დროში საკმაოდ გაიწელა იმ პრიორიტეტების დამტკიცება, რომელიც ლანჩხუთის მუნიციპალიტეტში სოფლის მხარდაჭერის პროგრამიდან უნდა დაფინანსდეს მიმდინარე წელს. გამგეობის ინფრასტრუქტურისა და არქიტექტურის სამსახურის უფროსის, ლევან ჩხაიძის თქმით, სამუშაოები იმ ობიექტებზე, რომელიც სოფლის პროგრამით ფინანსდება, მომავალი კვირიდან დაიწყება. მთლიანობაში კი მუნიციპალიტეტის სხვადასხვა სოფელში მიმდინარე წელს ამ პროგრამით 76 ობიექტზე გახორციელდება სამუშაოები, რისთვისაც 756 256 ლარის დახარჯვა იგეგმება.
თუ გასულ წლებში სოფლის მხარდაჭერის პროგრამა ერთ პირთან მოლაპარაკების საფუძველზე ხორციელდებოდა, წელს მიდგომა შეიცვალა და სამუშაოების წარმოების უფლების მისაღებად გამარტივებული სახის ტენდერი ტარდება.
მიმდინარე წელს, სოფლის პროგრამიდან ზემო შუხუთში წყალმომარაგების სისტემა უნდა მოწესრიგდეს, რაზეც 12 594 ლარის დახარჯვაა გამიზნული, ხოლო ქვემო შუხუთელთა პრობლემის მოსაგვარებლად 29 334 ლარი დაიხარჯება. კერძოდ, ლაშისღელის საზღვარზე საყანე ფართობის შეღობვას 6 607 ლარი მოხმარდება, სოფლის სკოლის მიმდებარედ სანიაღვრე არხის გასაყვანად 19 839 ლარი, ხოლო ცხაურის მოსაწყობად 2 888 ლარია გათვალისწინებული.
ჩოჩხათის ადმინისტრაციულ ერთეულში სულ 12 ობიექტის მოსაწესრიგებლად 78 657 ლარი დაიხარჯება; სოფელ ჯიხანჯირში სოფლის პროგრამიდან, მოსახლეობის არჩევნით, მინი-სტადიონის მოწყობა გადაწყდა და საამისოდ 8 208 ლარია გათვალისწინებული; სოფელ შრომისუბანში გაუვალ აღმართზე ბეტონის საფარის დასაგებად 13 927 ლარია გამოყოფილი; ჩოჩხათის ადმინისტრაციაში შემავალ სოფელ მოედანში სამი ობიექტი მოწესრიგდება, რისთვისაც 12 306 ლარი დახარჯვაა გამიზნული. ამ თანხიდან 5 835 ლარით მოედნის ცენტრში ცხაურა და სანიაღვრე არხი მოეწყობა, 2 519 ლარით სოფლის ცენტრალურ გზას დააგრეიდერებენ, ხოლო 3 952 ლარით ხორეთ-მოედანის დამაკავშირებელ გზაზე ცხაურას გააკეთებენ; ჩოჩხათის კიდევ ერთ სოფელ ხორეთში სოფლის პროგრამიდან მიღებული 8 594 ლარით ბეტონის სანიაღვრე არხების სამუშაოების დასრულებაა გამიზნული.
უშუალოდ ჩოჩხათში კი, სოფლის პროგრამიდან, ოთხ ობიექტზე გახორციელდება შესაბამისი სამუშაოები და საამისოდ 15 713 ლარია პროგრამაში ჩასმული. ჩოჩხათის სკოლის ეზოსთან სანიაღვრე არხის მოსაწყობად 1 666 ლარი დაიხარჯება, სოფლის ცენტრში კი 4 176 ლარად მოსაცდელი აშენდება. ოდილაურის უბანში გზის შესაკეთებლად, სადაც გაუვალ ადგილებზე ბეტონის საფარი უნდა დაიგოს, 7 048 ლარია გამოყოფილი. ასევე, ღელის უბანში გზაზე ბეტონის შპალების მოწყობისთვის 2 823 ლარია გათვალისწინებული, გულიანის ცენტრში კი ადმინისტრაციული შენობის ასაშენებლად სოფლის პროგრამიდან პირველ ეტაპზე 14 367 ლარი დაიხარჯება.
ნიგოითის ადმინისტრაციაში სულ ექვსი ობიექტის რეაბილიტაცია იგეგმება, რისთვისაც მთლიანობაში, სოფლის პროგრამით 73 811 ლარია გამოყოფილი. სოფელ ქვიანის რამდენიმე უბანში გარეგანათების მოსაწყობად 17 377 ლარია გამოყოფილი. ჩოლობარგში კი პრიორიტეტად სოფლის სასაფლაოსთან მისასვლელი გზის კეთილმოწყობა დასახელდა და საამისოდ 14 180 ლარი დაიხარჯება. სოფელ ჭყონაგორაში კი სოფლის პროგრამიდან წყალგაყვანილობის მოსაწყობად 13 795 ლარს ავზისა და მილების შეძენისთვის დახარჯავენ. ჯაპანაში 8 385 ლარით მინი-სტადიონი მოეწყობა. უშუალოდ ნიგოითში 15 988 ლარი სოფლის წყალმომარაგების მონტაჟს მოხმარდება, ჯიხეთში კი წყალგაყვანილობის გაკეთებისთვის 4 086 ლარია გამოყოფილი.
აკეთის ადმინისტრაციულ ერთეულში შემავალ სოფლებში გაგურში, ჭანჭათში, ზემო აკეთსა და ქვემო აკეთში 2016 წლის სოფლის პროგრამიდან ბეტონის გზის სამშენებლო სამუშაოები გახორციელდება, რისთვისაც, საერთო ჯამში 45 549 ლარია გათვალისწინებული. ასევე, ბეტონის გზა მოეწყობა აცანასა და მის დაქვემდებარებაში მყოფ სოფელ ტელმანში, რაც 26 424 ლარის დახარჯვას ითვალისწინებს. 30 584 ლარით, ასევე, ბეტონის გზა გაკეთდება სოფელ მამათშიც.
მაჩხვარეთში, საერთო ჯამში, 27 160 ლარის სამუშაოები შესრულდება. სოფლის საყანე და საძოვრის ფართობების შეღობვას 15 128 ლარი სჭირდება, სოფელ ორაგვეში შიდა გზებზე ცხაურის მოწყობას _ 4 725 ლარი, ხოლო ჯუნმერეში რკინა-ბეტონის სანიაღვრე არხის მოწყობას _ 7 304 ლარი.
სოფლის პროგრამიდან, მიმდინარე წელს გვიმბალაურის ადმინისტრაციაში სამ ობიექტზე 37 803 ლარის სამუშაოები შესრულდება. ჯუნეწერში, წმ. ლაზარეს ქუჩაზე რკინა-ბეტონის არხი გაკეთდება და საამისოდ 13 805 ლარი დაიხარჯება, სოფელ გვიმბალაურში, გუგუნავას ქუჩაზე, სანიაღვრე არხის მოსაწყობად 4 973 ლარია გამოყოფილი, ხოლო გვიმბალაურში წერეთლის ქუჩაზე, რკინა-ბეტონის გზის დასაგებად _ 19 025 ლარი.
ჩიბათის ადმინისტრაციაში პრიორიტეტად ამ ეტაპზე ხუთი ობიექტი შეირჩა, რისთვისაც პროგრამით 50 133 ლარი დაიხარჯება. ზემო ჩიბათში რკინა-ბეტონის არხის მოწყობა 13 519 ლარით მოხდება, ქვემო ჩიბათში კი იგივე ფორმის არხის მოწყობისთვის მასალების შესაძენად 5470 ლარია გათვალისწინებული. ასევე, ქვემო ჩიბათელები აითვისებენ 18 562 ლარს, რომელიც საყანე ფართობების ეკლიანი მავთულით შეღობვას მოხმარდება. საყანე ფართობის შეღობვა აირჩიეს პრიორიტეტად ჭალის მაცხოვრებლებმაც, რისთვისაც მათ სოფლის პროგრამიდან 6 975 ლარი ერგოთ. ამის გარდა, ჭალაში სასაფლაოსთან მისასვლელ გზაზე ბეტონის საფარიც დაიგება, რაც 5607 ლარის დახარჯვას ითვალისწინებს.
ლესის ადმინისტრაციაში სულ 46 423 ლარი დაიხარჯება. 22 585 ლარით სოფელში რკინა-ბეტონის გზა დაიგება, 6583 ლარი საყანე ფართობის შეღობვას მოხმარდება, ხოლო დარჩენილი 17 255 ლარი _ ჭინათში დაზიანებული გზის აღდგენას.
ჯურუყვეთის ადმინისტრაციაში სოფლის პროგრამით ექვს ობიექტზე ჩატარდება სამუშაოები, რაც, საერთო ჯამში, 47 631 ლარით ფინანსდება. კერძოდ, სოფელ ბაღლეფში გზის შეკეთებას 12 637 ლარი მოხმარდება, ასევე, ეწერზე გზის შესაკეთებლად 12 461 ლარია გამოყოფილი. ჯურუყვეთის სასაფლაოს შეღობვისთვის 9315 ლარია გათვალისწინებული. ამის გარდა, ამ სოფელში 2657 ლარად დამცავი ჯებირი, ხოლო 8536 ლარად სანიაღვრე არხები მოეწყობა. 2025 ლარია გამოყოფილი სოფლის ადმინისტრაციის შენობაში ერთი ოთახის სარემონტო სამუშაოებისთვის.
ნინოშვილის ადმინისტრაციაში 22 609 ლარი საყანე ფართობების შეღობვას მოხმარდება. ნიგვზიანში შემავალ სოფლებში კი სოფლის პროგრამიდან გასახორციელებელი სამუშაოები 69 284 ლარით დაფინანსდება. სოფელში გარეგანათების მონტაჟისთვის 16 433 ლარი გაიხარჯება, ხეთის უბანში ხიდის გასაკეთებლად 10 211 ლარია გამოყოფილი, ჯიხანჯირში კი 6003 ლარად მოსაცდელი მოეწყობა. ხაჯალია-წიაღობანის გზაზე ბეტონის არხისთვის 5948 ლარი დაიხარჯება, ამავე გზის გაუვალ მონაკვეთზე ბეტონის გზის მოსაწყობად _ 7785 ლარი. ხაჯალიაშივე ტყისპირა არხზე ხიდის გასაკეთებლად 5233 ლარია გათვალისწინებული. გარეგანათება დამონტაჟდება, ასევე, არჩეულის მთავარ გზაზე, რაც 6 715 ლარის დახარჯვას ითვალისწინებს. ამავე სოფელში მოსაცდელის მოსაწყობად კი 5 547 ლარია ჩასმული. ჩანჩეთში კი წყალგაყვანილობის სისტემის აღდგენისთვის სოფლის პროგრამით 1471 ლარია გათვალისწინებული, ხოლო გაუვალი გზის აღდგენისთვის – 3938 ლარი.
სუფსის ადმინისტრაცია სოფლის პროგრამიდან 89 102 ლარით დაფინანსდა, რაც 11 ობიექტზე გადანაწილდება. ახალსოფელსა და ტაბანათში საყანე ფართობები შეიღობება და, შესაბამისად, 15 448 ლარი და 18 101 ლარი დაიხარჯება. ტაბანათშივე გარეგანათების მოწყობას მოხმარდება 6779 ლარი. ასევე, გარეგანათება დამონტაჟდება სოფელ ჩქუნშიც და საამისოდ 5354 ლარია გამოყოფილი. ხიდმაღალაზე 10 755 ლარი საყანე ფართობის შეღობვას მოხმარდება, ხოლო 14 676 ლარად ბეტონის არხი მოეწყობა. მალთაყვაში მილხიდის გასაკეთებლად 4802 ლარია გათვალისწინებული, ხოლო გრიგოლეთში საყანე ფართობის შეღობისთვის _ 5905 ლარი.
რაც შეეხება უშუალოდ სუფსას, იქ 7 282 ლარის სამუშაოები შესრულდება. აქედან, 584 ლარი საზოგადოებრივი ტუალეტის შეკეთებას მოხმარდება, 4 793 ლარად სკვერი მოეწყობა, ხოლო 1905 ლარი გარეგანათებისთვის დაიხარჯება.
ღრმაღელის ადმინისტრაციულ ერთეულში, სოფლის პროგრამით, 69 161 ლარი გაიხარჯება. კერძოდ, წყალწმინდაზე გზის რეაბილიტაციისთვის 22 896 ლარის სამუშაოები შესრულდება, ღრმაღელეში წყალგაყვანილობის სისტემის მოსაწყობად 17 410 ლარია გათვალისწინებული, ომფარეთში კი ბეტონის გზის მოსაწყობად _ 28 855 ლარი.
