“თუ ერთისთვის შეიძლება მიწის დამტკიცება და ლეგალიზაცია, ჩვენთვის არ შეიძლება?”

ერთ-ერთი ჯიხურის მეპატრონის თქმით, ეს მიწის ნაკვეთი ლეგალიზაციის წესით საკუთრებაში დაუმტკიცებია ბიზნესმენ ავთო ღლონტს, რომელსაც ამ ტერიტორიაზე აქვს ავტოსადგური, თუმცა, თავად ღლონტი “გურია ნიუსთან” საუბარში ამ ინფორმაციას კატეგორიულად უარყოფს.

_ ჟანი კალანდაძემ ეს მიწა მოგვცა იჯარით, მის დროს დაგვიმტკიცდა. იჯარა გაგვიფორმდა 5 წლის ვადით, ჟანი გარდაიცვალა, მის შემდეგ იყო რამდენიმე გუბერნატორი, მიხო სვიმონიშვილის დროს კი გაკეთდა წინა ფასადის ახალი პროექტი. ამის შემდეგ პროექტში გადახდილი გვაქვს 900 ლარი. აქ არის 17 ჯიხური, ჩვენ წარვადგინეთ ერთი პიროვნება და მისგან ქვეიჯარებით ავიღეთ 5-წლიანი ვადით. მერე რა ხდება? გაგვაკეთებინეს დისკები სასწრაფოდ, გადაგვახდევინეს თითოს 90-90 ლარი. მერე იჯარას ვადა გაუვიდა. რომ დაგვერეგისტრირებინა და ჩვენს მფლობელობაში გადმოსულიყო, ყველაფერი გავაკეთეთ, ფული საქართველოს ბანკში გადავიხადეთ, ჩეკებიც გვაქვს. ამის შემდეგ დაგვიბარეს და გვითხრეს, რომ ყველაფერი თქვენს მფლობელობაში იქნება, არ ინერვიულოთო, გაყიდვაც შეგეძლებათო. მერე მოიყვანეს ვიღაც აუდიტი, რომელსაც ჩვენი გაკეთებული შენობები შეუფასებია 2 800 ლარად. ამაში ფულს ვიხდით და ყველას ბანკის კრედიტები გვაქვს, წელში გაწყვეტილები ვართ. ერთი აგური არ დაუდია და არ მოუცია ვინმეს ამ ჩვენს აშენებულ ჯიხურებზე, ხელისუფლება არ დაგვხმარებია. ახლა, როგორც ჩანს, როგორც მათ უნდათ, უზურფრუქტის წესით აიღებენ და მოგვაქირავებენ _ ყოველთვიურად უნდა ვუხადოთ ფული. გადავწყვიტეთ, გუბერნატორი გვენახა, მაგრამ ვერ ვეღირსეთ, ვერ მივაღწიეთ მასთან. მან იცის ყველაფერი, საიდან და როგორ დავიწყეთ. ვნახეთ პეტრე სალუქვაძე, ავთანდილ მექვაბიშვილი, გუბერნატორის მოადგილე, ლაშა შაფაქიძე, მაგრამ პასუხს ვერავინ გვცემს, _ ამბობენ “გურია ნიუსთან” საუბარში იქ მომუშავენი.

_ რას ითხოვთ ახლა კონკრეტულად?

_ ჩვენ ლაშა შაფაქიძეს მოვთხოვეთ, რომ შეგვახვედროს გუბერნატორს, რადგან მის გარეშე ამ საქმეს წერტილს ვერავინ დაუსვამს. დაგვაწერინეს განცხადება, რომელზეც ხელი უნდა მოგვეწერა, რომ აღმაშენებლის ქუჩაზე მდებარე არასასოფლო-სამეურნეო დანიშნულების მიწა შენობა-ნაგებობით გადმოგვეცეს რამდენიმეწლიანი იჯარით, ანუ ჩვენ უნდა გადავიხადოთ ფული ისევ ყოველთვიურად, რომელიც, ალბათ, მიწის გადასახადს ითვალისწინებს. ჩვენ გადავაკეთეთ განცხადება, რომელშიც აღვნიშნავთ, რომ თქვენდამი დაქვემდებარებული არასასოფლო-სამეურნეო მიწის ნაკვეთზე, რომელზეც განთავსებულია ჩვენივე პირადი სახსრებით აშენებული შენობა-ნაგებობა, გაგვიგრძელეთ იჯარაო. ამაზე გადაირივნენ. ახლა არ ვიცით, რა ხდება _ შეტანილი გვაქვს განცხადება ოზურგეთის მუნიციპალიტეტის გამგეობაში, რომელიც არც უკან დაუბრუნებიათ. ისევ კითხვის ნიშნის ქვეშ დგას ეს საკითხი. თუ რაიმე შენობა-ნაგებობა დგას ნაკვეთზე, იგი ავტომატურად რამდენიმე წლის შემდეგ, შეგიძლია, შეისყიდო. ჩვენს ტერიტორიაზე არის ავთო ღლონტის ავტოსადგური. ღლონტს, როგორც გავარკვიეთ ეკონომიკის სამინისტროსთან, ჩვენგან დამოუკიდებლად, ლეგალიზაციით საკუთრებაში დაუმტკიცებია მიწის ნაკვეთი შენობიანად. თუ ერთისთვის შეიძლება დამტკიცება და ლეგალიზაცია, ჩვენთვის რატომ არ შეიძლება? ამ საქმეს ასე არ დავტოვებთ, ჯერ გვინდა ჩიტაიშვილს შევხვდეთ, შემდეგ კი ვიცით, როგორც უნდა ვიმოქმედოთ, _ ამბობს ერთ-ერთი ჯიხურის მეპატრონე.

“გურია ნიუსმა” ამ საკითხთან დაკავშირებით გურიის გუბერნატორის მოადგილეს, ლაშა შაფაქიძეს სთხოვა კომენტარი, თუმცა მან ჩვენს კითხვას თავი აარიდა: _ მოგვიანებით დაგირეკავთ, _ გვითხრა მან და ტელეფონი გაგვითიშა.

ბიზნესმენი ავთო ღლონტი “გურია ნიუსთან” ინფორმაციას ამ მიწის ნაკვეთის ლეგალიზაციის წესით საკუთრებაში დამტკიცების შესახებ, უარყოფს და აღნიშნავს, რომ არც მომავალში აპირებს ამის გაკეთებას:

_ ჩვენ “გმირთა მოედანზე” გვაქვს საკუთრება, დაახლოებით, 20-25 კვმ. დანარჩენი, სადაც ეგ ჯიხურებია განთავსებული, ჩემი საკუთრება ნამდვილად არ არის.

_ არ ადასტურებთ ამ ინფორმაციას?

_ არა, არა. ეგ არის სახელმწიფო საკუთრება. გვინდოდა, იჯარით აგვეღო, მაგრამ იმდენად, რამდენად ამ ტერიტორიაზე მუნიციპალიტეტის ავტომანქანებიც მუშაობს, ამიტომ არავის არ აქვს უფლება დაისაკუთროს და არც არავისზე არ არის გაცემული, მოკლედ, სახელმწიფო საკუთრებაშია ეგ ტერიტორია.

_ ანუ, არც აპირებთ, რომ დაისაკუთროთ?

_ არა, რატომ უნდა დავისაკუთრო? ეს არის ისეთი ადგილი, რომელიც ყველას ჭირდება. ჩვენ გვაქვს მთავარი ავტოსადგომის ფილიალი, რომ მოხდეს მგზავრთა გაბილეთიანება და ელემენტარულად, მხოლოდ ეს ფუნქცია გვაკისრია, _ აღნიშნავს ღლონტი.

ამ მასალის მომზადებისას, დაგვიკავშირდა ერთ-ერთი ჯიხურის მეპატრონე და გვითხრა, რომ, როცა გუბერნატორმა გაიგო, ამ საქმით ჟურნალისტები იყვნენ დაინტერესებული, მაშინვე დაუბარებია ერთ-ერთი ჯიხურის მეპატრონე და დახმარება აღუთქვამს: _ ოღონდ გაჩერდით და ყველანაირად დაგეხმარებითო, _ უთქვამს გუბერნატორს.