ლანჩხუთის მუნიციპალიუტეტის საკრებულოს თავმჯდომარე გოგი ხელაძე და ბიუროს წევრი რამდენიმე დეპუტატი მიზანშეწონილად მიიჩნევს, რომ გამგეობის სამხედრო აღრიცხვის, გაწვევისა და მობილიზაციის სამსახურის ყოფილ შენობაში სამომავლოდ ახალგაზრდული ცენტრი განთავსდეს. ეს იდეა დეპუტატებმა შენობის ადგილზე დათვალიერების შემდეგ გააჟღერეს.
"საკრებულოს და გამგეობის ერთობლივი ძალისხმევით უნდა განხორციელდეს შენობის რეაბილიტაცია და მასში ახალგაზრდული ცენტრი განთავსდეს. მსგავსი ტიპის ცენტრი მუნიციპალიტეტში არ ფუნქციონირებს და ერთგვარი სიახლე იქნება ახალგაზრდებისთვის.
ცენტრის დაარსების შემთხვევაში, ლანჩხუთელ ახალგაზრდებს საშუალება მიეცემათ დაგეგმონ როგორც საგანმანათლებლო, ასევე კულტურული ღონისძიებები, ჩაატარონ სხვადასხვა სახის გამოფენები, კონფერენციები, წარმოადგინონ საკუთარი იდეები და ინიციატივები ახალგაზრდობისათვის საინტერესო ნებისმიერ აქტუალურ საკითხზე. ცენტრი კი შესაძლებლობების ფარგლებში მხარს დაუჭერს საინტერესო იდეების განხორციელებას." -ამბობენ დეპუტატები.
ამ დროისთვის შენობა, სადაც სამხედრო სამსახური იყო განთავსებული, ეკონომიკის სამინისტროს ბალანსზე ირიცხება და მუნიციპალიტეტის ხელმძღვანელობას მოუწევს მისი ადგილობრივ ბალანსზე გადაცემის საკითხი დასვას.
აღსანიშნავია, რომ დაახლოებით ერთი თვის წინ ანალოგიური მოსაზრება, ოღონდ სხვა შენობასთან მიმართებაში, მუნიციპალიტეტის გამგებელმა ზაზა ურუშაძემაც გამოთქვა. კერძოდ, სოფელ ჩიბათში ხანძრის შედეგად დაზიანებული ადმინისტრაციული შენობის მონახულებისას განაცხადა, რომ სამომავლოდ აქ ახალგაზრდული ცენტრის განთავსება იგეგმება, რომელიც კულტურული ღონისძიებებისთვის თანამედროვე სტანდარტებით მოეწყობა, გაკეთდება სცენა და სამუშაო ოთახები.
