დასრულდა 2010 წელი და დაიწყო ახალი _ 2011. ჩვენ დავინტერესდით, რა ხდებოდა ძველი და ახალი წლის მიჯნაზე ჩოხატაურის სასწრაფო სამედიცინო დახმარების, სახანძრო სამსახურებში, პოლიკლინიკა-საავადმყოფოსა და სამშობიარო სახლში. ზემოთ აღნიშნული ორგანიზაციების ხელმძღვანელების მიერ მოწოდებული ინფორმაციით, 31 დეკემბერსა და 1 იანვარს სასწრაფო სამედიცინო დახმარება დასჭირდა 46 მოქალაქეს, წლის განმავლობაში კი 7233 გამოძახება ჰქონდათ. საავადმყოფოში აღნიშნული 2 დღის განმავლობაში შემოყვანილი იქნა 8 პაციენტი. რომელთა ჯანმრთელობის მდგომარეობა დღეისთვის სტაბილურია. მხოლოდ ერთი ავადმყოფი, მრავლობითი მოტეხილობით გადაიყვანეს ქუთაისის საავადმყოფოში. რაც შეეხება სახანძრო სამსახურის თანამშრომლებს, მათ წყნარი დღეები ჰქონდათ _ საბედნიეროდ, მათი დახმარება ახალი წლის დღეებში არავის დასჭირვებია.
სამშობიარო სახლში კი პირველ იანვარს ბურნათელი გვანცა ჯემალის ასული ანდღულაძე დაიბადა. “გურია ნიუსი” ახალ წელს ულოცავს პატარა გვანცას და ყველა იმ ადამიანს, ვინც ახალი წლის ღამეს სამსახურში შეხვდა და საპასუხისმგებლო სამუშაოს ასრულებდა.
მშვიდობას და წარმატებებს გისურვებთ!
