მოიშორა თუ არა ხელისუფლებამ კახა ასკურავა

ჩვენი წყაროს ინფორმაციით, გასულ ორშაბათს, ოზურგეთის ცენტრალური საავადმყოფოს დირექტორმა, დავით ჩანტლაძემ სამსახურიდან წასვლის შესახებ განცხადება დაწერა. განცხადების დაწერამდე კი, ჯანდაცვის მინისტრი სანდრო ურუშაძე ოზურგეთს სტუმრობდა და ექიმებს შეხვდა, სადაც ჩანტლაძეს საყვედურები არ დააკლო. როგორც იქ მყოფმა ექიმებმა გვითხრეს, მინისტრმა ოზურგეთის მთავარი ექიმი დაგროვილი დავალიანებების და ცუდი მენეჯმენტის გამო გააკრიტიკა. როგორც წყარო ამბობს, ურუშაძე ოზურგეთში სიტუაციაში კარგად გარკვეული ჩამოვიდა და მისი გამოსვლა ცხადყოფდა, რომ ჩანტლაძეს სამსახურს დაატოვებინებდნენ. წყაროს თქმით, ურუშაძე ახალდანიშნული იყო, როცა ოზურგეთელი ექიმების წერილი მიიღო. იმ წერილში აღნიშნული იყო, რომ მედიკოსებს თვეების განმავლობაში ხელფასები არ აუღიათ და რამდენიმე სიტყვა ჩანტლაძის არასწორი მმართველობის კურსზეც იყო ნათქვამი. ამ ინფორმაციას პირად საუბრებში მედიკოსებიც ადასტურებენ. ჯანდაცვის სამინისტროს საგანგებო სიტუაციების რეჟიმის და კოორდინირების დეპარტამენტის გურიის წარმომადგენელი, დავით დოლიძე კი ჩვენთან საუბრისას ამბობს, რომ  საავადმყოფოში შექმნილი ცუდი მდგომარეობის შესახებ ჩანტლაძისგან გახდა ცნობილი:
_ ბატონო დავით, რა გახდა ჩანტლაძის გათავისუფლების მიზეზი?
_ არ ვიცი. მიზეზებზე ის ალბათ თავის განცხადებაში ისაუბრებს.
_ როგორც გავიგეთ, ექიმებმა მინისტრს წერილი გაუგზავნეს, სადაც ნათქვამი იყო, რომ ცუდი მენეჯმენტის შედეგად, მათ თვეების განმავლობაში ხელფასები მიუღებელი აქვთ.
_ ექიმებს მინისტრისთვის არ გაუგზავნიათ წერილი. დათომ თავად მოგვწერა, რომ აუღებელი იყო წლების განმავლობაში დაგროვილი დავალიანებები, რომ საავადმყოფოში ძალიან რთული მდგომარეობა იყო და ფინანსური სიტუაციის შესწავლა ითხოვა. წერილი სამინისტროში გადავაგზავნეთ და დაიწყო მოკვლევა.
_ გამოდის, რომ თავად გთხოვათ სამსახურიდან გათავისუფლება…
_ არა. მაგას რომელი ჭკუათმყოფელი ითხოვდა? დათომ მდგომარეობის შესწავლა გვთხოვა.
_ და ამ შესწავლას მისი გადადგომა  მოჰყვა.
_ ეგ უკვე მისი საქმეა. თუმცა, ფაქტია, რომ მდგომარეობა ცუდია. მარტო ჯანდაცვაში კი არა, ქვეყანაშია ცუდი მდგომარეობა.  რა, ჟურნალისტიკაში ყველაფერი კარგადაა?
_ თუ რამე ცუდად არის, ეს მხოლოდ ერთი ადამიანის ბრალი არ არის.
_ გეთანხმებით.
_ მაშინ რატომ გახდა განტევების ვაცი დავით ჩანტლაძე?
_ არ მივიჩნევ, რომ დათო “განტევების ვაცი” გახდა _ მან ეს გადაწყვეტილება თავად მიიღო. კიდევ ერთხელ ვიმეორებ, რომ ჯანდაცვაში სახარბიელო მდგომარეობა ნამდვილად არ არის და ეს მარტო ოზურგეთში არ ხდება, _ აღნიშნა დოლიძემ.
დათო ჩანტლაძემ ამ თემაზე კომენტარის გაკეთება არ ისურვა, თუმცა, დაგვიდასტურა, რომ გადადგომის შესახებ განცხადება დაწერა. მისივე თქმით, “მჯობნის მჯობნი არ ილევა” და მოხარული იქნება, თუ მისი შემცვლელი პრობლემებს მოაგვარებს. როგორც ჩვენი წყარო ამბობს, ჩანტლაძეს გუბერნატორის მოადგილე, კახა ასკურავა შეცვლის. “გურია ნიუსთან საუბრისას” ასკურავა ამბობს, რომ საკუთარი გადაწყვეტილების შესახებ მალე გააკეთებს ოფიციალურ განცხადებას:
_ ჯერ თანამდებობიდან არ ვარ გათავისუფლებული და კომენტარების გაკეთება ნაადრევია.
_ ბატონო კახა, გაჩნდა მოსაზრება, რომ ხელისუფლებამ მოგიშორათ…
_ ასეთი სისულელე მთელი წლის განმავლობაში არ მსმენია (როგორც ჩანს, გუბერნიის ადმინისტრაციაში “სისულელე” ყველაზე საჭირო სიტყვაა. რედ).
_ ეს “სისულელე” ფაქტია, ბატონო კახა _ გუბერნატორის მოადგილეობიდან საავადმყოფოს დირექტორად გადაგიყვანეს.
_ როცა ეს ადგილი შემომთავაზეს, დავთანხმდი, რადგან ეს არის ჩემი პროფილი, _ დასძინა ასკურავამ.
სანამ ჯერ კიდევ გუბერნატორის მოადგილე “საკუთარ პროფილს” მოერგება, მის ადგილზე სხვადასხვა კანდიდატების ვინაობა სახელდება. გურიის გუბერნატორი, ვალერი ჩიტაიშვილი ამბობს, ჯერ საბოლოო გადაწყვეტილება მიღებული არ აქვს და ამის შესახებ ოფიციალური განცხადებები ნაახალწლევს გაკეთდება.