ქალაქ ოზურგეთის მუნიციპალიტეტის საკრებულომ 26 აპრილს რიგგარშე სხდომა ჩაატარა.
სხდომაზე დეპუტატებმა 6 საკითხი განიხილეს და მხარი დაუჭირეს, მათ შორის ქალაქ ოზურგეთის მუნიციპალიტეტის საკუთრებაში არსებული ქონებიდან 506, 19 კვ. მ ფართის, უზუფრუქტის ფორმით, 2 წლის ვადით ოლიმპიური კომიტეტისთვის გადაცემის თაობაზე იმსჯელეს.
აზრთა სხვადასხვაობა მე 3-ე და მე-4 ე საკითხებმა, რომელიც სსიპ ქალაქ ოზურგეთის მუნიციპალიტეტის საკუთრებაში არსებული ქონების 35 კვ.მ მიწის ნაკვეთის, აღნაგობის უფლებით 30 წლის ვადით გაცემის შესახებ და ასევე ანასეულის 4 ჰექტარი მიწის ნაკვეთის პირდაპირი განკარგვის წესით, იჯარის იჯარის უფლებით. 35 წლიანი ვადით გაცემის შესახებ, ქალაქ ოზურგეთის მუნიციპალიტეტის მერისათვის თანხმობის მიცემის თაობაზე გამოიწვია.
აღნიშნული საკითხის განხილვამ დამოუკიდებელ დეპუტატ ლევან მგელაძესა და ქალაქ ოზურგეთის მერს ბეგლარ სიორიძეს შორის ხმამაღალი საუბარი და დაპირისპირება გამოიწვია.
"ქალაქ ოზურგეთის მუნიციპალიტეტის მერიას განცხადებით მოგვმართა მოქალაქე ნათია ხმელიძემ, რომელმაც განაცხადა, რომ 35. კვ.მ. მიწის ნაკვეთი, მდებარე გმირთა მოდენაზე, აიღოს აღნაგობის უფლებით 35 წლის ვადით, სადაც მოაწყობს და ააშენებს სტომატოლოგიურ კლინიკას, მას წარმოდგენილი აქვს სქემატური ნახაზი, პროექტი და თქვენი თანხმობის შემთხვევაში მერია გასცემს თანხმობას მშენებლობასთან დაკავშირებით"-განაცხადა საკრებულოს სხდომაზე ინფრასტრუქტურისა და ქონების მართვის სამსახურის უფროსმა მერაბ წივწივაძემ.
ლევან მგელაძე დაინტერესდა, აღნიშნული მიწის ნაკვეთი რატომ არ გადიოდა აუქციონზე: "რატომ არ ხდება შეჯიბრობითობა? რატომ დგება ამის აუცილებლობა? იქნებ უკეთეს ვარიანტს გვთავაზობს ვინმე? იქნებ უფრო მეტი გადაიხადოს? ეს არის კანონის მახინჯი ფორმა, რატომ აკლებთ ბიუჯეტს თანხას? ეს არის მავნებლობა ბიუჯეტის მიმართ. მე გეუბნებით, რომ როცა აუდიტი შემოვა, ამ ამბავს სერიოზულად მოიკითხავს. ყველა ნაკვეთის უკან ვიღაცა დგას, ან მერის ახლობელია ან მეგობარი და ასე ხდება ნაკვეთების გაცემა."
საკრებულოს თავმჯდომარემ გელა კობალაძემ დეპუტატს განუმარტა, რომ როდესაც აუქციონზე დგება საკითხი, ვიღაცეები ერთმანეთის ჯიბრზე ფასებს ადებენ და საბოლოოდ აუქციონი იშლება.
"მე აგიხსნით კარგად. ინვენსტორი, რომელიც შემოდის წინადადებით, განცხადებით და ითხოვს, რომ უნდა ნაკვეთი აღნაგობის უფლებით 20, 25 და ან მეტი წლის ვადით და არა აუქციონით, რა ვქნათ უარი ვუთხრათ? რატომ, როცა კანონი გვაძლევს ამის უფლებას"- განუცხადა მგელაძეს ქალაქ ოზურგეთის მერმა.
ამაზე დეპუტატმა უმალვე მიუგო: "უარი იმიტომ უნდა უთხრათ, რომ თქვენ ბიუჯეტის შევსებით უნდა იყოთ დაინტერესებული. აუქციონი უნდა ჩატარდეს."
ბეგლარ სიორიძემ განმარტა, რომ უფრო მეტ მოგებას ნახულობს ბიუჯეტი, აღნაგობისა თუ იჯარის უფლებით გრძელვადიანი შემოსავლით, ვიდრე აუქციონით, რისი დასაბუთებაც მოითხოვა საკრებულოს დეპუტატმა.
"მოდით, საკრებულოს ამ სხდომაზე კანონის შესაბამისად მოვიქცეთ. უყაროთ კენჭი ამ საკითხს და შემდეგ დაგისაბუთებთ, 30 წლის მანძილზე იმდენი შემოდის ბიუჯეტში, აღნაგობის უფლებით გაცემული თანხა, რომ აუქციონში ამდენ თანხას არავინ გადაიხდის. არ არის აუცილებელი რომ ჩვენც თქვენს დათვლილზე ვიაროთ. მე თქვენ დაგიმტკიცებთ, რომ ასე გაცილებით მეტი შემოდის ბიუჯეტში. ნუ შევუშლით ასეთ ადამიანებს ხელს თუ კი ვინმეს რაიმეს გაკეთების სურვილი აქვს. "_ უპასუხა მერმა.
აღნიშნული საკითხის ირგვლივ კამათი რამდენიმე წუთის განმავალობაში გაგრძელდა. მას დეპუტატების უმრავლესობამ მხარი დაუჭირა, რის შემდეგაც დეპუტატმა ლევან მგელაძემ სხდომის დასრულებამდე დატოვა დარბაზი.
