გურიის გუბერნატორის მოადგილე, სოსო ერქომაიშვილი, ფეისბუქში, პოლიტიკური პოსტების წერას განაგრძობს. ამჯერად, პოლიტიკურ რჩევებს ქალაქ ოზურგეთის საკრებულოს დეპუტატს აძლევს და პაატა ბურჭულაძის ფონდის წევრებს აკრიტიკებს:
"ბატონებო, რაც უფრო ახლოვდება შუალედური არჩევნები, მით უფრო ვხვდებით ახალ-ახალ ურთიერთგამომრიცხავ განცხადებებს, ბინძურ მეთოდებსა და დამახინჯებულ მიდგომებს. არ შეიძლება ყურადღების მიღმა დავტოვოთ პოლიტიკურ მოედანზე ახალი სუბიექტის გამოჩენა. გარდა არსებული პოლიტიკური ორგანიზაციებისა, პოლიტიკურ სივრცეში შემოვიდა ბატონი პაატა ბურჭულაძის ფონდი.
თქვენ კარგად მოგეხსენებათ თუ რა გავლენები გააჩნდა სხვადასხვა სფეროს წარმომადგენლებზე „ნაციონალური მოძრაობის“ პოლიტიკურ გუნდს. ისიც ვიცით თუ როგორ იყენებდა სათავისო პიარისთვის გამოჩენილი და პატივსაცემი წარმომადგენლების სახელს, ხშირ შემთხვევაში, დაუკითხავადაც.
ალბათ, საზოგადოებას ისიც სმენია, რომ ოდესის გუბერნატორს თუ რა ურთიერთობები გააჩნია ჩვენთვის საპატივცემულო ხელოვანთან.
საზოგადოებას, ალბათ, ისიც კარგად სმენია, თუ როგორ ცდილობს ყველა შესაძლო ვირეშმაკობებით ნაციონალური მოძრაობა ხელისუფლებაში დაბრუნებას.
მინდა შევეხო დემოკრატიული ჩართულობის ცენტრში ჩატარებულ ბრიფინგს. ბატონი ლევან მგელაძე, რომელიც ბრძანდება პაატა ბურჭულაძის ქ.ოზურგეთის ოფისის ხელმძღვანელი, ნაციონალური მოძრაობის დროს 2011-12 წლებში მუშაობდა ერთ-ერთ აიპში სამსახურის უფროსად.
ჩვენი ხელისუფლებაში მოსვლის შემდეგ ქალაქის რწმუნებულად დაინიშნა. ბატონო ლევან ამ ყველაფრის შემდეგ დაფიქრება გმართებს!
ბატონი ვლადიმერ სურგულაძე 2006-10 წლებში მუშაობდა „ნაციონალური მოძრაობის“ საკრებულოს თავჯდომარედ.
ბატონი ალექსანდრე მამეიშვილი რომელიც "პაატა ბურჭულაძის რეგიონალური ფონდის ხელმძღვანელია, 2010-13 წლებში „ნაციონალური მოძრაობის“ საკრებულოს ბოლო თავჯდომარე ბრძანდებოდა, ნაცების ბოლო მოჰიკანი.
ეს რა, არ ადასტურებს იმას რომ „ნაციონალური მოძრაობის“ წევრებით და მაშინ დასაქმებული ადამიანებით ჰყავს ბატონ გია კალანდარიშვილს საარჩევნო შტაბი დაკომპლექტებული?
ფიცი მწამს ბოლო მაკვირვებს! სად არის აქ დამოუკიდებელი კანდიდატის ფორმულა, მიჭირს დანახვა. ასე, რომ ბატონებო, ბინძური თამაში არ უნდა წამოგეწყოთ!
და ბოლოს მივმართავ ამომრჩეველს _ ჩვენ ამომრჩევლის მაღალი პოლიტიკური აზროვნების იმედი, თქვენი შორსმჭვრეტელობისა და სწორი გადაწყვეტილებების იმედი გვაქვს.
ისევე, როგორც ეს მოხდა 2012 წელს, როდესაც გურიამ პირველი, მაღალი პოლიტიკური აქტივობა გამოავლინა და რომელსაც იმ დესტრუქციული ძალის საწინააღმდეგოდ დანარჩენ პოლიტიკურ შეკრებებს ადარებდნენ.
მე მჯერა თქვენი შორსმჭვრეტელობის." _ წერს ერქომაიშვილი.
აღსანიშნავია, რომ პოლიტიკურ სტატუსებს ერქომაიშვილი, როგორც გუბერნატორის მოადგილე ისე წერს, რაც ოპოზიციური პარტიის წარმომადგენლებს სახელისუფლებო რესურსის გამოყენებად მიაჩნიათ.
შეგახსენებთ, რომ ოზურგეთში, 22 მაისს შუალედური არჩევნები უნდა გაიმართოს და პოლიტიკურმა პარტიებმა წინასაარჩევნო კამპანია უკვე დაიწყეს.
