იუსტიციის სამინისტროს ინფორმაციით, ეუთო-ს მიერ გამოქვეყნებული ანგარიშის თანახმად, სამინისტროში მიმდინარე საარჩევნო სიების სრულყოფის პროექტი დადებითად შეფასდა.
"ეუთოს დემოკრატიული ინსტიტუტებისა და ადამიანის უფლებების ოფისის წარმომადგენლებმა სერვისების განვითარების სააგენტოსა და ცესკო–ს მიმართ ამომრჩეველთა სიის სიზუსტესთან მიმართებით სრული ნდობა გამოხატეს," _ამბობენ იუსტიციის სამინისტროში.
მათივე ინფორმაციით, საარჩევნო სიების სრულყოფაზე მუშაობა სააგენტოში გასული წლის 20 ოქტომბრიდან დაიწყო და 2016 წლის 30 ოქტომბრამდე გაგრძელდება. სახელმწიფო სერვისების განვითარების სააგენტომ "საარჩევნო სიების სრულყოფის" პროექტის ფარგლებში განხორციელებული ფართომასშტაბიანი სამუშაოების შუალედური ანგარიში უკვე წარუდგინა სხვადასხვა დაინტერესებულ პირს თუ ორგანიზაციას. 2016 წლის 27 აპრილს სააგენტოს ხელმძღვანელი პირები ეუთო/დემოკრატიული ინსტიტუტებისა და ადამიანის უფლებათა ოფისის (OSCE/ODIHR) და ეუთო-ს საპარლამენტო ასამბლეის (OSCE PA) საჭიროებათა შემფასებელ მისიას შეხვდნენ და წარუდგინეს ინფორმაცია პროექტის შუალედური შედეგებისა და სამომავლო გეგმების შესახებ.
როგორც უწყებაში აცხადებენ, პროექტის ფარგლებში ამ ეტაპზე რამდენიმე მიმართულებით განხორციელებულია მთელი რიგი მნიშვნელოვანი ღონისძიებებისა, კერძოდ:
"განხორციელდა გარდაცვლილ და არასრულწლოვან პირთა ფოტოსურათების შედარება საარჩევნო უფლების მქონე ყველა პირის სურათთან, რაც მონაცემთა ბაზაში სავარაუდო გაორებების აღმოფხვრას ისახავდა მიზნად;
მიმდინარეობს გარდაცვალების ისეთი ფაქტების გამოვლენა, რომლებიც დღემდე შეიძლება არ ყოფილა ოჯახების მიერ გაცხადებული და შესაბამისად რეგისტრირებული;
ხორციელდება აქტივობები უსურათო და უხარისხო სურათების მქონე მონაცემების მაქსიმალურად შემცირების მიმართულებით;
მოქალაქის სქესის აღმნიშვნელ გრაფაში შეუსაბამობის გასწორება და ბაზაში კონკრეტული პირის საიდენტიფიკაციო მონაცემზე მიბმული ფოტოსურათების გასწორება ერთ–ერთი აქტივობაა;
ხორციელდება საზღვარგარეთ საქართველოს საკონსულო სამსახურების მიერ გაცემული უსურათო დოკუმენტებისთვის სააგენტოს მონაცემთა ელექტრონულ ბაზაში არარსებული ფოტოსურათების მოძიება და მათი მონაცემთა ბაზაში დაფიქსირება;
იურიდიულად ძალადაკარგული დოკუმენტების მფლობელი და რეგისტრაციიდან მოხსნილი პირებისათვის პირადობის დამადასტურებელი დოკუმენტის გაცემაზე ხელმისაწვდომობა გაიზარდა, რაც აღნიშნული სეგმენტისთვის პირადობის მოწმობის უფასოდ დამზადებას გულისხმობს.
ამ ეტაპზე განხორციელებული ღონისძიებების შედეგად იდენტიფიცირებული და აღმოფხვრილია გაორების 485 ფაქტი, დარეგისტრირებულია გარდაცვალების 214 აქტი, აღდგენილია 3 673 ფოტოსურათი, შესწორებულია 252 ხარვეზიანი ჩანაწერი, საფასურის გადახდის გარეშე დოკუმენტი მიიღო რეგისტრაციიდან მოხსნილმა და იურიდიულად ძალადაკარგული დოკუმენტების მფლობელმა 74 346-მდე მოქალაქემ.
ასევე, პოტენციური ამომრჩევლების მონაცემთა დაზუსტების მიზნით იუსტიციის მინისტრის ბრძანებით 26 მაისიდან 26 ივნისამდე პირადობის მოწმობის აღება 17 წელს მიღწეულ საქართველოს მოქალაქეებს უფასოდ შეუძლიათ.
ამ დრომდე 53 834 მოქალაქემ მოწმობის მიღებაზე განაცხადი გააკეთა, მათ შორის, 31 468 პირი დღემდე არ ფლობდა ბიომეტრიული მონაცემების შემცველ საიდენტიფიკაციო დოკუმენტს.
სააგენტომ პროექტი სწორედ იმისთვის შეიმუშავა, რომ საქართველოს ნებისმიერ მოქალაქეს არ შეეზღუდოს არჩევნებში ხმის მიცემის უფლება. აღნიშნული პროექტი მიზნად ისახავს მონაცემთა ბაზებში არსებული ხარვეზების აღმოფხვრას, სააგენტოს მონაცემთა ბაზების ხარისხის ამაღლებას და ცენტრალური საარჩევნო კომისიისთვის მაქსიმალურად სრულყოფილი ფორმით პოტენციურ ამომრჩეველთა საიდენტიფიკაციო მონაცემების გადაცემას", _ აცხადებენ იუსტიციის სამინისტროში.
როგორც ცნობილია, 1-ელ ივნისს ეუთო-მ საქართველოში დაგეგმილი საპარლამენტო არჩევნების შესახებ ანგარიში გამოაქვეყნა, რასაც ქვეყნის მმართველი პარტია გამოეხმაურა და განაცხადა, რომ ეუთო-მ ანგარიში კი არა, სადამკვირვებლო მისიის პარტიებთან შეხვედრებზე მიღებული ინფორმაცია გამოაქვეყნა.
ეუთო-ს ანგარიშში ამომრჩეველთა რეგისტრაციის შესახებ ნათქვამია, რომ ხმის მიცემის უფლება 18 წელს გადაცილებულ ყველა მოქალაქეს აქვს, თუმცა მოქალაქეები არ ფლობენ ინფორმაციას, რომ კანონის მიხედვით, პატიმარს, ვისაც 5 წელზე მეტი აქვს მისჯილი, არჩევნებში ხმის მიცემის უფლება არ აქვთ.
ანგარიშში ასევე აღნიშნულია, რომ "ამომრჩეველთა რეგისტრაციიის პროცესი პასიურია და ცენტრალიზებული".
ეუთო-ს ანგარიშის მიხედვით, ცესკო პასუხისმგებელია ამომრჩეველთა სიების შედგენაზე იუსტიციის სამინისტროს სახელმწიფო სერვისების განვითარების სააგენტოს ყოველ კვარტალურ ინფორმაციაზე დაყრდნობით.
ეუთო ასევე აღნიშნავს, რომ ხელისუფლებას ბიომეტრიული მონაცემები და პირადობის დამადასტურებელი დოკუმენტები შემოაქვს.
სახელმწიფო სერვისების განვითარების სააგენტო აგრძელებს ზომების მიღებას მონაცემთა ბაზის ხარისხის გაუმჯობესებისთვის, რომ სიიდან ამოიღონ დუბლირებული პიროვნებები და სხვა შეუსაბამობები.
თუმცა, სახელმწიფო სერვისების განვითარების სააგენტომ ეუთის სადამკვირვებლო მისიას მიაწოდა ინფორმაცია, რომ 64 000-მდე ამომრჩეველი იურიდიული ძალის მქონე დოკუმენტს არ ფლობს, რის გამოც ხმის მიცემა არ შეუძლია.
ეუთოს მიერ გამოქვეყნებული დოუმენტის თანახმად, თებერვლის მონაცემებით, ამომრჩეველთა ერთიან სიაში 3 540 000 პირი იყო რეგისტრირებული.
ამავე დოკუმენტში განმარტებულია, რომ ამომრჩევლებს უფლება აქვთ გადაამოწმონ საკუთარი თავი სიებში, მათ შორის სახელმწიფო სერვისების განვითარების ცენტრებში, ასევე ონლაინ რეჟიმში.
გარდა ამისა, ეუთო აღნიშნავს, რომ სიები საუბნო საარჩევნო კომისიებმა ყურადღების ცენტრში მოსახვედრ ადგილებში უნდა გამოაქვეყნონ, როდესაც ისინი საბოლოოდ ჩამოყალიბდება.
მათივე ინფორმაციით, 2014 წლიდან ამომრჩეველთა სიებში ფოტოსურათებიც შედის.
ეუთო ასევე აღნიშნავს, რომ მისმა თანამოსაუბრეებმა გამოთქვეს ნდობა ცესკოსა და სახელმწიფო სერვისების განვითარების სააგენტოს მიერ ამომრჩეველთა სიების ხარისხზე. თუმცა, ზოგიერთმა აღნიშნა, რომ სისტემაში არსებული ზოგიერთი ხარვეზი პრობლემად რჩება და განხილვას მოითხოვს, ასევე დაბალი კვალიფიციის მქონე ადმინისტრაციული მოხელეების გამო საარჩევნო პროცესი უნდობლობას იწვევს.
შეგახსენებთ, რომ საქართველოს ხელისუფლების მოწვევით, 23-29 აპრილს საქართველოში წინასაარჩევნო პროცესის შესაფასებლად ეუთო-ს დემოკრატიული ინსტიტუტებისა და ადამიანის უფლებათა ოფისის (ODIHR) საჭიროების შემფასებელი მისიის წარმომადგენლები (NAM) იმყოფებოდნენ, რომლებმაც შეხვედრები გამართეს სახელმწიფო ინსტიტუტების ოფიციალურ პირებთან, ასევე პოლიტიკურ პარტიებთან, სამოქალაქო საზოგადოებასა და საერთაშორისო ორგანიზაციების წარმომადგენლებთან.
ამავე თემაზე:
ეუთო-მ საქართველოში დაგეგმილი საპარლამენტო არჩევნების შესახებ ანგარიში გამოაქვეყნა
ეუთო-ს შუალედური ანგარიში არ გამოუქვეყნებია – "ქართული ოცნება"
