შუალედური არჩევნები ოზურგეთში მაისში გაიმართება. შესაბამისად გააქტიურდნენ სახელისუფლებო და ოპოზიციის წარმომადგენლები. გურიის გუბერნატორის მოადგილე სოსო ერქომაიშვილი სოციალურ ქსელში აღნიშნულთან დაკავშირებით ოფიციალურ განცხადებას აქვეყნებს:
"მოგმართავთ როგორც პარტია "ქართული ოცნება- დემოკრატიული საქართველოს" ერთ-ერთი დამფუძნებელი, "ქართული ოცნების" ოზურგეთის რაიონული ორგანიზაციის ბიუროს წევრი, რიგითი ჯარისკაცი და არა როგორც თანამდებობის პირი, საჯარო მოხელე, გუბერნატორის მოადგილე.
თქვენთვის ალბათ ცნობილია, რომ ოზურგეთში, (ქ.ოზურგეთისა და თემთა მუნიციპალიტეტის) შუალედური არჩევნები გაიმართება, რომელიც ოფიციალურად უკვე დაანონსდა. შესაბამისად, საარჩევნო ტემპერატურა ნელ-ნელა მატულობს და ლოგიკურ დასასრულამდე მიდის. ბუნებრივია, აღნიშნულ არჩევნებში მონაწილეობის მისაღებად სხვა პოლიტიკური ორგანიზაციებიც ემზადებიან. მიმდინარე პროცესი დემოკრატიული ღირებულებების განვითარებისთვის დამახასიათებელი მდგომარეობაა და ჩვენი ხელისუფლების პირობებში სხვაგვარად წარმოუდგენელიც კია. ჩვენ, 2012 წლის დიდი გამარჯვებით, ქვეყანაში რეალური დემოკრატიის განვითარებას დავუდეთ სათავე. წარსულს ჩავაბარეთ ფასადური, მოჩვენებითი დემოკრატია, როგორიც განვლილი ცხრა წლის განმავლობაში არსებობდა.
ჩვენთვის, აღნიშნული პროცესისადმი ხელშეწყობა სასიცოცხლოდ მნიშვნელოვანია, რათა ჯანსაღი საფუძველი დაედოს დემოკრატიული ინსტიტუტების სწორად განვითარებას. სტრატეგია, რომელსაც ჩვენ ამომრჩეველს ვთავაზობთ მაქსიმალურად გამჭვირვალე, გულწრფელი, მომავალზე ორიენტირებული და აბსოლუტურად დემოკრატიულია. ამ განცხადების მიზანმიმართულება არის მხოლოდ ერთი – მოქალაქეებმა გააკეთონ სწორი არჩევანი როგორც კონკრეტული პირის (ღირსეული კანდიდატის), ისე ქვეყნისა და მომავლის განვითარებისთვის.
მოგეხსენებათ, ზემოთაღნიშნული პრინციპების დაცვა არჩევნებში ჩართულ ყველა მხარეს მოეთხოვება. როგორც ხელისუფლებას, ასევე ოპოზიციურ თუ დამოუკიდებელ ორგანიზაციებს.
ზემოთაღნიშნულიდან გამომდინარე და შესრულებული სამუშაოს ანალიზზე დაყრდნობით მთელ რიგ პრობლემებს ვაწყდებით. შეინიშნება "ნაციონალური მოძრაობის" სასარგებლოდ დამახინჯებული მეთოდებით ბრძოლა. რაც, ხშირ შემთხვევაში, სახელისუფლებო გუნდის კანდიდატის წინააღმდეგ გამოიხატება. შეინიშნება "ნაციონალური მოძრაობისთვის" დამახასიათებელი ხელწერა, რომელსაც ჩვენ ვებრძოდით 2012-ში, ვებრძვით დღესაც და შევებრძოლებით მომავალშიც! მაგალითად შეგვიძლია მოვიყვანოთ ერთი, მეტად მნიშვნელოვანი დეტალი. თითქოს, "ქართული ოცნების" კანდიდატი ვინმეს ერთპიროვნული არჩევანია, ასევე ჩვენი გუნდის წევრის გეგმიურად შესრულებული სამუშაოების მითვისება, რომელიც ჩვენი პოლიტიკური გუნდის ერთობისა და პატიოსნობის პრინციპებს არღვევს. ჩვენთვის, ბატონებო, ერთობას, ერთსულოვნებას, გუნდური პრინციპებით მუშაობას, გადამწყვეტი მნიშვნელობა აქვს.
ზემოთაღნიშნულიდან გამომდინარე, მსგავსი წესები, მეთოდი(ები) ჩვენი მხრიდან განიხილება აკრძალულ მეთოდად და შესაბამისად, შეფასებულია არასწორ ქმედებად კონკურენტების მხრიდან. ამომრჩევლის მიზანმიმართულად შეცდომაში შეყვანით, დანარჩენი წევრების დისკრედიტაციით, ჩრდილი ადგება დემოკრატიული პრინციპების დაცვას, რაც ჯანსაღი კონკურენციის დამკვიდრებას უშლის ხელს. დემოკრატიის განვითარება კი ჩვენთვის ესოდენ ფასეული და მნიშვნელოვანია! "_ ამბობს ერქომაიშვილი
