ერთი ბოთლი ღვინო, წიგნი სოფლის მეურნეობის შესახებ, ფლაერები, უბის წიგნაკები და ავტოკალამი _ ამ საჩუქარს იმ შემთხვევაში მიიღებს ადგილობრივი ფერმერი, თუ აგრო-ტურის მონაწილე გახდება.
ეს არის პირველი შემთხვევა, როდესაც მოსახლეობას ღვინოს ჩუქნიან: მაგალითად, რუსთავის საკრებულოს წევრმა ერთიანი ნაციონალური მოძრაობიდან თამაზ გველუკაშვილმა სააღდგომოდ ქალაქის რამდენიმე უბანში საჩუქრად ცხვარი და ღვინო გააგზავნა, რაც ამომრჩევლის მოსყიდვად შეიძლება ჩაითვალოს. “საერთაშორისო გამჭვირვალობა _ საქართველოს” მიერ გამოკითხული რუსთავის მცხოვრებლები აღნიშნავენ, რომ აღდგომამდე რამდენიმე დღით ადრე, სხვადასხვა უბანში შეგროვდა ინფორმაცია კორპუსების მცხოვრებელთა რაოდენობის შესახებ, ხოლო აღდგომის დღეს, იმავე უბნებში მანქანებით საჩუქრები (ცხვარი და 20 ლიტრი ღვინო) მიიტანეს. ზოგიერთ უბანში საჩუქრები რუსთავის გამგეობის და ქვემო ქართლის გუბერნატორის ადმინისტრაციის თანამშრომლებმაც კი დაარიგეს, თუმცა, ყველგან პირდაპირ ითქვა, რომ ნობათი თამაზ გველუკაშვილის გაგზავნილია.
ოზურგეთის მუნიციპალიტეტის გამგებლის მოადგილის, ლაშა ღლონტის თქმით, აგრო-ტურის პროექტში ოზურგეთში, რამდენიმე ათეულმა ადამიანმა მიიღო მონაწილეობა:
_ ტური ძალიან საინტერესო იყო ფერმერებისთვის.
_ როგორც ვიცით, იქ მყოფი ფერმერები სამინისტრომ დაასაჩუქრა.
_ ყველასთვის იყო საჩუქრები, კარგი საჩუქრები _ ბლოკნოტი, წიგნი სოფლის მეურნეობაზე, ავტოკალამი და ა.შ.
_ კიდევ? როგორც ვიცი, ფერმერებს საჩუქრად ღვინოც გადაეცათ.
_ ერთი ბოთლი ღვინო იყო. ყველას გადაეცემოდა ეს საჩუქრები, ვინც მონაწილეობდა ამ ტურში.
აგრო-ტურის ერთ-ერთი მონაწილე ჩვენთან საუბრის დროს ამბობს, რომ მისთვის არანაირი საჩუქარი არ მიუციათ და მისი მიზანი იყო, რომ მიეღო ინფორმაცია, თუ როგორ კეთდება სათბური: _ ვიყავით გონიოში, ხელვაჩაურში და ნარუჯაში. იყო საუბარი სამინისტროს მიღწევებზე და მიმდინარე პროექტებზე. ასევე, გავეცანი ჩემთვის საინტერესო ინფორმაციას. რაც შეეხება საჩუქრებს, არ ვიცი, არავის არაფერი გადმოუცია, ისე სიამოვნებით მივიღებდი.
სოფლის მეურნეობის სამინისტროს საზოგადოებასთან ურთიერთობის დეპარტამენტის უფროსის, თამარ მეფარიშვილის თქმით, აგრო-ტური გრძელდება და ყველა რეგიონში ჩატარდება გლეხებისთვის. ისინი გაეცნობიან სიახლეებს და ახალ ტექნოლოგიებს, მიიიღებენ ინფორმაციას:
_ მსურველები ადგილობრივ მუნიციპალიტეტის გამგეობას უკავშირდებიან და შემდეგ ჩვენი აგრონომები ატარებენ აგრო-ტურებს. ნებისმიერ გლეხს შეუძლია მიიღოს მონაწილეობა.
_ როგორც ცნობილია, აგრო-ტურის დროს ფერმერები საჩუქრდებიან ღვინით, წიგნით და ა.შ.
_ ვასაჩუქრებთ ფლაერებით, სადაც წარმოდგენილია სოფლის მეურნეობის სამინისტროს მიმდინარე პროექტები, რომ ჰქონდეს ზოგადი ინფორმაცია ჩვენი საქმიანობის შესახებ.
_ ღვინოს, წიგნის და სხვა საჩუქრების შესახებ რას გვეტყოდით?
_ ეს არის სამინისტროში ჩამოსხმული ღვინო, რომელიც არ არის გაყიდვაში და ამ ჩვენი პროდუქციით ვასაჩუქრებთ ფერმერებს.
_ ყველა ადამიანი საჩუქრდება?
_ დიახ, ვინც აგრო-ტურში მონაწილეობს.
_ ჩვენ გვაქვს ინფორმაცია, რომ ერთ-ერთ მონაწილეს არ ერგო საჩუქარი.
_ დამაკავშირეთ, ვერ იპოვით ასეთ ადამიანს.
_ რა უჯდება პროექტი სამინისტროს?
_ ავტობუსები შეიძინა სამინისტრომ. შეგიძლიათ, სტატისტიკის დეპარტამენტის გვერდზე ნახოთ ყველა მონაცემები და ფასი. შეგიძლიათ, ცოტა ხანში დამიკავშირდეთ ტელეფონით და აუცილებლად გეტყვით, _ გვითხრა თამარ მეფარიშვილმა.
რამდენიმე ხანში ჩვენ მასთან ორჯერ ვცადეთ დაკავშირება, მაგრამ ქალბატონმა თამარმა ჩვენს ზარებს არ უპასუხა..
“საერთაშორისო გამჭვირვალობა _ საქართველოს” იურისტი ირინე ურუშაძე ჩვენთან საუბრისას ამბობს, რომ, “რა თქმა უნდა, ნებისმიერმა სამინისტრომ შეიძლება, ტური განახორციელოს, მაგრამ, ზოგადად, ნებისმიერი სახელმწიფო უწყება რეალურად საზოგადოებაში, მით უმეტეს რეგიონებში, ასოცირდება პარტიასთან, იგივე მინისტრები, რამდენიმე დღით ადრე ეწევიან ნაყოფიერ საარჩევნო კამპანიას, აქედან გამომდინარე, სამინისტროსგან საჩუქრების გადაცემა სიმბოლურ საჩუქრებს სცდება და ეს არ არის მარტო ფლაერის და კალმის დარიგება. ღვინოც არის, რომელიც საკმაოდ ძვირადღირებული პროდუქტია. სამინისტრომ რომ ჩამოასხა, ეს იმას არ ნიშნავს, იაფფასიანია”: _ სამინისტრო არის ასოცირებული ხელისუფლებასთან. ეს იმის ბრალია, რომ წაშლილია ხელისუფლებას და პარტიას შორის ზღვარი და, შესაბამისად, ხელისუფლებისგან გაკეთებული საჩუქარი ასოცირდება პარტიასთან, _ თქვა ურუშაძემ.
კოალიცია “ქართული ოცნების” ერთ-ერთი ლიდერის მარინე სუნგულიას თქმით, “გაჭირვებული დიასახლისი, ფქვილი რომ გამოელევა და ცდილობს, საფქვილის დაფერთხვით გაჭირვებით შეაგროვოს ფქვილი და გამოაცხოს პური, სწორედ ამ მდგომარეობაში იმყოფება ჩვენი ხელისუფლება _ იგი ნდობის ბოლო “ნარჩენს” აგროვებს.”
