ქონება _ ქოხი, ერთი თხა და ხუთი ქათამი; სეზონური შემოსავალი _ 100 კილოგრამი თხილი. სულ ესაა ოზურგეთის მუნიციპალიტეტის სოფელ ჭანიეთის მკვიდრის, 75 წლის ეთერ ტყეშელაშვილის ავლადიდება, რის გამოც მას სოციალური დახმარება მოუხსნეს!
_ ღარიბი ბევრია დღეს _ მე ღატაკი ვარ. სოციალურ დახმარებას ღატაკსაც რომ უხსნიან, მე ვარ ამის მაგალითი! მოდით, ნახეთ, თუ რამეს ვაჭარბებ და მითხარით მერე, რას კადრულობს, ეს მოხუცი ქალიო! ერთხელ მეღირსა სოციალური დახმარება და ერთი წლის შემდეგ ისიც მომიხსნეს. როცა "ქართული ოცნება" მოდიოდა ხელისუფლებაში, არ შემეძლო, ასაკში ვარ, მაგრამ ფეხითაც ჩავდიოდი რაიონში და ბოლომდე ვიყავი ყველა მიტინგზე. ჩემი გასაჭირის შესახებ თქვენც ხომ იცით _ "გურია ნიუსიც" არაერთხელ წერდა. მეგონა, მეშველებოდა. დამინიშნეს დახმარება ახალი ხელისუფლების მოსვლის შემდეგ, მაგრამ ერთი წლის შემდეგ ისევ მომიხსნეს.
17 წლის ვიყავი, როცა იმერეთიდან გურიაში ჩამოვსახლდით. მშობლები ადრე გარდამეცვალნენ. მერე ობოლი ძმისშვილი გავზარდე და რომ მეგონა, მეშველებოდა, უფრო უსაშველო დრო დადგა. ქვეყანა დაინგრა, შეიცვალა წესწყობილება და ღარიბი მთლად გაღატაკდა. მათხოვრობას ვერ დავიწყებდი. სანამ სული მიდგას, ხელს გავაქანებ, რაღაცას ვიზამ, მაგრამ უკვე სიბერეც წამომეწია, ახალგაზრდა ძმისშვილი უმუშევარი მყავს. რა ქნას _ სადაა სამსახური?! ახლა უნდა ფუტკრის მოშენებას მიჰყოს ხელი, მაგრამ საწყისი ფული სჭირდება, რომ რაიმე აწარმოოს. როცა პურის ფული არ არის, რა უნდა წამოიწყო? _ გვეუბნება ქალბატონი ეთერი.
ეთერ ტყეშელაშვილის ბიოგრაფია მუდამ უსამართლობასთან და გაჭირვებასთან ასოცირდება _ ის სოფელ ქაქუთის სასაფლაოს მიმდებარე ტერიტორიიდან ჯერ კიდევ 90-იან წლებში გამოასახლეს. მიზეზი სასაფლაოს ტერიტორიის გაფართოება იყო. უძრაობის და სიბნელის წლებად ცნობილ დროში, შეპირებისამებრ, მისთვის სოფელს თანხა უნდა გადაეხადა, თუმცა, დაპირება არ შესრულდა და სამუდამოდ დარჩა ქოხში, რომელიც სახელდახელოდ დაუდგეს გადმოსახლებისას. მერე დრო უფრო გაუარესდა.
_ რა ვქნა 160 ლარით? წამლები სულ მჭირდება. ხან თავბრუ მეხვევა, რამდენჯერ წავქცეულვარ და როცა დამიბრუნდება აზრი, წამოვდგები ხოლმე. ესაა სიცოცხლე? ობოლი ძმისშვილი გავზარდე. სამუშაო არ აქვს. რა ქნას ახალგაზრდა კაცმა _ თურქეთში სამუშაოდ რომ წავიდეს, მე სულ მარტოც არ ვვარგივარ, _ ტირილით გვეუბნება ის.
_ ქალბატონო ეთერ, თუ დახმარება ერთი წლის წინ მოგეხსნათ, რატომ არ მიაკითხეთ ერთი წლის შემდეგ სოციალური მომსახურების სააგენტოს, რომ განცხადება დაგეწერათ ან გაგერკვიათ, რაში იყო საქმე?
_რა უნდა გამერკვია? იმხელა ქულა დამიწერეს, რომ ვიკითხე, რას მერჩოდით,-მეთქი, ახალგაზრდა მამაკაცმა, სოციალურმა აგენტმა მითხრა, ეზოში თხილი გაქვთ და სავალდებულო არაა, რომ ყველას ჰქონდეს სოციალური დახმარებაო. ამის შემდეგ რა მინდა იქ, რისთვის მივიდე, ვინმე ადამიანად მცნობს და დამეხმარებიან? გავიგე, ახალი უფროსი დაუნიშნავთ და იქნებ, მომაქციოს ყურადღება. დავაპირე მისვლა და გზიდან დავბრუნდი _ თვალებში დამიბნელდა, ეტყობა, წნევა მქონდა…
ჩვენ სწორედ იმ დღეს ვნახეთ ქალბატონი ეთერი ოზურგეთში, აფთიაქ "პსპ"-ს გვერდით ჩაკეცილი. შინ დაბრუნება ვურჩიეთ. მგზავრობისთვის საჭირო თანხა არ ჰქონდა და სოფლის მიკროავტობუსის მძღოლს, ჟორა რიჟამაძეს სთხოვა, მგზავრობის ფული არ მაქვს და პენსიაზე გადაგიხდიო.
"გურია ნიუსი" დაუკავშირდა სოციალური მომსახურების სააგენტოს გურიის საკოორდინაციო ცენტრის უფროსს, თეა ლომჯარიას, რომელიც ამ თანამდებობაზე ახლახან დაინიშნა:
_ მე ახლახან შევუდექი მუშაობას. ქალბატონმა ეთერ ტყეშელაშვილმა აუცილებლად უნდა წარმოადგინოს პირადი ნომერი, რომ მის მონაცემებს გავეცნო, შევისწავლოთ და დახმარებაც გაეწევა კანონის ფარგლებში. თუ მას ფიზიკურად არ შეუძლია მოსვლა, ოჯახის მეორე წევრს აქვს უფლება, წარმოადგინოს მისი პირადი დოკუმენტაცია, _ გვითხრა თეა ლომჯარიამ.
