"ნებისმიერ საქმეზე ვიღებ პასუხისმგებლობას, რაზეც გადაწყვეტილება გამომიტანია. მაგრამ მინდა ყველამ გაიგოს, რომ შეიძლება მოსამართლის გადაწყვეტილება საზოგადოების აზრს არ ემთხვეოდეს", _ ამის შესახებ იუსტიციის უმაღლესი საბჭოს მდივანმა, ლევან მურუსიძემ "გურია ნიუსთან" ინტერვიუში განაცხადა.
მისი თქმით, შესაძლოა, მის მიერ გამოტანილი გადაწყვეტილებები საზოგადოებისთვის მიუღებელია, მაგრამ როგორც მურუსიძე ამბობს, კანონის ფარგლებში მოქმედებდა.
"როცა ჩემზე ლაპარაკობდნენ, რომ კონკრეტულ საქმეზე ვიღაცას 6 თვე მოვუკელი, რატომ იმაზე არ ლაპარაკობენ, რომ 5 წელი მოვუკელი იმ ადამიანებს, რომლებმაც ანგარების მოტივით დედა და 8 წლის ბავშვი დაახრჩო. იმიტომ მოვუკელი რომ ამას კანონი ითხოვდა. მე შეიძლება ვფიქრობდე რომ სუნთქვის უფლება არ ჰქონდათ, შეიძლება არც უნდა ეარსებათ, მაგრამ კანონის მოთხოვნით მოვუკელი 5 წელი. მოსამართლის პროფესია ის არის, რომ კანონიერი გადაწყვეტილება მიიღოს, მიუხედავად იმისა, საზოგადოება ლინჩის წესით გასამართლებას ითხოვს თუ არა. გინდა გირგვლიანის საქმეზე, გინდა სხვაზე. პასუხისმგებელი ვარ ყველა იმ გადაწყვეტილებაზე, რომელიც გამომიტანია. თუ სტრასბურგის გადაწყვეტილების რომელიმე პუნქტს უზენაეს სასამართლოს მიუსადაგებენ, მაშინაც ვთქვი და ახლაც ვამბობ, წავალ სასამართლო სისტემიდან.
ერთ პუნქტსაც ვერ მიუსადაგებთ და დარწმუნებული ვარ, ღმერთს ვფიცავარ, რომ სხვა გადაწყვეტილებას ვერ მივიღებდი. იმიტომ, რომ არ ჰქონდა გასაჩივრებული. მაგრამ ეს საზოგადოებას არ აინტერესებს. მაგრამ რა გადაწყვეტილებაც მივიღე, სხვა გადაწყვეტილებას ვერ მივიღებდი. თუმცა, ვთვლიდი, რომ მსუბუქად ისჯებოდნენ. ნიუნბერგის, ჩიკაგოს და გინდა, ტორონტოს პროცესი ჩაატარონ, საქმე საქმეზე რომ მიდგება, ვერავინ გამამტყუნებს, რადგან კანონიერი გადაწყვეტილება მივიღე. თან ჩემთან ერთად კიდევ ორი მოსამართლე იყო და მაინცდამაინც მურუსიძეა პრობლემა? ერთი წლის გადასული ვიყავი უზენაეს სასამართლოში მაშინ. უცოდველი და უშეცდომო არავინ არ არის, მაგრამ ხელი რასაც მოვაწერე, მიმაჩნია და მიმაჩნდა, რომ კანონიერი იყო.
უკვე ისე ლაპარაკობენ, მურუსიძეს რომ არ ამბობენ მეხამუშება. მთავარი მიზანია, ვიბრძოდი, სასამართლოს დამოუკიდებლობისთვის და სასამართლო გაცილებით დამოუკიდებელია ვიდრე წინა ხელისუფლების დროს. ის მოსამართლეები, რომლებიც დღეს მუშაობენ, იმსახურებენ, რომ კიდევ ერთი შანსი მიეცეთ და საზოგადოებას შეუძლია მშვიდად იყოს, რადგან საქართველო ამ მოსამართლეების ხელში დამოუკიდებელ და ძლიერ მართლმსაჯულებას მიიღებს. ამაში დარწმუნებული ვარ", _ აღნიშნა მურუსიძემ.
რას ფიქრობს იუსტიციის უმაღლესი საბჭოს მდივანი სასამართლო სისტემაში მიმდინარე პროცესებზე, "რუსთავი 2"-ის საქმეზე, მოსამართლეებთან პირად ურთიერთობებზე, რატომ წყდება გული თბილისის საქალაქო სასამართლოს ყოფილ თავმჯდომარეზე და რომელ საქმეებზე იღებს პასუხისმგებლობას, _ ამ და სხვა საკითხებზე, ლევან მურუსიძის პოზიციას "გურია ნიუსი" მოგვიანებით შემოგთავაზებთ.
ამავე თემაზე:
რა იცის ლევან მურუსიძემ მოსამართლეების ოჯახის წევრებზე
იუსტიციის უმაღლესი საბჭო სასამართლო სისტემის მართლმსაჯულების სტრატეგიაზე მუშაობას იწყებს
თეა წულუკიანთან და ნინო გვენეტაძესთან კომპრომისზე წავედი – მურუსიძე
