"გურია ნიუსის" მიერ მოპოვებული ინფორმაციით, ცნობილ ოზურგეთელ მხატვარს მარინა უჯმაჯურიძეს სამხატვრო სახელოსნო ექნება. ამ საქმესთან დაკავშირებით ქალაქ ოზურგეთის მუნიციპალიტეტის მერიაში უკვე დაწყებულია პროცედურები.
"მარინა უჯმაჯურიძის შემოქმედება არის შეუფასებელი. დარწმუნებული ვარ მომავალი თაობა მისი ნამუშევრებით იამაყებს." – თქვა ჩვენთან საუბრის დროს ქალაქ ოზურგეთის მერმა ბეგლარ სიორიძემ.
"გუშინ ჩემმა მეგობარმა, მარინა უჯმაჯურიძემ დამირეკა და გამაგებინა, რომ ჩემმა მეგობარმა მას სახელოსნო აჩუქა. მე ამ სიხარულის კრიმანჭულში კარგად ვერ გავიგე, რა მომახარა მარინამ. საქმე ის გახლავთ, რომ ჩემმა მეგობარმა ბეგი სიორიძემ, ოზურგეთის მერმა მხატვარ მარინა უჯმაჯურიძეს ქალაქის ცენტში სახელოსნო გამოუყო. საქმე ეს გახლავთ, მეგობრებო. ოჰ, როგორ გამახარეთ!" – წერს სოციალურ ქსელში მარინა უჯმაჯურიძის მეგობარი, ჟურნალისტი ლალი ბერძენიშვილი.
მარინა უჯმაჯურის პრობლემების შესახებ "გურია ნიუსი" ხშირად წერდა. 2012 წლის 26 თებერვალი, ამონარიდი ერთ-ერთი წერილიდან – ოზურგეთელი მხატვრის, მარინა უჯმაჯურიძის მიერ, სოციალურ ქსელში გავრცელებულ განცხადებებს ბევრი ადამიანი გამოეხმაურა. "გურია ნიუსი" მხატვარს სახლში ესტუმრა. სახლში შეპატიჟებამდე ქალბატონმა მარინამ გვაჩვენა, როგორ აქვს გარეთ ნახატები შეფუთული. მარინა უჯმაჯურიძე: "ჩემს სახლში შემოსული ადამიანი მიხვდება, თუ რამ გადამაწყვეტინა იმ წერილის დაწერა, რომელიც სოციალური ქსელის მეშვეობით გავავრცელე. ჩემთვის უკვე ყველაფერი პრობლემაა. 30 წელია, ერთსა და იმავე მდგომარეობაში ვიმყოფები. ერთი ჩვეულებრივი მოქალაქე ხომ ვარ, სხვა თუ არაფერი? იმ ღირსეულ საქმეს ვაკეთებ, რომელიც ჩემთვის კი არა, თაობებისთვის არის აუცილებელი. მე არ ვტყუი ჩემს საქმესთან, მართალი ვარ. ხომ ნახეთ, ნახატები წყალში მაქვს. არ არის ფინანსური შესაძლებლობა და იმიტომ. ამის შესახებ რამდენიმე წელია, ყოველდღე ვსაუბრობ. ირინა საჯაიამ მითხრა, ახლა შენ გეხმარებით და რა ვქნათ მეტიო. გამოფენა გამიკეთეს, მაგრამ რა შემეცვალა ამით? ჩემი გამოფენა წლებია, მეორე საჯარო სკოლაში კეთდება. რა მერე, ვინ მეხმარება? აბსოლუტურად ყველაფერს მე ვაკეთებ."
"გურია ნიუსის" მიერ მოპოვებული ინფორმაციით, მარინა უჯმაჯურიძის სახელოსნოს განთავსება ჭავჭავაძის და რუსთაველის ქუჩის კვეთაზე მდებარე საცხოვრებელი სახლის მეხუთე სართულზე იგეგმება.
