როგორც უკვე ვწერდით, გურიასა და აჭარაში მუნიციპალური განვითარების ფონდმა მშენებლობასთან დაკავშირებული მომსახურებების შესყიდვის შესახებ ელექტრონული ტენდერი აუქციონის გარეშე გამოაცხადა.
როგორც სატენდერო დოკუმენტაციიდან ირკვევა, სამშენებლო სამუშაოების ჯამური ღირებულება: 106 000,000 ლარია და 55 ობიექტს მოიცავს.
აღნიშნულთან დაკავშირებით “გურია ნიუსმა” მუნიციპალურ განვითარების ფონდს წერილობით მიმართა.
“გთხოვთ მომაწოდოთ ინფორმაცია, 55 ობიექტიდან, რამდენი მდებარეობს გურიაში და კონკრეტულად სად ( მაგალითად, რამდენი ობიექტია ჩოხატაურის მუნიციპალიტეტში, ოზურგეთის მუნიციპალიტეტში, ლანჩხუთის მუნიციპალიტეტში).
გარდა ამისა, შესყიდვისა სავარაუდო ღირებულება 4 240 000.00 ლარს შეადგენს. რამდენი ლარია აქედან გამოყოფილი გურიაში შესასრულებელი სამუშაოსთვის?
აქვე, გთხოვთ გვიპასუხოთ, რატომ არის აუცილებელი მრავალდარგოვანი სამშენებლო და სარეკონსტრუქციო სამუშაოებისთვის საინჟინრო ზედამხედველობის მომსახურების შესყიდვა?”_ ვწერდით მუნიციპალური განვითარების ფონდს 24 ნოემბერს გაგზავნილ წერილში.
მუნიციპალური განვითარების ფონდმა განაცხადზე პასუხი დღეს დაგვიბრუნა.
“სსიპ მუნიციპალური განვითარების ფონდმა, კომპეტენციის ფარგლებში, განიხილა მიმდინარე წლის 24 ნოემბრის N6317 თქვენი წერილი, რომელიც ეხება საინჟინრო ზედამხედველობის მომსახურების შესყიდვას
გაცნობებთ, რომ აღნიშნული შესყიდვა დაგეგმილი პროექტების მასშტაბიდან გამომდინარე მიზნად ისახავს ფონდის დაკვეთით განსახორციელებელი კომპლექსური სამშენებლო-სარეკონსტრუქციო სამუშაოების ხარისხიანი, უსაფრთხოების ნორმებთან შესაბამისი და ეფექტური განხორციელების უზრუნველყოფას.
პროექტების სპეციფიკიდან გამომდინარე, სამუშაოები მოიცავს სხვადასხვა სამშენებლო, სამონტაჟო, საავტომობილო გზების, საინჟინრო ქსელების, არქიტექტურულ და სხვა უსაფრთხოების სტანდარტებთან დაკავშირებულ კომპონენტებს. შესაბამისად, აუცილებელია კვალიფიციური და გამოცდილებაზე დამყარებული საინჟინრო ზედამხედველობის მომსახურება. საზედამხედველო ორგანიზაცია უზრუნველყოფს შესრულებული სამუშაოების ფაქტობრივი მოცულობების, ხარისხისა და
ღირებულების გადამოწმებას, რაც აუცილებელია პროექტების დადებითი შედეგის მისაღწევად.
აღნიშნულ ტენდერთან დაკავშირებით ამ ეტაპზე არსებული ინფორმაცია შეგიძლიათ იხილოთ სახელმწიფო შესყიდვების ერთიან ელექტრონულ სისტმაში”,_ წერია ჩვენთვის მოწოდებულ ინფორმაციაში.
ინფორმაციისთვის, შესყიდვის გამოცხადების შესახებ 14 ნოემბერს გამოცხადდა. განაცხადების მიღება კი 11 დეკემბერს უნდა დაიწყოს და 16 დეკემბერს შეწყდეს.
გავრცელებული ინფორმაციით, საზედამხედველო მომსახურება განხორციელდება ხელშეკრულების გაფორმებიდან 2028 წლის 31 დეკემბრის ჩათვლით დამატებული 1 თვე გარდამავალი პერიოდისთვის (2029 წლის 31 იანვრის ჩათვლით). გარდამავალი პერიოდისთვის მიმწოდებლის ვალდებულება განმარტებულია ტექნიკურ დავალებაში. მიმწოდებელმა უნდა უზრუნველყოს მომსახურების გაწევის დაწყება ხელშეკრულების გაფორმების შემდგომ, შემსყიდველის წერილობითი დავალებიდან დაუყოვნებლივ.
