"ჟორდანიასა და დუნდუას სახელობის სტადიონების რეაბილიტაცია მოხდება", _ ასეთია ლანჩხუთის მუნიციპალიტეტის გამგებლის, ზაზა ურუშაძის ვერდიქტი ქალაქის ტერიტორიაზე არსებული ხელოვნურსაფარიანი მინი-სტადიონების მონახულების შემდეგ.
აღსანიშნავია, რომ ამ პრობლემის მოგვარება ჯერ კიდევ გასულ წელს იგეგმებოდა და შესაბამისი პროექტიც გამზადებული იყო. მუნიციპალიტეტის ხელმძღვანელი პირები იძლეოდნენ იმედისმომცემ განცხადებებს, რომ საკითხი ქალაქის ინფრასტრუქტურული პროექტების ნუსხაში მოხვდებოდა და 2015 წელს ჟორდანიას სახელობის სტადიონის სრული რეაბილიტაცია მაინც გახორციელდებოდა. თუმცა, მაშინდელმა მოლოდინმა არ გაამართლა.
ფაქტია, რომ ქალაქ ლანჩხუთში არსებული სამი ხელოვნურსაფარიანი მინი-სტადიონების მდგომარეობა საკმაოდ სავალალოა _ სამწუხაროდ, აქამდე არაფერი გაკეთებულა სპორტული ინფრასტრუქტურის აღსადგენად, რასაც შედეგად რამდენიმე უსიამოვნო ფაქტი მოჰყვა და ბავშვებმა ვარჯიშისას სხვადასხვა სახის დაზიანებები მიიღეს.
ლანჩხუთში პირველი ხელოვნურსაფარიანი სტადიონი ჟორდანიას სახელობის მინი-სტადიონია, რომელიც 2003 წელს, ფეხბურთის ფედერაციის მაშინდელმა ხელმძღვანელმა მერაბ ჟორდანიამ გააკეთა. სამი წლის შემდეგ, სპორტისა და ახალგაზრდობის საქმეთა სამინისტროს გადაწყვეტილებით ახალი სტადიონის მშენებლობა სპორტული სკოლის მიმდებარედ გახორციელდა.
სამ წელიწადში თავისუფლების ქუჩაზე კიდევ ერთი მინი-სტადიონი გაკეთდა, რომელიც იმედო დუნდუას სახელს ატარებს. სწორედ ამ უკანასკნელზე მოდის ძირითადი დატვირთვა, როგორც ქალაქის მოსახლეობის, ასევე, ბავშვთა საფეხბურთო სკოლების აღსაზრდელების მხრივაც.
იქედან გამომდინარე, რომ დროთა განმავლობაში, აღნიშნული სტადიონების ინფრასტრუქტურა ზიანდებოდა და ნაწილობრივ შეკეთებას მოითხოვდა, წლების წინ ჯერ ჟორდანიას სტადიონის საფარი და დამცავი ღობე შეკეთდა, შემდგომ _ სპორტული სკოლისაც. დუნდუას სახელობის სარბიელის რეაბილიტაცია კი აქამდე არ გახორციელებულა, არადა, იქ არსებული სიტუაცია ამას ნათლად მოითხოვს.
ჯერ კიდევ წინა მოწვევის საკრებულოს წევრების მხრიდან არაერთხელ დადგა დღის წესრიგში ხელოვნურსაფარიანი სტადიონების მოწესრიგების საკითხი. ეს თემა ამჟამინდელ საკრებულოს რიგ დეპუტატებსაც არაერთხელ წამოუწევით წინა პლანზე. ისინი ადგილობრივი აღმასრულებელი ხელისუფლებისგან, იმ ფონზე, როცა მილიონობით თანხები იხარჯება, მათ შორის, საკუთრივ ქალაქის ტერიტორიაზე, ახალგაზრდების ჯანსაღი ცხოვრების წესის ამაღლებისთვის რამდენიმე ათასი ლარის გამოყოფას და ინფრასტრუქტურის პროექტების ნუსხაში არსებული სტადიონების რეაბილიტაციის საკითხის მოხვედრას ითხოვდნენ.
როგორც გამგებლის გადაწყვეტილებიდან ჩანს, ბავშვთა ფეხბურთის გულშემატკივრებს საწადელი მიმდინარე წელს უნდა აუხდეთ. ზაზა ურუშაძემაც ხელოვნურსაფარიანი მინი-სტადიონების უშუალო მონახულების შემდეგ გადაწყვეტილება მიიღო, რომ ჟორდანიასა და დუნდუას სახელობის სტადიონებზე ინფრასტრუქტურული სამუშაოები გახორციელდეს.
"ყველაფერი უნდა გაკეთდეს იმისთვის, რომ ბავშვთა ფეხბურთის განვითარებას მაქსიმალურად ხელი შევუწყოთ. აღნიშნულ ხელოვნურსაფრიან სტადიონებზე რეგიონული და ადგილობრივი ტურნირები პერიოდულად ჩატარდება", _ ასეთია გამგებლის კომენტარი საკითხთან დაკავშირებით.
გამგეობის ინფრასტრუქტურის სამსახურის უფროსი ლევან ჩხაიძე დამაიმედებელ პროგნოზს აკეთებს და პირობას იძლევა, რომ ტენდერი სტადიონებზე ინფრასტრუქტურული სამუშაოების გასახორციელებლად მომდევნო თვეში გამოცხადდება: "სტადიონის სრული რეაბილიტაცია აუცილებლად წელს გახორციელდება. ტენდერს ამასთან დაკავშირებით მომდევნო თვეში გამოვაცხადებთ. ჯერჯერობით, ვერ დავაკონკრეტებთ, რა ღირებულების იქნება პროექტი, რადგან ამ ეტაპზე იმ პროექტის გადამუშავება მიმდინარეობს, რომელიც გასულ წელს მომზადდა სტადიონების რეაბილიტაციასთან დაკავშირებით. მაშინ პროექტის ღირებულება 30 ათასი ლარის ფარგლებში იყო", _ ამბობს ჩხაიძე.
