“გურია ნიუსი” გთავაზობთ აქციის მონაწილეთა კომენტარებს:
ნინო ზურიაშვილი: _ თავს ესხმიან იმ ჟურნალისტებს, რომლებიც არაკონტროლირებადი მედიასაშუალებებში მუშაობენ, ახლოს არ უშვებენ ჩინოვნიკებთან, არ აძლევენ შენობებისთვის ფოტოების გადაღების საშუალებას, ხშირად ფიზიკურად ძალადობენ მათზე. ვისაც აინტერესებს, შეუძლია ნახოს, ჟურნალისტებისთვის პროფესიული საქმიანობის დროს ხელის შეშლის ფაქტების ამსახველი ვიდეო მასალები.
ყველაზე მნიშვნელოვანიკი ის არის, რომ ეს ქმედებები ხელისუფლებისგანაა წახალისებული. მართლმსაჯულების ორგანოები დუმან და ყურადღებას არ ამახვილებენ მსგავს ფაქტებზე. აი, ამას ვაპროტესტებთ. ჩვენ გვინდა, რომ იუსტიციის სამინისტრომ, რომლის ნაწილიც არის პროკურატურა, ყურად იღოს და შეისწავლოს მსგავსი ქეისები და დასაჯოს პოლიციელები, რომლებიც ისინი თავს ესხმიან ჟურნალისტებს.
ზვიად ქორიძე: _ ჩვენ ვაპროტესტებთ ამ ბოლო თვეების განმავლობაში ჟურნალისტების მიმართ გახორციელებულ ზეწოლის ფაქტებს. ჟურნალისტებისთვის პროფესიონალი საქმიანობის დროს ხელის შეშლის, მათი დაშანტაჟებისა თუ ფიზიკური ზეწოლის ფაქტები არ არის გამოძიებული, არც ერთი საქმე ბოლომდე არ მისულა და პროკურატურას თითი თითზე არ დაუკარებია, რომ ეს საქმეები გამოეძიებინა. გვინდა, რომ ასეთი ტიპის აქციით იუსტიციის სამინისტროს ხელმძღვანელობას სიგნალი მივცეთ. ეს არ არის ის თემა, რომელსაც მათ შეიძლება წაუყრუონ.
რაც მთავარია, მოვითხოვთ, რომ ეს საქმეები არ იქნას მხოლოდ ფორმალურად გამოძიებული და არ შემოიფარგლოს ისეთი ტრივიალური განცხადებებით, როგორიც ამ ბოლო დროს შინაგან საქმეთა მინისტრს სჩვევია.
ჟურნალისტებზე ძალადობის პროცესმა შეუქცევადი ხასიათი შეიძინა, როგორც პოლიციელების, ასევე ადგილობრივი ხელისუფლების სხვა წარმომადგენლების მხრიდან. ჩვენ ასე ერთად დგომით დავარწმუნებთ მთავრობას, რომ მათ არ აქვთ უფლება ამ ფაქტებს წაუყრუონ.
გელა მთივლიშვილი: _ ბოლო პერიოდში ჟურნალისტებზე მომხდარმა ზეწოლის ფაქტებმა მასობრივი ხასიათი მიიღო. ხელს გვიშლიან მუშაობაში, არ გვაძლევენ მოვლენების პირდაპირ და ობიექტურად გაშუქების შესაძლებლობას, პირდაპირ ერევიან ჩვენს სარედაქციო საქმიანობაში და ახორციელებენ ზეწოლას. არც ერთი ფაქტი არ არის გამოძიებული, რაც ბოლო ორი თვის განმავლობაში მოხდა. ასეთი მიდგომა ძალიან დიდ დაუსჯელობის სინდრომს ქმნის, რის გამოც ჟურნალისტებზე ზეწოლის ფაქტები კიდევ უფრო მასობრივ ხასიათს მიიღებს.
ჩვენ გვინდა, რომ ერთი პრეცედენტი მაინც არსებობდეს, როდესაც ვინმე სამაგალითოდ დაისჯება ჟურნალისტზე გახორციელებული ზეწოლის გამო.
გამოძიებაზე ზედამხედველობა სწორედ იუსტიციის სამინისტროს ფუნქციაა და ამიტომაც ვაპროტესტებთ ამ ყველაფერს იუსტიციის სამინისტროსთან.
ირაკლი მანაგაძე: _ ბოლო პერიოდში ჟურნალისტებზე სერიოზული ძალადობის პროცესი დაიწყო. სწორედ ამ ძალადობას ვაპროტესტებთ ჟურნალისტები. სამწუხაროდ, არც ერთი ფაქტის გამოძიება არ მომხდარა. მოვუწოდებ პროკურატურას, სასწრაფოდ გამოძიონ ეს საქმეები.
იუსტიციის სამინისტროსთან გამართულ აქციაში რამდენიმე ათეულმა ჟურნალისტმა მიიღო მონაწილეობა და მათ ერთადერთი სურვილი აერთიანებდათ: არა _ ჟურნალისტებზე ძალადობას‼!
