ჟურნალისტი კოკა ყანდიაშვილი "ნაციონალურ მოძრაობას" ქვეყნისთვის საზიანო, მიზანმიმართულ ქმედებებში ადანაშაულებს.
ის ამტკიცებს, რომ ევროპის სახალხო პარტია საქართველოსა და ევროკავშირის სახელმწიფოებს შორის უვიზო მიმოსვლის წინააღმდეგია და ამაში "ნაციონალური მოძრაობის" დიდი წვლილიცაა.
"როგორც იცით, გუშინ 26 აპრილს, მხოლოდ ევროპის სახალხო პარტია წავიდა საქართველოს თითოეული მოქალაქის, 25 წლიანი ბრძოლითა და წვალებით მოპოვებული შანსის წინააღმდეგ – ევროპაში უვიზო მიმოსვლაზე.
ერთიანი ნაციონალური მოძრაობა, ევროპის სახალხო პარტიის წევრია და ყველაფერი გააკეთა იმისათვის, რომ ვიწრო პარტიული ინტერესებისთვის შეეწირა ჩვენი თაობის ეს მნიშვნელოვანი მონაპოვარი.
მადლობა ღმერთს, ევროპის მეგობარ პარტიებსა და მთავრობებს, რომ სამართლამა პური ჭამა. გუშინ ევროპამ ჩვენ მიზანსწრაფვა დაგვიფასა – ხმათა უმრავლესობით საქართველომ მიიღო დადებითი პასუხი!
ნაციონალური მოძრაობის ლიდერები – ევროპის ყველა დედაქალაქში ამტკიცებდნენ, რომ ქართველებმა უვიზოდ ევროპაში არ უნდა იარონო. ევროპარლამენტის თითოეულ დეპუტატთან ალაგებდნენ ყალბ მტკიცებულებებს – ქართველები ბნელი, ტყიური, კორუმპირებული, სტალინის მოტრფიალე, კომუნისტური აზროვნებისა და რუსეთუმე ერია, რომლის ევროპასთან ასოცირება არ უნდა მოხდესო. უკვე საქართველოში კი, საკუთარი ტელე-მედია საშუალებებით, ხან ხეს დასდევდნენ, ხან ბოტანიკურს და ხანაც პანამას. ნაციონალები – არც ისეთ სპექტაკლებს ერიდებიან, როგორიც წუხელ და დღეს დილიდან მერიის შენობასთან "საპროტესტო" აქციებია – აბა სხვა როგორ და რითი უნდა გადაფარონ ეს ღალატი, ეს საძაგლობა, ეს უზნეობა?!!!
დიახ, საქართველოს ევროპული არჩევანი – დემოკრატია, ევროპული პრინციპები და ფასეულობებია, ჩვენ დავბრუნდებით ერთიან ევროპულ ოჯახში! თქვენი არჩევანი კი ყოველთვის – საქართველოთი ვაჭრობა იყო! ხან ლიბერალურ ფასეულობებში შეფუთული და ხანაც პუტინისთვის სინით მირთმეული ჩვენი მიწების 20%.
ილია წერდა – "თუ უნებლიედ გადმოგტყორცნა მუხთალმა ბედმაო"; – ვაი საქართველოვ, მუხთალთა ერთიანი ნაციონალური მოძრაობის ლახვარი რომ მოგხვდა ზურგში.
ამიერიდან – ყველამ, ყველგან და ყოველთვის, პირადი შეხვედრებისას, ტელეეთერებში, საგაზეთო თუ რადიო ინტერვიუებისას, ქუჩაში, მეზობლად, ტაქსში, მაღაზიაში, ზღვაზე, ცაში და ქელეხში, – ნაციონალებს უნდა დავუსვათ მხოლოდ ერთი კითხვა: – ასე რამ შეგაძულათ საქართველო და ქართველები ?!"- წერს ყანდიაშვილი.
