ამ ფაქტის შესახებ ჩვენ მაშინვე გვაცნობეს, 21 მაისს კი “გურია ნიუსის” ოზურგეთის განყოფილებაში მოქალაქე მოვიდა და სხვა მსგავსი ფაქტის შესახებ მოგვითხრო. მან ღიად ვინაობის გამჟღავნება არ ისურვა, იმ მიზეზით, რომ ვმუშაობ, 80 ლარი მაქვს ხელფასი და იმასაც წამართმევენო. მისი თქმით, შპს “ლიხაურის მეურნეობის” ტერიტორიაზე ნაძვების ჭრა არ დასრულებულა, პირიქით _ ხეები ყოველდღე უმოწყალოდ იჩეხება. ფაქტს, რომ ნაძვების ჭრა კვლავ გრძელდება, არ ადასტურებენ შპს “ლიხაურის მეურნეობის” დირექტორი დავით ლომჯარია და მთავარი სპეციალისტი დემურ კარტოზია. თუმცა, ჩვენ აღნიშნულ ტერიტორიაზე უკვე მეორედ გადავიღეთ გაჩეხილი ნაძვების ამსახველი ფოტოები.
_ მთელი სოფელი ფეხზე დგას და შეწუხებულია. ოზურგეთს პატრონი არ ჰყავს? როგორ ანებებს ამას მთავრობა? მაგრამ ჩნდება დიდი ეჭვი, რომ ყველა “შეკრულია”. თქვენ ხომ გეწერათ ნაძვების მოჭრის შესახებ _ რა შედეგი მოჰყვა? ახლა სხვაგან მოიჭრა 60 ძირი ნაძვი. როგორ შეიძლება ასე გაანადგურო ბუნება? შენი დარგულია? შენი გაშენებულია? ეს ხეები ხალხმა დარგო. ნება დაგვრთესო, რომ ამბობენ, ვინ დართო ნება? არავის არაფერი შერჩება _ ხომ გახსოვთ ბახმაროს ამბავი? ჯერ გააჩეხინეს ნაძვები და მერე ყველას მიუზღეს თავისი. იქნებ, დაგვეხმაროთ ჟურნალისტები! _ გვითხრა ოზურგეთის მუნიციპალიტეტის სოფელ ლიხაურში მცხოვრებმა ერთ-ერთმა მოქალაქემ.
შპს “ლიხაურის მეურნეობის” მთავარ სპეციალისტი დემურ კარტოზია “გურია ნიუსთან” საუბარში ამბობს, რომ ნაძვების ჭრა კანონის სრული დაცვით გახორციელდა: _ ჩვენ არაფერი აღარ მოგვიჭრია, დავამთავრეთ ჭრები. მიმართეთ დირექტორს დავით ლომჯარიას. მე კატეგორიულად ამიკრძალეს საუბარი. რასაც გეუბნებით, მაინც არ გჯერათ. გითხარით, რომ კანონიერად მოიჭრა.
ამ სატელეფონო საუბრის შემდეგ, ჩვენ შპს “ლიხაურის მეურნეობის” დირექტორს დავით ლომჯარიას დავუკავშირდით, რომელიც აღნიშნავს, რომ ფართობი შპს “ლიხაურის მეურნეობის” საკუთრებაა და აქედან გამომდინარე, სრული უფლება ჰქონდათ ხეების მოჭრა განეხორციელებინათ.
_ თუ გსურთ, ნახოთ, კანონიერია თუ არა ეს ჭრები, შეგიძლიათ, საჯარო რეესტრიდან ამოიღოთ ინფორმაცია. ჯერ აქედან უნდა დაგეწყოთ _ საჯარო რეესტრში არსებობს იმის დამადასტურებელი საბუთი, რამდენად კანონიერად ეკუთვნის ეს ფართობი შპს “ლიხაურის მეურნეობის” ტერიტორიას. რატომ გამოიწვია ამ ყველაფერმა ასეთი ხმაური? ეს მიწა ნაყიდი აქვს შპს “ლიხაურის მეურნეობას” 1999 წელს დადებული ხელშეკრულების საფუძველზე. ეს არ არის ქარსაფარი ზოლი _ როცა ვიყიდეთ, ქალაქის გამგეობას ჩვენთვის ქარსაფარი ზოლი მიმაგრებაში არ გადმოუცია, მიყიდა ყველაფერი(?). ქარსაფარი ზოლი არის მუნიციპალიტეტის საკუთრება. მაჩვენეთ ერთი დადგენილებაც კი, მუნიციპალიტეტის გამგეობას როდის აქვს ჩვენთვის გადმოცემული ქარსაფარი ზოლი.
_ გვაჩვენეთ ბუნებრივი რესურსების სააგენტოს გურიის სამსახურის მიერ გაცემული ნებართვა, რომლის საფუძველზეც გქონდათ ნაძვების მოჭრის და რეალიზაციის უფლება.
_ ეს სატყეო სამმართველოს საქმეა.
_ თქვენ არ გაქვთ?
_ მე მქონდა, მაგრამ გადავეცი სატყეოს. კიდევ ერთხელ გაგიმეორებთ, რომ ეს ფართობი არის ჩვენი.
სსიპ ბუნებრივი რესურსების სააგენტოს გურიის სამმართველოს უფროსი ნიკო ნოზაძე “გურია ნიუსთან” საუბარში აცხადებს, რომ შპს “ლიხაურის მეურნეობის” ტერიტორიაზე ნაძვების გაჩეხვა კანონიერად მოხდა.
_ ბატონო ნიკო, რამდენად კანონიერად მოხდა თქვენი სამსახურის მიერ შპს “ლიხაურის მეურნეობის” ტერიტორიაზე მოჭრილი ნაძვების, წიწვოვანი ხეების ფირნიშით მარკირება, უსწრებდა თუ არა მარკირებას იმ საბუთების შემოწმება, რომელიც ადასტურებდა, რომ ქარსაფარი ზოლი შპს “ლიხაურის მეურნეობის” საკუთრება იყო?
_ ლიხაურს რაც შეეხება, ეგ ტერიტორია საჯარო რეესტრში აქვთ მათ დარეგისტრირებული, ანუ მათი საკუთრებაა. ჩვენთან რომ შემოდის განცხადება, რაც შეეხება კერძო საკუთრებას, ამ შემთხვევაში თავდაპირველად შემოდის რწმუნებულის ცნობა, რომ ის ნამდვილად არის მისი საკუთრება, მისი საკარმიდამო, აქვთ საჯარო რეესტრიდან ამონაწერი, მიღება-ჩაბარების აქტი. მე რწმუნებულის ცნობას ვეყრდნობი, ჩემს თანამშრომელს ვუშვებ, ვაფირნიშებ და ვემსახურები, სხვა შემთხვევაში, მე მაგას არ ვაკეთებ.
_ ეს ტერიტორია იყო კერძო საკუთრება, მაგრამ რამდენად არის კანონიერი ქარსაფარ ზოლში ზრდასრული ხეების მოჭრა?
_ მაგას გეუბნებით. ასწლოვანი თუ არის, ისედაც ამორტიზირებული იქნება და მოჭრას ექვემდებარება(?!). როცა კერძო საკუთრებაშია ეს ხეები, ვერ ვეტყვი, არ მოჭრა,-მეთქი, რადგან მოქალაქის საკუთრებაა და გადაწყვეტილებასაც თვითონ იღებს. მე არ მგონია, ქარსაფარი ზოლი რომ იყოს. მოდით, რა, თქვენ თვითონ გაიგეთ _ მე ხომ არ დავიწყებ კითხვას საჯარო რეესტრში, არის თუ არა მისი? მე ვეყრდნობი იმ ცნობებს, რომლებიც მაქვს, გამოძიებას არ ვიწყებ. თქვენ უნდა გაიგოთ, არის თუ არა კერძო საკუთრება, _ გვითხრა ნოზაძემ.
ხეების მოჭრის ანალოგიური ფაქტი კერძო საკუთრებაში, კერძოდ ბიზნესმენ ჭყონიას მიერ შესყიდულ ტერიტორიაზე “გურია ნიუსმა” ქობულეთშიც დააფიქსირა და ამასთან დაკავშირებით კომენტარის გაკეთება ენერგეტიკისა და ბუნებრივი რესურსების დაცვის სამინისტროსაც თხოვა, სადაც მსგავს ფაქტებს ასეთი განმარტება გაუკეთეს:
“ხეების მოჭრის ნებართვის გაცემის რეგულირება ენერგეტიკისა და ბუნებრივი რესურსების სამინისტროს კომპეტენციას სცილდება. ზოგადად, მშენებლობის პროექტში ხეების მოჭრა გათვალისწინებულია. დღეს მოქმედი კანონმდებლობის შესაბამისად, თბილისის გარდა, კერძო საკუთრებაში არსებული მიწის ნაკვეთებზე ხის მოჭრა ნებართვას არ საჭიროებს, ანუ მესაკუთრეს შეუძლია ხეების მოჭრის გადაწყვეტილება თავად მიიღოს, ხოლო მისის შემდგომი ტრანსპორტირება და გადამუშავება ენერგეტიკისა და ბუნებრივი რესურსების მინისტრის 2011 წლის 24 ივნისის #96 ბრძანების საფუძველზე რეგულირდება”.
