"მოვუწოდებ ხელისუფლებას, მიიღოს შესაბამისი კანონმდებლობა სუროგააციის გზით დაბადებული ბავშვების დასაცავად, ასევე მოახდინოს სუროგაციის კლინიკებისა და კლინიკური პრაქტიკის რეგულირება. კანონმდებლობაში ასახოს ბავშვის უფლებების შესახებ, რომელიც ქვეყნიდან გაყავთ", _ ეს განცხადება გაეროს სპეციალურმა მომხსენებელმა მო დე ბოერ-ბუკიკიომ ჟურნალისტებთან შეხვედრისას დღეს გააკეთა.
გაეროს სპეციალურმა მომხსენებელმა მედიის წარმომადგენლებს საქართველოში არსებული სიტუაციის შეფასების შუალედური ანგარიში წარუდგინა და ხელისუფლების მიერ აუცილებლად განსახორციელებელ ცვლილებებეზეც ისაუბრა.
ერთ-ერთი საკითხი, რაზეც მო დე ბოერ-ბუკიკიომ ყურადღება გაამახვილა კომერციული სუროგაციის საკითხი იყო.
"გურია ნიუსის" კითხვაზე იცნობს თუ არა გაეროს წარმომადგენელი საქართველოს მთავარ პროკურატურაში მიმდინარე გამოძიების საქმის დეტალებს, რომელიც სუროგაციის გზით ქვეყნიდან გაყვანილ ჩვილებს ეხება? _ მო დე ბოერ-ბუკიკიომ გვიპასუხა:
"საქართველოში სუროგაციასთან დაკავშირებული პრაქტიკა ჩემს შეშფოთებას იწვევს. შემაშფოთებელია საერთაშორისო სუროგაციის კომერციული პრაქტიკაც. საქართველო არის ერთ-ერთი იმ ქვეყნებს შორის, სადაც კანონმდებლობით არ არის დაცული ამ გზით დაბადებული ბავშვების ინტერესები და შესაბამისად, ირღვევა მათი უფლებები. ასევე იმ ქალების უფლებები, რომელიც სუროგატი დედები ხდებიან. ძირითად შემთხვევებში, კანონი არაფერს ამბობს, ამ გზით დაბადებული ბავშვების მიმართ, რის გამოც ბავშვები ხდებიან ექსპლოატაციის და ძალადობის მსხვერპლი რაც მათ ინტერესებს და უფლებებს ეწინააღმდეგება.
მოქმედი კანონმდებლობით, სუროგაციის დამკვეთ მშობლებს მეტი უფლება ენიჭებათ, ვიდრე სუროგატ დედას ან ბავშვს. საერთოდაც, ბავშვის უფლებებზე კანონმდებლობაში არაფერია ნათქვამი.
მოვუწოდებ ხელისუფლებას, მიიღოს შესაბამისი კანონმდებლობა სუროგააციის გზით დაბადებული ბავშვების დასაცავად, ასევე მოახდინოს სუროგაციის კლინიკებისა და კლინიკური პრაქტიკის რეგულირება. კანონმდებლობაში ასახოს ბავშვის უფლებების შესახებ, რომელიც ქვეყნიდან გაყავთ. მათი მდგომარეობის მონიტორინგი განახორციელოს. მთავრობის მიერ ამის გაკონტროლება ან რეგულაციის დაწესება გულისხმობს ასევე იმ მონაცემების გაკონტროლებასაც, რომლის მიხედვითაც, სუროგაციის გზით დაბადებული ბავშვების მიყიდვა ხდება უცხოელ მოქალაქეებზე, ეს ხელს შეუწყობს საქართველოში სუროგაციის გზით დაბადებული ბავშვების გაყიდვის აკრძალვას", _ აღნიშნა მო დე ბოერ-ბუკიკიომ.
შეგახსენებთ, რომ უკვე რამდენიმე წელია საქართველოს მთავარ პროკურატურაში რეზონანსული ე.წ. ჩვილების საქმის გამოძიება მიმდინარეობს, თუმცა, საზოგადოებისთვის ცნობილი არ არის საქმის გამოძიების დეტალები და არც ის, როდის შეიძლება დასრულდეს ეს გამოძიება.
ვინ მიაწოდა გაეროს სპეციალურ მომხსენებელს ინფორმაცია საქართველოში კომერციული სუროგაციით გამოწვეულ პრობლემაზე, რა კავშირი აქვს ხელისუფლების მაღალჩინოსნებს "ჩვილების საქმის" გამოძიებასთან, ვინ და რატომ აფარებს ხელს დამნაშავეებს, "გურია ნიუსი" ასოციაცია "მომავლის იმედის" ხელმძღვანელის, თამარ ხაჭაპურიძის ინტერვიუს შემოგთავაზებთ.
ამავე თემაზე:
სუროგაციის შედეგად დაბადებული ბავშვების ქვეყნიდან გაყვანაზე კანონი მკაცრდება
ბავშვთა უფლებების დაცვის კუთხით მდგომარეობა შემაშფოთებელია – გაეროს სპეციალური მომხსენებლი
სუროგატი დედის მიერ გაჩენილი ბავშვის მოწმობაში ორივე მშობელი ჩაიწერება
სუროგაციის გზით დაბადებულმა უცხოელების შვილმა, შესაძლოა, საქართველოს მოქალაქეობა მოიპოვოს
