საპარლამენტო უმრავლესობის ლიდერი ზვიად კვაჭანტირაძე წიგნს წერს. როგორც თავად ამბობს, წიგნზე მუშაობას, რომელშიც გურულების სახალისო ისტორიები იქნება თავმოყრილი მალე დაასრულებს:
_ თითქმის ათი წლის წინ, 2007 წელს, როცა საქართველოში „ფეისბუქური“ ცხოვრება მკვიდრდებოდა, ახალი გვერდი შევქმენი, სადაც გურულებისათვის დამახასიათებელი მხიარული ამბები, ისტორიები და ანეგდოტები უნდა გამოქვეყნებულიყო.
მალე ჯგუფში ასობით ადამიანი შეიკრიბა და თავიდანვე პატარა, ხუთპუნქტიანი კონსტიტუციაც დავწერე. მიუხედავად გურულების გამორჩეული პოლიტიკური მიდრეკილებებისა, ეს ჯგუფი აპოლიტიკურია.
არც სახელი შემირჩევია შემთხვევით _ "საკრიმანჭულო საზოგადოება". კრიმანჭული ხომ სიმღერის განსაკუთრებული ხელოვნებაა და გაცილებით მეტი, ვიდრე სასიმღერო ხელოვნება.
ასე დაიწყო და დღეს უკვე ბევრი კარგი ისტორია მოგროვდა "საკრიმანჭულოში,“ რამაც მაფიქრებინა, ყველაფერი ერთად შემეკრიბა და ერთ კარგ წიგნად მექცია.
მუშაობას მხოლოდ ღამე, თავისუფალ დროს ვახერხებ ხოლმე, მაგრამ უკვე, მალე დავასრულებ იმედია და წარმოგიდგენთ მხიარულებითა და ალალი იუმორით სავსე წიგნს, რომელსაც ერთხელ თუ წაიკითხავთ, მერეც აუცილებლად დაუბრუნდებით, _ აღნიშნა გურია ნიუსთან საუბრისას ზვიად კვაჭანტირაძემ.
