"თავისუფალი დემოკრატების" ოზურგეთის ლიდერი, ქალაქ ოზურგეთის მუნიციპალიტეტის საკრებულოს დეპუტატი თემურ სალუქვაძე განცხადებას ავრცელებს, სადაც სალუქვაძე გურიის გუბერნატორისა და ინდოეთიდან ჩამოსული ინვესტორების შეხვედრას აპროტესტებს.
შეხვედრა გურიის გუბერნატორსა და ინვესტორებს შორის გუშინ, ტყვიის გადადამუშავებელი ქარხნის საკითხებთან დაკავშირებით შედგა.
სალუქვაძე განცხადებაში აღნიშნავს, რომ "თავისუფალ დემოკრატებს" შეხვედრაზე დასწრების საშუალება შეეზღუდათ.
"საჯარო შეხვედრა და შეხვედრის მონაწილეთა არჩევითობა, თუ გამიზნული უარი "თავისუფალ დემოკრატებს"? – ეს კითხვები გუშინდელი დღის ბუნდოვანებამ გამოიწვია. ჩვენი ინფორმაციის შედეგად, სამხარეო გუბერნიაში იმართებოდა შეხვედრა ინდოელ ინვესტორებთან და საზოგადოების წარმომადგენლებთან. თემის აქტუალობიდან გამომდინარე, "თავისუფალმა დემოკრატებმა", მოსახლეობის ინტერესების გათვალისწინებით, თავი ვალდებულად ჩავთვალეთ, მონაწილეობა მიგვეღო ამ მეტად პრობლემური საკითხის განხილვაში. გასაკვირია, მაგრამ რეალობაა, რომ სამხარეო ადმინისტრაციის ხელმძღვანელმა, გვითხრა, რომ არ ჰქონდა ინფორმაცია, რაიმე შეხვედრის შესახებ და გადაგვამისამართა გუბერნატორის მდივანთან.
ამის შემდეგ, დაგვირეკეს და გვითხრეს, რომ აღნიშნული შეხვედრა იმართებოდა გუბერნიაში 3 საათზე და დასწრება შეგვეძლო. 3 საათზე მისულ "თავისუფალი დემოკრატების" წარმომადგენლებს შეხვედრა დამთავრებული დახვდათ (აღმოჩნდა, რომ შეხვედრა 12:00 საათზე გაიმართა). ჩვენ არ ვიცით რაზე იყო იქ საუბარი, თუმცა, როგორც გავიგეთ, შეკრებას ჩვენთვის პატივსაცემი ადამიანები ესწრებოდნენ, რაც გვაიმედებს, რომ დისკუსია ქალაქისა და მოსახლეობის ინტერესების დაცვის მიმართულებით წარიმართა. ამის შემდეგ, 3 საათზე, დიდი ძალისხმევით, აღმოვჩნდით შეხვედრაზე, რომელიც ახალგაზრდა იურისტთა ასოციაციის ოზურგეთის ოფისში შედგა. როგორც ვიცით, ეს არ იყო პირველი შეხვედრა ამ პრობლემატიკის ირგვლივ. ასევე, ადგილობრივი და ცენტრალური პრესა უკვე დიდი ხანია აქვეყნებს მასალებს გარკვეულ დარღვევებთან დაკავშირებით, რომელზეც სათანადო რეაგირება ჯერ არ განხორციელებულა, ასევე, მოსახლეობის სამართლიან პრეტენზიებს შედეგი დღემდე არ გამოუღია.
აუცილებელი და მიზანშეწონილია, ტერიტორია დაუბრუნდეს ქალაქის მუნიციპალიტეტს და ამ კუთხით ქალაქის თვითმმართველობამ შესაბამისი ნაბიჯები გადადგას. პროცესის ხარვეზულად წარმართვის შედეგია, როდესაც ინვესტორი ბედავს არაკორექტულად, ცინიზმით მოეკიდოს მოსახლეობის სამართლიან მოთხოვნებს, და ბოლოსდაბოლოს, ვინ დგას ამ კომპანიის უკან და ვინ იღებს პასუხისმგებლობას, რა შედეგი მოჰყვება მათი საქმიანობის გაგრძელებას რეგიონში?
სწორედ ეს, და კიდევ მრავალი კითხვა დაისვა შეხვედრაზე, რომელსაც პასუხი არ გაეცა! ვფიქრობ, პოზიცია, რომელსაც ადგილობრივი ხელისუფლება იჩენს, არაადეკვატურია იმ რეალობებთან, რომელიც ზემოთ აღნიშნული პრობლემის ირგვლივაა განვითარებული. ჩვენ "თავისუფალი დემოკრატები" არ დავუშვებთ ვიღაცის კერძო ინტერესებს შეეწიროს ჩვენი მოსახლეობის ჯანმრთელობა და კეთილდღეობა. მოვითხოვთ, პროცესი გახდეს მეტად საჯარო და თითოეულმა ოზურგეთელმა, ხელისუფლების, ოპოზიციისა, თუ საზოგადოების ნებისმიერმა წარმომადგენელმა, უპირველესად ვიმოქმედოთ საკუთარი ქალაქისა და მოქალაქეების ინტერესების დაცვის თვალსაზრისით", _ აღნიშნულია სალუქვაძის განცხადებაში.
(R)
