საკრებულოს თავმჯდომარე, ალეკო მამეშვილი დეპუტატებსა და მასმედიის წარმომადგენლებს მიესალმა და დღის წესრიგით გათვალისწინებულ სამ საკითხს ერთნაირად მნიშვნელოვანი და საყურადღებო უწოდა.
პირველ საკითხზე, “ოზურგეთის მუნიციპალიტეტის 2012 წლის ბიუჯეტის დამტკიცების შესახებ” ოზურგეთის მუნიციპალიტეტის საკრებულოს 2011 წლის 9 დეკემბრის #49 დადგენილებაში ცვლილების შეტანის შესახებ” _ ოზურგეთის მუნიციპალიტეტის საკრებულოს დადგენილების დამტკიცების თაობაზე, თავად ალეკო მამეშვილმა ისაუბრა. მან განმარტა, რომ საქართველოს მთავრობის მიერ “სოფლის მხარდამჭერი პროგრამის ფარგლებში, საქართველოს ბიუჯეტიდან ადგილობრივი თვითმმართველი ერთეულებისთვის ოზურგეთის მუნიციპალიტეტს 1 381 415 ლარი გამოეყო.
ალეკო მამეშვილმა ისაუბრა თითოეული სოფლისთვის პროგრამის მიხედვით გასახორციელებელ სამუშაოებზე და სხდომის მონაწილეებს დეტალურად გააცნო 15 ტერიტორიული ერთეულის პრიორიტეტები. მიუთითა, რომ თითოეული სამუშაოს ხარჯთაღრიცხვა უნდა გამოიკრას სოფლის ცენტრში და ინფორმაცია საჯარო უნდა იყოს.
იმავე საკითხზე, დამატებით, გამგეობის საფინანსო-საბიუჯეტო სამსახურის უფროსმა ლია ქათამიძემ ისაუბრა.
მეორე საკითხის შესახებ, “ოზურგეთის მუნიციპალიტეტის 2012 წლის ბიუჯეტის დამტკიცების შესახებ” ოზურგეთის მუნიციპალიტეტის საკრებულოს 2011 წლის 9 დეკემბრის #49 დადგენილებაში ცვლილების შეტანის შესახებ” _ ოზურგეთის მუნიციპალიტეტის საკრებულოს დადგენილების მისაღებად საჯარო ადმინისტრაციული წარმოების დაწყების თაობაზე, კვლავ ალეკო მამეშვილმა და ლია ქათამიძემ ისაუბრეს, _ საქართველოს მთავრობის განკარგულებით, “საქართველოს რეგიონებში ზოგიერთ ღონისძიებათა განხორციელების თაობაზე”, შესაბამისად, ოზურგეთის მუნიციპალიტეტს გამოეყო 1500000 ლარი შემდეგი პროექტების დასაფინანსებლად:
სოფელ დვაბზუ-ცხემლისხიდი-ფამფალეთი-ვაკიჯვრის გზის რეაბილიტაცია, მუნიციპალიტეტის ტერიტორიაზე შიდა გზებისა და ხიდების რეაბილიტაცია, ოზურგეთში სპორტული სკოლის შენობის რეაბილიტაცია და ოზურგეთის ცენტრალურ ქუჩებში ფეხით მოსიარულეთათვის სავალი ნაწილის რეაბილიტაცია.
მესამე საკითხზე, “ოზურგეთის მუნიციპალიტეტის 2012 წლის სახელმწიფო შესყიდვების გეგმაში ცვლილებებისა და დამატებების შეტანის შესახებ” _ ოზურგეთის მუნიციპალიტეტის საკრებულოს განკარგულების დამტკიცების თაობაზე, ამირან გირკელიძემ ისაუბრა. მან ცალ-ცალკე განმარტა, რა სამუშაოები უნდა შესრულდეს ადგილობრივი და სახელმწიფო ბიუჯეტით.
გეგმა ადგილობრივი ბიუჯეტით ითვალისწინებს მუნიციპალიტეტის სამხედრო სამსახურის წვევამდელთა სატრანსპორტო მომსახურების ხარჯებიდან, 1000 ლარი გადაიტანონ ამავე ოფისის რემონტის ხარჯებისთვის. გეგმაშია ასევე 1 ცალი ტელეფონის შეძენა, რომელიც, სავარაუდოდ, 325 ლარი უნდა ღირდეს. სპეცავტომანქანის შესყიდვის ხარჯი უნდა გაიზარდოს 900 ლარით და გამგეობის ავტომანქანა “ტოიოტა პრადოს” რეცხვისთვის გეგმაში შეტანილი უნდა იქნეს 500 ლარი.
დღის წესრიგის მიხედვით განხილული პირველი და მესამე საკითხი დეპუტატებმა ერთსულოვანი მხარდაჭერით დაამტკიცეს, მეორე საკითხის ირგვლივ კი, საჯარო ადმინისტრაციული წარმოების დაწყება გადაწყვიტეს.
