ბატონ ფირუზს იმ დროს ვესტუმრეთ, როდესაც კარტოფილის მოვლით იყო დაკავებული. მიწის უზარმაზარ ფართობზე აყვავების პირას მისული კარტოფილი ბიბინებს… როდესაც საქმეს ვერ უმკლავდება, ბერიძეების მრავალსულიანი ოჯახი დამხმარე მუშას ქირაობს. თუმცა, ეს იშვიათად ხდება.
_ ბატონო ფირუზ, რამდენი წელია, რაც სოფლის მეურნეობას მიყევით ხელი?
_ 15 წელია, ამ საქმეს მივდევ.
_ კონკრეტულად, რას აკეთებთ?
_ შარშან 1 ტონამდე მწარე და ბულგარული წიწაკა, 3 ტონა კარტოფილი, კიტრი და პომიდორი გვქონდა ბაზარზე გატანილი. მესაქონლეობასაც მივდევთ _ ათი სული ძროხა გვყავს. ვმუშაობთ, კმაყოფილი ვართ. შემოსავალი ნორმალური გვაქვს, სახლი გავაკეთეთ, რემონტიც ჩავუტარეთ.
_ და ეს ყველაფერი ფერმერობას “დავაბრალოთ”?
_ კი, ნამდვილად ასეა.
_ მიწას ხელით ამუშავებთ?
_ დახვნის გარდა, ყველაფერს ხელით ვაკეთებთ.
_ რა არის საჭირო იმისთვის, რომ კარტოფილის კარგი მოსავალი მიიღოთ?
_ ეს კარტოფილი უკვე შეწამლულია, დამუშავებულია, ახლა ხოჭოებია. მაგის წამალიც არსებობს და მიცემულია უკვე. პირველ სამის შეწამვლას ვაწარმოებთ ერთი პრეპარატით _ დიტონატით, მემამულეთა კავშირში ვყიდულობთ (გამოყენების წესებს, გთხოვთ, სპეციალისტებთან გაეცნოთ.). მაქვს სპეციალური აპარატი და ამით ვასხურებ.
_ როგორ უვლით კარტოფილს ყვავილობისას და შემდეგ?
_ ჩვენ, კარტოფილის დათესვამდე, ნიადაგს დოლომიტს ვაყრით. აქ ჩაის პლანტაცია იყო ადრე და ამის გამო სჭირდება მიწას გამოკვება. შემდეგ ორგანული სასუქი გამოგვაქვს ნაკელის სახით და ვაყრით, ასევე ვხმარობთ სუპერფოსფატის სასუქს. ახლაც სასუქი შეგვაქვს ნიადაგში. ეს მეორე თოხია, აწი იწყება ამის ყვავილობა, ერთ თვეში კი კარტოფილი იქნება. თუ დაიცავ აგროწესებს, ჭრაქი და სხვა დაავადება ვერ შეაწუხებს. თუ არ დაიცავ, მოსავალი არ იქნება.
_ ერთი და იგივე წესით თესავთ კარტოფილს?
_ მარტო თესლბრუნვას ვახდენთ. გასულ წელს აქ არ გვეთესა. კარტოფილს დიდი მოსავალი რომ გინდა მიიღოთ, ერთ-ერთი პირობაა, ნიადაგი შეუცვალო ყოველ სამ წელიწადში. აქაური თესლი არ ვარგა, ჩვენ ბახმაროს ან ახალქალაქის თესლით ვსარგებლობთ.
_ რომელი კულტურა უფრო მომგებიანია?
_ ბულგარული წიწაკა, თუმცა მისი მოვლა მძიმე და შრომატევადი საქმეა. პირობები უნდა, მაგრამ ის ბაზარზე ძვირად ფასობს.
_ მოდით, ბულგარულ და მწარე წიწაკაზე ვისაუბროთ.
_ შარშან ხუთი ათასი ძირი ბულგარული და ამდენივე მწარე წიწაკა მქონდა დარგული. მთავარია, ნიადაგი იყოს შესაფერისი. ტყუილად არ უნდა გადარგო ჩაის ნამყოფ ადგილზე _ მოსავალს არ მოგცემს. უნდა იყოს ნოყიერი მიწა და საღი ჩითილი. პომიდვრის გადარგვა უკვე დავიწყე, შემდეგ კი ბულგარულს და მწარე წიწაკას გადავრგავ. ჩვენ გადარგვის დროს ორგანულ სასუქს ვიყენებთ.
