"კორცხელის ინციდენტთან დაკავშირებული სიჩუმე, რომელსაც გამოხატავენ სამართალდამცავი ორგანოები და შესაბამისი სტრუქტურები, რომელთაც ამაზე უნდა ქონოდათ რეაქცია, უკვე დამაფიქრებელია." – აცხადებს საქართველოს პრეზიდენტი გიორგი მარგველაშვილი გადაცემა "ფაქტორში" ჟურნალისტ ლაშა ზარგინავასთან ინტერვიუს დროს.
მისივე თქმით, კორცხელი იყო 2016 წლის არჩევნების რეპეტიცია. 2016 წლის არჩევნები არის ყველაზე მნიშვნელოვანი სახელმწიფოებრივი გამოწვევა, რაც ჩვენს ქვეყანას აქვს ევროპული და ევროატლანტიკური ინტეგრაციის გზაზე.
"ამ რეპეტიციის მიმართ უნდა ყოფილიყო სამაგალითო პოზიცია და რეაქცია. ის ხმაური, რომელიც არსებობს, როგორც პოლიტიკოსების, ასევე საზოგადოების მხრიდან, არის ბუნებრივი, მაგრამ სიჩუმე, რომელსაც ჩვენ ვისმენთ სამართალდამცავებისგან, არის არაბუნებრივი და შემაშფოთებელი. როდესაც ვაკვირდები ამ პროცესებს, მიჩნდება ეჭვი, რომ მმართველ კოალიციაში არის გარკვეული მოძველბიჭო დაჯგუფება, რომელიც ასე უყურებს ამ პროცესებს. ეს თავქარიანი მოძველბიჭო დაჯგუფება წარმატებით გადმოიბირეს "ნაციონალური მოძრაობისგან", ისევე როგორც გადმოიღეს ზონდერული პოლიტიკა, ასევე ის მექანიზმები, რომელიც "ნაციონალურ მოძრაობას" ქონდა და რომელსაც ძალიან ნათელი უარი ვუთხარით ზუსტად ოთხი წლის წინ.
მათ "ნაციონალების" მიერ შექმნილი ძალადობრივი სისტემა გადმოიფორმეს და ახლა რაღაც დაჯგუფება საქართველოს სთავაზობს, რომ ასე წარმართავს პოლიტიკას. არავის ეგონოს, რომ ისინი შეძლებენ იგივე მექანიზმები თავს მოახვიონ ქართულ საზოგადოებას. პირველ რიგში არჩევნები ეკუთვნის საზოგადოებას და მერე – პოლიტიკოსებს. პირველ რიგში, ეს არის ჩვენი ამომრჩევლების ღონისძიება და მერე – პოლიტიკოსების. ყველამ იცოდეს, რომ ამ მოძველბიჭო ჯგუფს, რომელიც რაღაცას გეგმავს, უნდა გაეცეს პრინციპული პასუხი სახელმწიფოსგან. მე ვიქნები ჩართული ამ პროცესში ზედამხედველობის და პროცესების გააზრების თვალსაზრისით." – განაცხადა საქართველოს პრეზიდენტმა
