"ისტორია, რომელიც მე გავახმაურე , არ ეხება მხოლოდ იმას, რომ დირექტორმა დაიბარა მამაჩემი და უთხრა, გაათავისუფლებდა სამსახურიდან თუ არ დავანებებდი აქტიურ საქმიანობას თავს. ისტორია ეხება ასევე იმ ფაქტს, რომ სხვადასხვა დროს პოლიცია ურეკავდა ჩვენს ახლობლებს და იძიებდა ინფორმაციებს ჩვენი ოჯახის წევრების შესახებ, ეს ხდებოდა 7 მარტიდან დღემდე." – ამის შესახებ აუდიტორია 115-ს წევრი, ოზურგეთელი ნათია ქარჩილაძე მედიის წარმომადგენელებთან საუბრის დროს აცხადებს.
მისივე ინფორმაციით, ამ ფაქტის შესახებ თავად პრემიერ-მინისტრს გიორგი კვირიკაშვილსაც ესაუბრა.
ნათია ქარჩილაძის მამა ქალაქ ოზურგეთის სპორტის განვითარების ცენტრის თანამშრომელია. ამავე ცენტრის დირექტორი გოჩა კვანტალიანი "გურია ნიუსთან" არ ადასტურებს მის თანამშრომელთან საუბრის მსგავს ფაქტს.
"ეს არის ტყუილი. ზაზასთან არანაირი საუბარი არ მქონია. ზაზა არის ჩემი მეგობარი. არ ვიცი ზაზას და მის შვილს შორის რა საუბარი შედგა, მაგრამ მე მასთან არანაირი საუბარი არ მქონია და აქედან გამომდინარე არ ვადასტურებ ფაქტს, რომელიც ამ ბოლო დროს მედიის საშუალებით ვრცელდება," – გვითხრა გოჩა კვანტალიანმა.
თავად ზაზა ქარჩილაძე ამ ეტაპზე "გურია ნიუსთან" კომენტარს არ აკეთებს.
"თუ საჭირო იქნება, მე თვითონ დაგიკავშირდებით." – გვითხრა ზაზა ქარჩილაძემ.
