ორი დღეა სოციალური ქსელი წალეკა გაბრაზებულ-აღშფოთებული ქართველების პოსტებმა, რომლებიც ზუგდიდის მუნიციპალიტეტის საზღვრისპირა სოფელ ხურჩაში მომხდარ ტრაგიკულ ინცინდენტთანაა დაკავშირებული. 19 მაისს, ქართველი მესაზღვრეების მიერ კონტროლირებად ტერიტორიაზე, დღისით-მზისით აფხაზებმა უმოწყალოდ ჩაცხრილს აფხაზეთიდან დევნილი გიგა ოთხოზორია. ზოგიერთი მათგანი ქართულ უსაფრთხოების სამსახურებს დებს ბრალს უმოქმედობაში, ზოგი – მთელ მთავრობას, ზოგი მხოლოდ რუსეთის ბრალეულობას ხედავს ამ ამბავში.
ჟურნალისტი გელა ზედელაშვილი წერს: "ვიღაც ოღლიმ ხურჩაში ქართველი მოკლა. აღშფოთებულია მთელი საქართველო – "ნაციონალებმა" დაუნდობელი ბრძოლა გამოუცხადეს რუსეთს, ოღონდ სოლოლაკში, ივანიშვილის რეზიდენციასთან!
უამრავმა ქართველმა პატრიოტმა გაწყვიტა ურთიერთობა რუს ხალხთან, ოღონდ ფეისბუკში!
ჩვენი მოქალაქეები აცხადებენ, რომ ამიერიდან არავითარი ურთიერთობა აღარ ექნებათ ოკუპანტ რუსეთთან, თუმცა ამჯერად თვითმფრინავის ბილეთები უკვე აღებული აქვთ მოსკოვის მიმართულებით და უბრალოდ ვეღარ გააუქმებენ!
თქვენ წარმოიდგინეთ, ასევე აღშფოთებას გამოხატავენ ე.წ. `სელფავიკები` და ყოველ 3 წუთში დებენ ტრაგიკულ-აგრესიული გამომეტყველების ფოტოებს!
ჩვენში გამოჩნდნენ ადამიანები, რომლებიც ითხოვენ დაუყოვნებლივ ომის დაწყებას რუსეთთან!
უკაცრავად, თინა ძალოს უწყებამ სეტყვის საწინააღმდეგო რაკეტები უკვე დაამზადა?
უი, ჯერ არა? რავი, აბა… ჩვენი თავდაცვა ღრუბლებს ვერაფერს ესვრის და რუსებს რა უნდა ესროლოს?!
ხურჩაში რომ ჩავსულიყავით (სოლოლაკის ნაცვლად) და რუსებისთვის გვეგინებინა – ვერა?"
საჯარო ბიბლიოთეკის დირექტორი გიორგი კეკელიძე რამოდენიმე პოსტით ეხმაურება ტრაგიკულ მოვლენას.
"აი, ის ოთხი კაცი, ხურჩაში ქართველი რომ მოკლეს, სად გაიქცა? ადამიანი იდგა, მზეს ხედავდა, ფიქრობდა, ოცნებობდა და უცებ, სამუდამო ფარდა ჩამოაფარეს. თქვენ იცით რას ნიშნავს სიკვდილი? მთელი დანარჩენი ცოცხლების აღფოთება-შეშფოთება-სამძიმარი ვერ შეარხევს, ვერ გამოცვლის, ვერ შეამსუბუქებს. ჰოდა, სად გაიქცა ის ოთხი კაცი, რას ემალება, გამოვიდნენ, დაგვენახონ სახით და გვითხრან: აი, ეს არის ნამდვილი ადამიანი. გვითხრან ეს სამწუხარო და ბევრჯერ დადასტურებული ცნობა, რაც ვიცით და არ ვაღიარებთ. კი, ვაჭარბებ, მაგრამ ამ დროს თუ არ გადააჭარბე, სხვანაირად არ გამოდის p.s. შემთხვევით მოვკარი თვალი იმ საშინელ, ცინიკურ კადრებს. ზოგადი განცდის გარდა, მინდა ხაზგასმით გითხრათ: მგონი კიდევ ერთხელ დადასტურდა ვინ არის მტერი, საიდან ისვრის მისი ტყვია."
გიორგი კეკელიძე მიიჩნევს, რომ ხელაღებით ყველა იმ ადამიანის მოღალატედ გამოცხადება, ვინც რუსეთში შრომით არჩენს საქართველოში მყოფ ოჯახებს, არასწორია.
"იმ ქვეყანაში ათასობით ჩვენი მოქალაქე მუშაობს, ყველა წამსვლელ–წამომსვლელის მოღალატედ გამოცხადება არაგონივრული მოსაზრება მგონია. თუმცა, როცა საქმე სიმბოლურ ჟესტებს ეხება და სწორედ ასეთია საგანგებო კონცერტები, კიდევ უფრო გამიმძაფრდა დამოკიდებულება: გადმოირბენენ – მოგკლავენ, გადავირბენთ – ვუცეკვებთ."
ირინა სარიშვილი მხოლოდ და მხოლოდ საქართველოს უსაფრთხოების სამსახურებს ადანაშაულებს და მოქმედ მთავრობას სწრაფ აღსასრულს უწინასწარმეტყველებს.
"საქართველოს სახელმწიფო უშიშროების სამსახური გმობს საქართველოს ტერიტორიაზე ოკუპანტის მიერ საქართველოს მოქალაქის მკვლელობას…
გმობს და მორჩა!
ეს ამბავი არჩევნებთან უფრო ახლო პერიოდში რომ მომხდარიყო, დაგმობას ალბათ წყევლაც დაემატებოდა ხელისუფლების და მათი ჯიბის და ჯიბიდან თავამოყოფილი ოპოზიციის მხრიდან…
არსებობს უამრავი საშუალება რომ ეს შემზარავი დანაშაული საერთაშორისო დონეზე მაქსიმალურად იქნას გატანილი და შეფასებული…
ჯამში ასეთ საშუალებებს საინფორმაციო ომი ჰქვია და მტერთან საინფორმაციო ომის მოგებას სრულებითაც არ ჭირდება რაოდენობრივი უპირატესობა…
მოგებული საინფორმაციო ომი ერთადერთი საშუალებაა პერსპექტივაში მაინც პრობლემის სამართლიანი გადაწყვეტის ნებისმიერი გზით!
საინფორმაციო ომს რაოდენობა კი არა, პოლიტიკური ნება და ამ პოლიტიკური ნების მატარებელი პატრიოტი ხელისუფლება ჭირდება!
ძალიან ძნელია ამის გაგება იმ ქვეყანაში, სადაც ერთმანეთი უფრო გვძულს, ვიდრე ჩვენი საერთო მტერი;
სადაც ხელისუფლება ძალ–ღონეს არ იშურებს და ყველა დონეზე, რაზეც ხელი მიუწვდება, სპეციალური დელეგაციების გაგზავნის ჩათვლით, საერთაშორისო ომს წინა ხელისუფლების წარმომადგენლებს უცხადებს, სამარცხვინო, თავისმომჭრელ ომს, რომლის შედეგადაც საქართველო საერთაშორისო სამყაროსგან სრული იზოლაციისკენ მიექანება!
ხოლო მაშინ კი, როცა მავთულხლართები ლამის სახლის კართან გადმოგვიტანონ, მაშინ, როცა ქართველ ვაჟკაცებს დღისით მზისით ოკუპანტები გვიკლავენ, საქართველოს უშიშროების სამსახური გმობს ამ ფაქტს და დაგმობის ასლს გაეროში აგზავნის…
ამ ხელისუფლების დღეები დათვლილია…"-წერს სარიშვილი.
დღეს საქართველოს მთავარმა პროკურატურამ განცხადება გაავრცელა, რომ მათთვის ცნობილია მკვლელის ვინაობა, ხოლო საქმეზე მიმდინარეობს საგამოძიებო სამუშაოები. უსაფრთხოების სამსახური აცხადებს, რომ ამოღებულია შემთხვევის ადგილზე დამონტაჟებული ვიდეოკამერებიდან გიგა ოთხოზორიას მკვლელობის კადრები.
