაქის მერია, ეკონომიკის სამინისტრო და ძლოვანი უწყებები მასზე ზეწოლას ახორციელებდნენ:
"სამთავრობო წრეებში სურდათ, რომ უნივერსიტეტის მაღლივი კორპუსის მიმდებარე ტერიტორიაზე აშენებულიყო გაზგასამართი სადგური და სწორედ ამ თემაზე დაიწყო დაპირისპირება უნივერსიტეტის რექტორთან.
ჩემთვის მოულოდნელი იყო გაზგასამართი სადგურისთვის უფლების მიცემა უნივერსიტეტის სივრცეში და მერე თავგამოდებითი დაცვა, რომ თურმე ეს არანაირ ნომებს არ არღვევს. ამას აკეთებდნენ სამთავრობო სტრუქტურების ცალკეული წარმომადგენლები _ ქალაქის მერია, ეკონომიკის სამინისტრო.
არ მგონია, უშუალოდ მინისტრები ყოფილიყვნენ ჩართული, მაგრამ იქ იყვნენ ადამიანები, რომლებიც ამას ლობირებდნენ. პროცესები უნივერსიტეტში, რაც ბოლო პერიოდში წარიმართა, იყო მართული არა მარტო ძალოვანი უწყებების მხრიდან", _ განაცხადა ვლადიმერ პაპავამ ჟურნალისტებთან საუბრისას.
