“ქლინ ლაინი” საქართველოში ერთ-ერთი პრესტიჟული კომპანიაა, რომელიც შენობის ტექნიკურ გამართვას, კომერციული ფართების, ბინების დასუფთავებასა და დალაგებას უზრუნველყოფს.
ლაშა გოგია 2005 წლიდან 2008 წლამდე მუშაობდა ზუგდიდის მუნიციპალიტეტის საკრებულოს საფინანსო საბიუჯეტო კომისიის თავმჯდომარედ, შემდეგ კი ზუგდიდის მუნიციპალიტეტის საკრებულოს თავმჯდომარის მოადგილე იყო.
ლაშა გოგიამ “გურია ნიუსთან” გათავისუფლების მიზეზებზე ისაუბრა: “სამსახურში როცა მივედი, ყოველგვარი განმარტების გარეშე მითხრეს _ სამსახურიდან გათავისუფლებული ხარო.
_ როგორც ვიცით, თქვენ “ქართულ ოცნებაში” აპირებდით გაწევრიანებას.
_ დიახ, მაგრამ ამაზე ხმამაღალი საუბარი არ ყოფილა. ჯერ-ჯერობით მიმდინარე პოლიტიკურ პროცესებში აქტიურად მხოლოდ სოციალური ქსელიდან ვარ ჩართული. რამდენიმე შეხვედრა მქონდა “ქართული ოცნების” ოფისში. 27 მაისს კი ვიყავი კოალიცია “ქართული ოცნების” მიერ დაგეგმილ აქციაზე.
_ ე.ი. 27 მაისის აქციაზე მისვლის გამო მოგხსნეს სამსახურიდან?
_ რადგან გათავისუფლების მიზეზი არ მითხრეს, ამის დადასტურება არ შემიძლია, მაგრამ დარწმუნებული ვარ აქციაზე მისვლის გამო მომხსნეს სამსახურიდან.
“გურია ნიუსთან” საუბრისას ლაშა გოგიამ განაცხადა, რომ მისი სამსახურიდან გათავისუფლების შესახებ განკარგულება გიორგი ჩოჩიამ გასცა და პირადად მასაც ის ესაუბრა.
როგორც “გურია ნიუსისთვის” გახდა ცნობილი, გიორგი ჩოჩუა ბიზნესმენ ლაშა პაპაშვილის ახლო მეგობარი და მისი საქმეთა მწარმოებელია.
ვითარების გასარკვევად სწორედ მას დავუკავშირდით.
_ ბატონო გიორგი, “ქლინ ლაინის” დირექტორის მოადგილე, ლაშა გოგია სამსახურიდან იმის გამო დაითხოვეთ, რომ 27 მაისს “ქართული ოცნების” მიერ ორგანიზებულ აქციაზე მივიდა?
_ რა 27 მაისს? მე საუკუნეა, წამოსული ვარ იქედან.
_ როგორც გავიგეთ, პირადად უთხარით ლაშა გოგიას სამსახურიდან გათავისუფლების შესახებ. თქვენ ასევე ხართ, ბატონი ლაშა პაპაშვილის უახლოესი ადამიანი.
_ როდის? საიდან? გეშლებათ, გენაცვალე. არასწორი ინფორმაცია გაქვთ. ლაშასთან კიდევ არანაირი მაგდაგვარი საუბარი არ მქონია. მე “ქლინ ლაინიდან” წამოსული ვარ უკვე დიდი ხანია.. სხვაგან რეკავთ ალბათ.
_ ხომ ნამდვილად გიორგი ჩოჩია ბრძანდებით?
_ ზუსტად გეშლებათ. მე ლაშასთან რამე მაგდაგვარი საუბარი არ მქონია.
_ რა მეშლება? ის, რომ თქვენ გიორგი ჩოჩია ბრძანდებით?
_ რასაც ლაპარაკობ, ის გეშლება.
_ სწორედ იმიტომ ვრეკავ თქვენთან, რომ გავარკვიო, ეს სიმართლეა თუ ტყუილი?
_ მე საერთოდ არ მეხება ეს კომპანია. საიდან მოიტანეთ, რომ მე ვმართავ? თვეზე მეტია, თითქმის, წამოვედი. რატომ უნდა მქონდეს შეხება, ვინ სად მიდის?!
_ თქვენ იმასაც არ ადასტურებთ, რომ ლაშა პაპაშვილის მეგობარი ხართ?
_ მე მისი მეგობარი არ ვარ. ვმუშაობ მასთან კომპანიაში. ის არის უფროსი და აქვს თავისი საქმე. მე ჩემი საქმე მაქვს და არაფერი მეგობრობა ეს არ არის.
მოკლედ, მცდარ ინფორმაციას გაწვდიან. 1 აპრილი რომ ყოფილიყო, კიდევ რაღაცას გავიცინებდი. დიდი ხანია, ამ კომპანიასთან შეხება არ მაქვს. არანაირად არ მაინტერესებს ასეთი რაღაცეები.
_ თქვენ ხომ “ქლიან ლაინში” აწარმოებდით საქმეებს?
_ იქ ვიყავი აპრილის ბოლომდე. მგონი, 1 მაისიდან წამოვედი. თუ იწერთ, შეგიძლიათ კარგად ჩაიწეროთ.
_ რა თქმა უნდა, ვიწერ ბატონო გიორგი. ინფორმაციის დასაზუსტებლად გირეკავთ.
_ მცდარი ინფორმაცია გაქვთ ყველაფერთან დაკავშირებით. არანაირი შეხება არ მაქვს.
_ ლაშა პაპაშვილზეც გკითხეთ. მისი საქმეთა მწარმოებელი ხართ?
_ არაფერი ამ თემაზე. არ მგონია, ასეთი რაღაცეები იყოს.. ვინც მცდარი ინფორმაცია მოგაწოდათ, მაგას დაეკითხეთ. თქვენ შეგიძლიათ არ ინერვიულოთ.
_ მე არ ვნერვიულობ…
_ შაბათ ღამეს, შუაღამეს რომ რაღაცას ამუშავებ, უკვე ეტყობა სანერვიულო აქვს ვიღაცას. რაც თქვენ თქვით, სიმართლესთან ახლოს არ არის. კარგად ბრძანდებოდეთ.
