პოლიტიკური პარტია "ქართული ოცნება – დემოკრატიული საქართველო" "ნაციონალური მოძრაობის" მიერ გავრცელებულ ბრალდებებს პასუხობს. "ნაციონალებმა" ზუგდიდისა და წყალტუბოს მუნიციპალიტეტებში, "ნაციონალური მოძრაობის" ოფისებზე თავდასხმაში ხელისუფლება დაადანაშაულეს.
"ჩვენთვის ცნობილი გახდა, რომ ზუგდიდის რაიონის სოფელ კორცხელსა და სოფელ წყალტუბოში მოხდა "ნაციონალური მოძრაობის" ოფისების წინ განთავსებული პარტიის სააგიტაციო მასალის დაზიანება. ამასთან, არ გამოვრიცხავთ, რომ მსგავსი პროვოკაციები შესაძლოა მიზანმიმართულად მომავალშიც განხორციელდეს. ასეთი ფაქტები ძაბავს წინასაარჩევნო გარემოს.
"ქართული ოცნება-დემოკრატიული საქართველოს" ინტერესებშია არჩევნები ჩატარდეს აბსოლუტურად დემოკრატიულ და თავისუფალ, მშვიდ გარემოში. შესაბამისად, ნებისმიერი სახის დარღვევა ან ფაქტი, რომელიც ჩრდილს მიაყენებს არჩევნების დემოკრატიულად ჩატარების პროცესს, დაუყონებლივლივ უნდა აღიკვეთოს, საჭიროების შემთხვევაში კი დაიწყოს გამოძიება.
აღნიშნული ფაქტი „ქართული ოცნება-დემოკრატიული საქართველოსთვის" კატეგორიულად მიუღებელია. მივმართავთ თხოვნით შესაბამის ორგანოებს, მყისიერი რეაგირება მოახდინონ მსგავს ფაქტებზე."- ნათქვამია პარტიის ოფიციალურ განცხადებაში.
—
