“გომისმთაზე იგრძნობა შავი ზღვის მარილის სუნი” – ფოტორეპორტაჟი

 ოზურგეთის მუნიციპალიტეტის კურორტ გომისმთას პირველი დამსვენებლები მაისში  ესტუმრნენ და სექტემბრის ბოლომდე დარჩებიან.

"ჩვენ ფაქტიურად დამსვენებლების რიგში აღარ ვითვლებით. ოთხი თვის განმავლობაში აქ ვიქნებით. წლებია აქ ჩამოვდივართ ოჯახთან ერთად. თან ვისვენებთ და თან ვმუშაობთ." – გვითხრა შუახევის მუნიციპალიტეტიდან გომისმთაზე ჩამოსულმა ასმათ შარაშიძემ.

მისივე თქმით, ის ოჯახის წევრებთან ერთად მეცხოველეობით არის დაკავებული.

"შინაური ცხოველები გვყავს და ვუვლით. ასევე ვთესავთ კარტოფილს, ბოსტანი გვაქვს და საქმესთან ერთად კიდევაც ვისვენებთ სუფთა ჰაერზე", – თქვა ჩვენთან საუბრისას ასმათ შარაშიძემ.

"გვინდა, რომ რაც შეიძლება  მეტი დამსვენებელი ჰყავდეს გომისმთას და მეტი ყურადღება მიექცეს. გზა გაკეთებულია, ახლა შუქი გამოყვანას ველოდებით, ეს რომ მოხდება, უფრო მეტი ადამიანი ამოვა დასასვენებლად". – ამბობს შურა ქარცივაძე, რომელიც ყოველ წელს დადის გომისმთაზე და სექტემბრის ბოლომდე იქ რჩება.

"ოზურგეთის მუნიციპალიტეტის გამგეობამ შეისყიდა წყლის პროექტი, რომელიც გომისმთაზე უნდა განხორციელდეს და წელს უნდა დაიწყოს. ასევე ენერგეტიკის სამინისტროსთან გვაქვს მჭიდრო თანამშრომლობა და მიმდინარეობს მოლაპარაკებები ელექტროფიცირებასთან დაკავშირებით. ეს არის ორი სერიოზული ნაბიჯი, რომელსაც ჩვენ გადავდგამთ კურორტ გომისმთის განვითარებისთვის." – გვითხრა ოზურგეთის მუნიციპალიტეტის გამგებელმა  მერაბ ჭანუყვაძემ.

 გამგებელმა გვითხრა, რომ კურორტების პოპულარიზაციისთვის გომისმთაზე და ურეკში სეზონის განმავლობაში არაერთი ღონისძიება ჩატარდა.

ა.(ა).ი.პ "გომისმთის" უფროსი სპეციალისტი ზურა ჩხარტიშვილი გომის მთაზე ამბობს, რომ ეს არის უნიკალური ადგილი, სადაც ყოველთვის დადის, მათ შორის, ზამთარშიც.

"გომისმთაზე  იგრძნობა შავი ზღვის მარილის სუნი.  სხვათაშორის, მოვიძიე მეტად საინტერესო ისტორია, რომელიც 1842 წლიდან ფიქსირდება გომის მთასთან დაკავშირებით. გომის მთა ყოფილა ყველაზე უახლოესი გზა ფოთიდან თურქეთამდე. აქ არის ერთი ასეთი ადგილი _ ნაფოცხვარა და სწორედ  ეს ყოფილა ე.წ. საბაჟო, სადაც ყველა ადამიანი მოწმდებოდა თურმე.   ისინი ძირითადად, ვირით ზიდავდნენ სხვადასხვა სახის ტვირთს თურქეთში. აი, ასეთი სტრატეგიული დანიშნულებაც ჰქონია ამ ადგილს და მე იმედი მაქვს, რომ ეს უნიკალური კურორტი აუცილებლად აღორძინდება. აქ მოსული ადამიანი ჭინჭაოს და მწვანე ტბას რომ ნახავს, მერე არსად მოუნდება წასვლა." – გვითხრა ზურა ჩხარტიშვილმა.

გომისმთაზე უკვე ჩატარდა პირველი ღონისძიება. პირველად მთაზე ჯიპ-ტური მოეწყო, ამ დღეებში კი დაგეგმილია მედია-ტური.