საქართველოს შრომის, ჯანმრთელობისა და სოციალური დაცვის მინისტრი დავით სერგეენკო და იუსტიციის მინისტრის მოადგილე, მიხეილ სარჯველაძე ოზურგეთის მუნიციპალიტეტის დაბა ნასაკირალში ადგილობრივ მოსახლეობას, მთავრობის და საჯარო სამსახურის წარმომადგენლებს შეხვდნენ. შეხვედრას, რომელიც საღამოს 7 საათზე დაიწყო, ასევე ესწრებოდნენ "ქართული ოცნების" დეპუტატობის კანდიდატი, ნონა ტუნაძე და მისი მხარდამჭერები.
"აქ მოვედი იმისთვის, რომ საქმის კურსში ჩაგაყენოთ მიმდინარე საკითხებზე, მოვისმინო თქვენგან რა გიჭირთ, რა გილხინთ. ის, რისი მოგვარებაც ადგილზე შეგვიძლია, ოზურგეთში მოვაგვარებთ და რასაც აქ ვერ ვაგვარებთ, პირობას გაძლევთ ვიმუშავებ იმისთვის, რომ ეს საკითხები მოვაწესრიგო." – თქვა გამოსვლის დასაწყისში დავით სერგეენკომ.
" რასაც ვეცადეთ ჩვენი მთავრობის მოსვლის დღიდან იყო ის, რომ დაგვებრუნებინა თქვენთვის, რაც გეკუთვნოდათ – თქვენი უფლება ჯანმრთელობაზე და სოციალურ მხარდაჭერაზე. ვიცი, ეს ნაბიჯები ნამდვილად არ არის საკმარისი, მაგრამ მინდა გითხრათ, თითოეული თქვენთაგანის გვერდზე ვართ.
მე ნამდვილად ვერ გაკადრებთ იმას, რომ მიგითითოთ, ვის მიცეთ ხმა, რადგან თქვენ ამას არაჩვეულებრივად გააკეთებთ. თუმცა, კიდევ ერთხელ მინდა თქვენი ყურადღება გავამახვილო იმაზე, რომ როგორც ჯანდაცვის სამინისტროსთვის, ასევე მთავრობისთვის ძალიან მნიშვნელოვანია თითოეული თქვენთაგანის სატკივარი ჩვენთან დროულად და სწორად იქნეს მოტანილი და არა ჩასაფრებული პოზიციიდან, როცა ელოდებიან კაცი როდის დაეცემა და მერე დაიწყონ ჭილყვავებივით რაღაც ყიჟინის დაცემა.
მინდა გითხრათ, რომ ადგილზე არის უამრავი დახმარება და ერთობლივად უნდა მოხდეს საქმის გაკეთება, მხარში უნდა ამოვუდგეთ ერთმანეთს, რომ გაჭირვება დავძლიოთ, ტკივილი დავუამოთ ადამიანს.
ჩემი თხოვნა იქნება, მიბრძანდით საარჩევნო უბნებზე და დააფიქსირეთ თქვენი არჩევანი, ის რასაც თქვენ თვლით საჭიროდ. ეს არის ჩემი უმორჩილესი თხოვნა თითოეული თქვენთაგანისადმი" – თქვა დავით სერგეენკომ.
სიტყვის დასრულებისთანავე მინისტრს დაახლოებით ათმა ადამიანმა გადასცა პირადად წერილი და მისგან დახმარება ითხოვა.
"გავეცნობით თქვენს პრობლემებს და აუცილებლად იქნება რეაგირება." – უთხრა მოსახლეობას დავით სერგეენკომ.
მინისტრმა "გურია ნიუსთან" საუბრის დროს თქვა, რომ ეს იყო მთავრობის წევრების შეხვედრა ადგილობრივებთან.
" ეს იყო მთავრობის წევრების შეხვედრა მოსახლეობასთან. გაზიარება მათი პოზიციების და კომუნიკაციების გაუმჯობესების მცდელობა," – გვითხრა დავით სერგეენკომ.
შეხვედრა წვიმის გამო ადრე დასრულდა. შეხვედრაზე სიტყვით გამოვიდნენ გურიის გუბერნატორი გია სალუქვაძე და ოზურგეთის მუნიციპალიტეტის გამგებელი მერაბ ჭანუყვაძე.
დავით სერგეენკო და მიხეილ სარჯველაძე დაბა ნასაკირალიდან ქალაქ ოზურგეთს ესტუმრნენ.
