ლანჩხუთის საკრებულოში მოქმედი ოპოზიციური ფრაქციის – "ლანჩხუთი ევროატლანტიკური მომავლისთვის" წევრები საკრებულოს თავმჯდომარის, გოგი ხელაძის სახელზე განცხადებას ავრცელებენ, სადაც ისინი ბატონ ხელაძეს უმოქმედობაში ადანაშაულებენ და მას გამგებლის მარიონეტადაც კი მოიაზრებენ. ფრაქციის წევრთა განცხადებით, საკრებულოს თავმჯდომარემ ბევრი სასიკეთო ინიციატივა მხოლოდ იმიტომ არ გაიზიარა, რომ მათ მიერ იყო წარდგენილი.
"მიუხედავად იმ მარიონეტული როლისა, რომელსაც ხშირად ირგებდით ხოლმე გამგებლის გავლენით, მიუხედავად არაერთგზის არაკოლეგიალობისა, დღემდე მაინც ჩვეული რეჟიმით ვაგრძელებდით თანამშრომლობას. თუმცა, ის, რაც 27 აპრილს სხდომაზე იყო დაგეგმილი ჩვენს წინააღმდეგ, რისი საქმის კურსშიც თქვენც ბრძანდებოდით, უკვე ბოლო წვეთი იყო, რამაც თვალნათლივ დაგვანახა არა მარტო ჩვენ, რომ თქვენ ვერანაირად ვერ ახერხებთ საკრებულოს თავმჯდომარის ფუნქციის განხორციელებას, რის გამოც იზღუდება ჩვენი, ხალხის მიერ არჩეული დეპუტატების უფლებამოსილების განხორციელბა. ეს არის სამარცხვინო თანამშრომლობა," -ნათქვამია ზემონახსენებ განცხადებაში.
არაკოლეგიალურობის დასტურად კოლეგები საკრებულოს თავმჯდომარეს "ნაციონალური პარტიის" ოფისზე თავდასხმის ფაქტსაც ახსენებენ და მისგან უახლოეს მომავალში ორივე ფაქტთან დაკავშირებით საკუთარი პოზიციის დაფიქსირებას ითხოვენ.
"ჩვენ გვიჩნდება ეჭვი რომ თუ აქამდე ვერ უზრუნველყოფდით სხდომების ნორმალურად ჩატარებას, მით უმეტეს ვერ მოახერხებდით ამას მოახლოებული არჩევნების ფონზე, როცა ადვილი წარმოსადგენია როგორ იქნება გამოყენებული თქვენი პარტიის ზონდერ-აქტივისტები.
გთხოვთ, მკაფიოდ და გასაგებად დააფიქსიროთ თქვენი პოზიცია ორივე ფაქტთან დაკავშირებით. დაგმოთ ეს ქმედებები და მოუწოდოთ პოლიციას დროულად გამოიძიოს ოფისის დარბევის ფაქტი, რადგანაც ამ დაუსჯელობამ გამოიწვია ის, რომ 27 აპრილს ზუსტად იგივე, ბიუჯეტიდან დაფინანსებული ზონდერ-თანამშრომლები აქტიურობდნენ საკრებულოს სხდომის ჩასაშლელად," – ვკითხულობთ ფრაქციის განცხადებაში.
შეგახსენებთ, რომ 27 აპრილს საკრებულოს სხდომაზე ერთ-ერთ საკითხად 2015 წლის ბიუჯეტის ანგარიშის იყო წარმოდგენილი. სხდომათა დარბაზსა და მის მიღმა საკმაოდ შეიმჩნეოდა როგორც უცხო პირთა, ასევე ა(ა)იპ-ების თანამშრომელთა მობილიზება. ფრაქციის ოთახთან კი გამგეობის დაცვის თანამშრომლები იდგნენ.
"იმ დღეს ჩვენზე თავდასხმა იგეგმებოდა, თუმცა ნაცვლად იმისა, რომ იმ პირებისთვის ეთქვათ არ გაბედოთ და არ შემოხვიდეთ შენობაშიო, მოიფიქრეს და ჩვენს ოთახში ავტომატიანი დაცვის თამშრომლები დაგვახვედრეს. არავის არ გვეშინია და არც არავის დაცვა არ გვჭირდება. უბრალოდ ხომ შეიძლებოდა საკრებულოს წევრებს მეტი კოლეგიალობა გამოეჩინათ ,"– ამბობენ "ევროატლანტიკოსები".
ოპოზიციონერ საკრებულოს წევრთა განცხადების საპასუხოდ ჩვენ კომენტარისთვის საკრებულოს პრესასთან ურთიერთობის სპეციალისტს, მაია კუპატაძეს დავუკავშირდით, რომლის თქმითაც, საკრებულოს თავმჯდომარე ოპოზიციის მხრიდან გამოთქმულ ბრალდებებთან დაკავშირებით განცხადებას უახლოეს დღეებში გააკეთებს.
„
