2016 წლის 7 მაისს, თბილისის საქალაქო სასამართლოს საგამოძიებო და წინასასამართლო სხდომის კოლეგიამ განიხილა და დააკმაყოფილა საქართველოს მთავარი პროკურატურის შუამდგომლობა ბრალდებულების ლ.რ.-ს და ლ.კ.-ს მიმართ აღკვეთის ღონისძიების სახით-პატიმრობის გამოყენების თაობაზე.
სასამართლოს ინფორმაციით, მათ ბრალად ედებათ წინასწარი შეთანხმებით, ჯგუფის მიერ, განსაკუთრებით დიდი ოდენობით ნარკოტიკული საშუალების უკანონო შეძენა, შენახვა. ასევე, ბრალდებულ ლ.კ.-ს დიდი ოდენობით ნარკოტიკული საშუალების უკანონო შეძენა და შენახვა.
"შუამდგომლობის თანახმად, ბრალდებულებმა წინასწარი შეთანხმებით, გამოძიებით დაუდგენელ დროსა და ვითარებაში, შემდგომში მოხმარების მიზნით, უკანონოდ შეიძინეს და შეინახეს 42,9524 გრამი განსაკუთრებით დიდი ოდენობით ნარკოტიკული საშუალება მდმა. ბრალდებულმა ლ.კ.-მ, ასევე გამოძიებით დაუდგენელ დროსა და ვითარებაში უკანონოდ შეიძინა და შეინახა 0,0857 გრამი დიდი ოდენობით ნარკოტიკული საშუალება მდმა.
ღია სასამართლო სხდომაზე, აღკვეთის ღონისძიების კონკრეტული სახის შერჩევისას სასამართლომ მხედველობაში მიიღო ის გარემოება, რომ ბრალდებულებს ბრალად ედებათ განზრახი, ჯგუფური, განსაკუთრებით მძიმე კატეგორიის დანაშაულებების შესაძლო ჩადენა. ამასთან ბრალდებულ ლ.რ-ს ნარკოლოგიური გამოკვლევის ექსპერტიზის დასკვნის თანახმად, დაუდგინდა ნარკოტიკული საშუალების ექიმის დანიშნულების გარეშე უკანონოდ მოხმარების ფაქტი. ბრალად შერაცხული ქმედების, ხასიათის, სპეციფიკის და გავრცელებულობის გათვალისწინებით, არსებობს დასაბუთებული ვარაუდის სტანდარტით ბრალდებულების მხრიდან დანაშაულებრივი საქმიანობის გაგრძელების საფრთხეები და გარკვეული რისკები.
ასევე სასამართლომ მიიჩნია, რომ პასუხისმგებლობისაგან თავის არიდების მიზნით, არსებობს ბრალდებულთა მხრიდან მიმალვის, საგამოძიებო ორგანოებსა და სასამართლოსთვის თავის არიდების საფრთხე, გამომდინარე იქედან, რომ ბრალად შერაცხული ქმედებები სასჯელის სახედ და ზომად ითვალისწინებს 8 დან 20 წლამდე და მათ შორის უვადო თავისუფლების აღკვეთას. ასევე სასამართლოში წარმოდგენილი მასალებით დასტურდება, რომ ბრალდებულებს აქვთ გარკვეული კავშირები ქვეყნის ფარგლებს გარეთ და მათ არაერთხელ გადაკვეთეს სახელმწიფო საზღვარი", _ აღნიშნულია სასამართლოს განცხადებაში.
აღნიშნულ საქმეზე წინასასამართლო სხდომა 22 ივნისს 16 საათზე გაიმართება.
