მართალია, "გურიას" ხელმძღვანელობა დიდი რიხითა და ამბიციით გვიშენებდნენ "ოქროს კოშკებს”, მაგრამ ბოლოს ისე მოხდა, რომ, ლამის, ქვედა ლიგაში დავქვეითდით და ეს მაშინ, როცა გვარიანი საბიუჯეტო თანხები შევალიეთ ამ ერთ სეზონს.
ასე თუ ისე, ეს ამბავი წარსულია და წინ გარდამავალი ჩემპიონატი გველის, რომელიც გადამწყვეტი იქნება იმის გამოსარკვევად, სამომავლოდ ჩემპიონატში თუ ვინ დაიმკვიდრებს ადგილს.
კვირას ფეხბურთის ფედერაციაში უმაღლესი ლიგის კლუბების წარმამომადგენლებთან შეხვედრა გაიმართა, სადაც სწორედ გარდამავალი ჩემპიონატის ფორმატზე იყო მსჯელობა. მსჯელობა კარგია, მაგრამ გაუგებარია ერთი რამ – როგორც შეხვედრაზე მყოფმა "გურიას” ფინანსურმა დირექტორმა თენგიზ კიკვაძემ გაგვიცხადა, სისტემა ჯერ არ გარკვეულა და ამაზე სავარაუდოდ 10 ივნისისთვის აღმასკომის სხდომაზე მოხდება მსჯელობაო. ჰოდა, ერთ-ერთ სპორტულ საიტზე ყველა კლუბის წარმომადგენლის კომენტარებს გავეცანით, სადაც ბევრს 14 გუნდის ორ წრედ ჩატარებული ჩვეულებრივი სისტემა სურდა, მაგრამ დროის სიმცირის გამო, ეს შეუძლებელია და ამიტომ ორი შვიდგუნდა ჯგუფის სისტემაზეც ყაბულს ვართო, _ აცხადებდნენ. გამოდის, რომ სფფ ადრე დაანონსებულ ჯგუფურ ეტაპს ემხრობა და კლუბებიც აიძულა ამ სისტემას დათანხმებოდნენ.
მართალია, ბატონი თენგიზი გადაჭრით უარყოფს ამ სისტემის დამტკიცებას, მაგრამ ფაქტია, სხვა ვარიანტი ფაქტობრივად, არც განიხილება და ყველა შეეგუოს უნდა ამ ამბავს.
მოკლედ, აღმასკომის სხდომა დაადგენს გათამაშების სისტემას, მაგრამ კვლავ უცნობია ეს 14 გუნდი როგორ გადანაწილდება ორ ჯგუფში. თენგიზ კიკვაძე ირწმუნება, რომ კენჭისყრა მოხდება და ამის შემდეგ გაირკვევა მეტოქეთა ვინაობა. არადა, წესით არავის გაუკვირდებოდა, ფედერაციას გასული სეზონის შედეგებით რომ ეხელმძღვანელა და კენტადგილოსნები ერთ ჯგუფში მოექცია, ლუწები კი _ მეორეში.
ამ შემთხვევაში "გურიას” მართლაც რთული კალენდარი უწევდა. თავად განსაჯეთ, ექვსივე მეტოქე აღმოსავლეთ საქართველოს გუნდები იქნებოდნენ – "დინამო”,"დილა”,"სიონი”, "ცხინვალი”, "საბურთალო” და "ლოკომოტივი”. ამ შემჭიდროვებულ დროში კი გურული კლუბისთვის არც ფინასურადაა მისაღები ეს ვარიანტი და არც ფიზიკური კონდიციების მხრივ.
მოკლედ, თუ კენჭისყრა იქნება, ხომ კარგი, მაგრამ ისმის კითხვა, თავად "გურია” რა იქნება ამ სეზონისთვის. კიკვაძის თქმით, ყველა ფეხბურთელს, ვინც ბოლო სეზონი ჩაამთავრა, კონტრაქტები გაუუქმდა და გუნდიდან ოფიციალურად წასულებად ითვლებიან. თუ ვინ დარჩება სამომავლოდ და ვინ მოვა ახალი, ეს ჯერ კლუბის მესვეურებმა არ იციან.
"მიდის ამაზე მუშაობა, ჯერ ვერაფერს გეტყვით, მაგრამ "გურიას” კარგი გუნდი რომ ეყოლება, ეს გარდაუვალია” – ამბობს კლუბის აღმასრულებელი დირექტორი, ოთარ ჩხაიძე.
თუმცა, არ უნდა დაგვავიწყდეს, გასული სეზონის დასაწყისში იგივეს ამტკიცებდნენ, მაგრამ ბოლოს რა მივიღეთ? იმედია, კლუბის ხელმძღვანელობა ყველაფერს იღონებს წამყვან ათეულში გუნდის დასარჩენად. ეს კი იოლი რომ არ იქნება, ამაზე ისიც მეტყველებს, რომ შვიდი გუნდიდან ორი გავარდნის კანდიდატია.
და რაც მთავარია, სადაა თანხა?! ფეხბურთის განვითარების ახლადშექმნილ ფონდს თუ დავეყრდნობით, გარდამავალ ეტაპზე ყველა კლუბს 600-600 ათასი ლარი უნდა ერგოს მარტო საბაზისო თანხა, ამას სპონსორის შემთხვევაში 300 ათასი ლარი, როგორც სტიმულირება, ისე ემატება, ხოლო საპრემიო ფონდი ასევე 600 ათასი ლარი იქნება. ფონდს ფინანსური პრობლემები ჯერ კიდევ წინა სეზონში შეექმნა და გაუგებარია, საიდან უნდა შეავსოს არსებული დეფიციტი. თუ ადგილობრივ ბიუჯეტებს შევხედავთ, ეს გამორიცხულია, მითუმეტეს, წინასაარჩევნო რეჟიმში. გამოდის სახელმწიფომ უნდა დაიკაპიწოს ხელები, მაგრამ როგორ, ესეც გაუგებარია.
