ბაჩი (ელიზბარ) სადრაძე ახლა 18 წლისაა, აბიტურიენტია და ეროვნული გამოცდების ჩასაბარებლად ემზადება. თავისი ასაკისთვის უჩვეულო მონაპოვარით შეუძლია იამაყოს, თუმცა რიდით საუბარი მისი ჩვეული მანერაა.
ოზურგეთის მუნიციპალიტეტის სოფელ შემოქმედში დაიბადა. მერე მოხდა ისე, რომ თბილისის 126-ე სკოლაში სწავლობდა და ოზურგეთის პირველ საჯარო სკოლაში მეექვსე კლასში გადმოვიდა. სწავლის ტრფიალი დაწყებითი კლასებიდანვე იყო, თუმცა არაერთი კლასგარეშე წარმატებაც ბევრჯერ იგემა, განსაკუთრებით, თავი ისახელა ინტელექტუალურ თამაშში “რა, სად, როდის” და შემეცნებით პროექტში “ეტალონი”. გასულ წელს ექსტერნად დაამთავრა ოზურგეთის პირველი საჯარო სკოლა. ეს ნაბიჯი იმიტომ გადადგა, რომ ახლა, მოახლოებული ეროვნული გამოცდების ჟამს 12 გამოცდის ნაცვლად, (რვა საატესტატო და ოთხი ეროვნული). მხოლოდ ოთხ გამოცდაზე ეზრუნა.
ჩვენი მორიდებული რესპოდენტი ცოტა ხნის წინ მაკედონიაშიც იყო, როგორც გურიის ინტელექტკლუბის ლიდერი. ამ და კიდევ არაერთ წარმატებაზე და სამომავლო ფიქრებსა თუ ოცნებებზე თვითონ მოგვიყვება. სხვათა შორის, ღიად გაგვიმხილა, რომ შეყვარებულია, თუმცა დაოჯახებაზე მხოლოდ სტუდენტობის შემდეგ იფიქრებს და სჯერა, რომ ამ ზეამაღლებულ გრძნობაშიც გამარჯვებული იქნება.
_ ბაჩი, ძალიან წარმატებული ხარ სწავლაში. როდის მიაღწიე პირველ ინტელექტუალურ გამარჯვებას, რამაც სამომავლო სტიმული მოგცა?
_ მეცხრე კლასში ვიყავი, როცა მონაწილეობა მივიღე ინტელექტუალურ თამაშში “რა, სად, როდის”, აქ გამოვედით ჩვენი სკოლის სახელით. ოზურგეთის მუნიციპალიტეტში ჩაატარა არასამთავრობო ორგანიზაციამ. ვიყავი გუნდის კაპიტანი. სწორედ ამ გამარჯვების შემდეგ ამირჩიეს გურიის ინტელექტკლუბის ლიდერად. ეს იყო 2010 წელს.
_ როგორც ვიცით, გასულ წელს შემეცნებით პროექტ “ეტალონში” მონაწილეობდი გურიიდან.
_ დიახ, 2011 წელს “ეტალონში” მივიღე მონაწილეობა. ნახევარფინალს მხოლოდ იმიტომ გამოვეთიშე, რომ კონკურენტმა დროში მაჯობა.
_ მაკედონიაში რატომ გაემგზავრეთ?
_ არასამთავრობო ორგანიზაციამ გამგზავნა პიარის შემსწავლელ კურსებზე, გვასწავლიდნენ, როგორ უნდა გავუწიოთ რეკლამა ამა თუ იმ ორგანიზაციას და ასე შემდეგ.
_ ექსტერნის წესით როგორ და რატომ ჩააბარეთ? ასე თუ ისე, კლასს გამოეთიშეთ და შენს ასაკში ზოგჯერ ეს მტკივნეულია.
_ მეთერთმეტე კლასში ვიყავი, როცა გადავწყვიტე, დამემთავრებინა 12 კლასი. გადაწყვეტილების შესახებ ვაცნობე დირექტორს. წინასწარ ჩავაბარე 12კლასის პროგრამა და შემდეგ გავედი საატესტატო გამოცდებზე. ამით მოვიგე დრო და ახლა ვემზადები ეროვნული გამოცდებისთვის ოთხ საგანში.
_ პარალელურად რას საქმიანობ? შენ ისე არ გაჩერდები.
_ ინტელექტუალურ თამაშში ვმონაწილეობ, თბილისის ჩემპიონატში. მასში ყველა სტუდენტს შეუძლია მონაწილეობის მიღება, სასკოლო ასაკის მხოლოდ ჩვენ ვართ. იმიტომ მოგვცეს უფლება, რომ უნივერსიტეტი და სხვა უმაღლესი დაწესებულება არ არის ოზურგეთში. აქედან გამომდინარე, სტუდენტი ვერ წავიდოდ ააქედან და დაგვრთეს ნება.
_ რა ჰქვია თქვენს გუნდს და თამაშის რა ეტაპზე ხართ ახლა?
_ გუნდს “ანდრომედე” ჰქვია. ბერძნული მითოლოგიის ქალღმერთის და ერთ-ერთი გალაქტიკის სახელიცაა. ამ ჩანაფიქრს აქვს სიმბოლური დატვირთვა, რომ ჩვენ ჩვენი გალაქტიკა გვაქვს. ქალღმერთი კი ღვთაებაა და ესეც სიმბოლურია. ახლა ეს შეჯიბრი დასასრულს უახლოვდება. ხუთი თამაში ჩავატარეთ და 39 გუნდს შორის ათეულთან ახლოს ვართ, მე-11 ადგილზე. ვგეგმავთ და დიდი სურვილი გვაქვს, რომ ზემოთ ლიგაში გადავინაცვლოთ. საბოლოოდ ვინც გაიმარჯვებს, ის ხდება თბილისის ჩემპიონი და გადაეცემა როგორც საჩუქარი, ისე ჰონორარი. ეს შეჯიბრი მაისის ბოლოს დასრულდება. ნამდვილად ვფიქრობთ მხოლოდ გამარჯვებაზე.
_ ბაჩი, ოზურგეთში ყველა იცნობდა შენს შესანიშნავ ბებია-ბაბუას, რომლებიც ისე ნაადრევად წავიდნენ ამ ქვეყნიდან, მამაშენიც ბავშვობის ასაკში იყო. ძალიან გამსგავსებენ და ეამაყები ბევრს.
_ მუდამ ვეცდები, ვიყო ღირსეული მათ ნაკვალევზე გასავლელად.
_ რომელ პროფესიაზე ოცნებობ?
_ სოციოლოგია და პოლიტოლოგია მიტაცებს, ვნახოთ.
_ რამდენი და და ძმა გყავს?
_ ორი და და ერთი ძმა, ჩემზე უმცროსებია.
_ კარგად სწავლობენ? შენ მათი გზამკვლევი იქნები, უეჭველია. . .
_ კი სწავლობენ და რა თქმა უნდა, უფროსი ძმა უმცროსების მესაჭეა.
_ ბაჩი, შეყვარებული თუ ხარ?
_ კი ვარ, ოღონდ დაოჯახებას უმაღლესი განათლების შემდეგ ვფიქრობ.
_ სად შეიძლება ვიხილოთ უმაღლესი განათლების მქონე ბაჩი სადრაძე. მეცნიერებაში, პოლიტიკაში თუ კიდევ სადმე სხვაგან?
_ გამორიცხული არაფერია, თუმცა ჯერ ამაზე კონკრეტულად არ ვფიქრობ, რადგან იქამდე ბევრი რამ მაქვს გასაკეთებელი.
