"გურია ნიუსის" მიერ მოპოვებული ინფორმაციით, საპარლამენტო არჩევნებში ოზურგეთის მუნიციპალიტეტის და ქალაქ ოზურგეთის მუნიციპალიტეტის საკრებულოს დეპუტატების ერთი ნაწილი აპირებს მონაწილეობას.
დადასტურებული ინფორმაციით, საპარლამენტო არჩევნებში "ერთიანი ნაციონალური მოძრაობის" დეპუტატობის კანდიდატი, ოზურგეთის მუნიციპალიტეტის საკრებულოს წევრი, დავით მჟავანაძე იქნება. გიორგი ვაშაძის ახალი პოლიტიკური ძალის დეპუტატობის კანდიდატი ოზურგეთში პაატა მანჯგალაძე მოიაზრება, რომ ოზურგეთის მუნიციპალიტეტის საკრებულოს წევრია.
ასევე დადასტურებული ინფორმაციით, დამოუკიდებელი კანდიდატი იქნება არჩევნებზე ქალაქ ოზურგეთის მუნიციპალიტეტის საკრებულოს წევრი, გოჩა ძიმისტარაშვილი.
ვრცელდება ინფორმაცია, რომ "ლეობორისტული პარტია" ოზურგეთში ქალაქ ოზურგეთის მუნიციპალიტეტის საკრებულოს წევრის, ნათია შარაშენიძის კანდიდატის დაყენებას აპირებს.
ვის შეუძლია არჩევნებში მონაწილეობა- ამ საკითხთან დაკავშირებით "გურია ნიუსთან" განმარტებას "საქართველოს ახალგაზრდა იურისტთა ასოციაციის" ოზურგეთის ოფისის ხელმძღვანელი, თამაზ ტრაპაიძე აკეთებს.
"საქართველოს საარჩევნო კოდექსის 112-ე მუხლის შესაბამისად, საქართველოს პარლამენტის წევრობის კანდიდატის სტატუსი შეუთავსებელია შემდეგ თანამდებობებთან:
ა) საქართველოს პრეზიდენტი; ბ) საქართველოს, აგრეთვე ავტონომიური რესპუბლიკის მინისტრები, სამთავრობო და სახელმწიფო საქვეუწყებო დაწესებულებათა ხელმძღვანელები და მათი მოადგილეები; გ) საქართველოს უშიშროების საბჭოს წევრები (გარდა პარლამენტის წევრებისა); დ) საქართველოს ეროვნული ბანკის საბჭოს და საქართველოს საფინანსო ზედამხედველობის სააგენტოს საბჭოს წევრები; ე) გენერალური აუდიტორი და მისი მოადგილეები; სახელმწიფო რწმუნებულები – გუბერნატორები და მათი მოადგილეები; ზ) საკრებულოს თავმჯდომარე, გამგებელი, ქალაქის მერი; თ) საქართველოს შინაგან საქმეთა და თავდაცვის სამინისტროების, საქართველოს სახელმწიფო უსაფრთხოებისა და დაზვერვის სამსახურების და სახელმწიფო დაცვის სპეციალური სამსახურის ოფიცრები; ი) მოსამართლეები; კ) საქართველოს სახალხო დამცველი და მისი მოადგილე; ლ) საქართველოს პრეზიდენტის მრჩევლები; მ) საქართველოს იუსტიციის უმაღლესი საბჭოს წევრები (რომლებიც არ არიან პარლამენტის წევრები); ნ) საჯარო სამსახურის ბიუროს უფროსი და მისი მოადგილეები; ო) პროკურორები, მათი მოადგილეები, თანაშემწეები და გამომძიებლები; პ) საქართველოს კომუნიკაციების ეროვნული კომისიისა და საქართველოს ენერგეტიკისა და წყალმომარაგების მარეგულირებელი ეროვნული კომისიის წევრები." – გვითხრა თამაზ ტრაპაიძემ.
მისივე თქმით, იმ შემთხვევაში, თუ ზემოხსენებული თანმდებობის პირები მოისურვებენ პარლმენტის წევრობის კანდიდატად რეგისტრაციას, შესაბამისი საარჩევნო კომისიისთვის განცხადების წარდგენიდან არა უგვიანეს მე-2 დღისა დაკავებული თანამდებობიდან უნდა გადადგნენ.
"ზემოხსენებული თანამდებობებიდან გადადგომისა და განთავისუფლების შესახებ სათანადო სამართლებრივი აქტი დაუყოვნებლივ უნდა წარედგინოს შესაბამის საარჩევნო კომისიას. წინააღმდეგ შემთხვევაში პირს უარი ეთქმება საქართველოს პარლამენტის წევრობის კანდიდატად რეგისტრაციაზე, ხოლო თუ რეგისტრაცია განხორციელდა − რეგისტრაცია უქმდება.
ამდენად საკრებულოს წევრს შეუძლია იმავდროულად იყოს პარლამენტის წევრობის კანდიდატი." – აღნიშნა ჩვენთან საუბრის დროს თამაზ ტრაპაიძემ.
.jpg_18865.jpg)
